BALA PENGARI BN BELALAI KE DIRI TI UDAH NUKAR PENGARAP DIRI!
Sarawak Report ulih ngayan ke sekeda bala pengari ari BN bisi nukar pengarap diri lalu nerima nama ti baru. Taja pan baka nya, sida endang mengkang ngelalai ke pekara tu enggai ke ditemu bala pengundi ba sitak ti diari ke sida! Siko ari sida nya benama YB Efendi bin Abdullah, ti ditemu orang enggau nama bendar iya Sylvester Entrie.
Ba minggu ti dulu ari tu Efendi Abdullah udah didinga betalat ke jako leboh maia betanya saut dalam radio. Penabor berita Iban ari radio ti ngati ke diri Radio Free Sarawak bisi betanya ngagai pengari rakyat nya pasal penusah ampoh bah ti nuntong sitak Marudi ti diari ke iya.
“Who is Papa Orang Utan?!” (Sapa Papa Orang Utan tu?!)
Ba pun randau, pengari BN berupai amat nyeliah ke diri ti ditanya nengah radio lalu seruran didinga nanya ke nama penabor berita ti semina ngena nama Papa Orang Utan. Iya mega enggai berandau ngena jako Iban tau ke jako Melayu, taja pan dua bengkah jako nya endang dikena orang di sitak Marudi
“Aku enda iboh meri penerang pasal pekara tu, enti nuan deka nemu enggau silik nuan empu ngusong menoa nya lalu meda ke diri empu”, pia ko iya nerengik penabor berita Radio Free Sarawak nya. Taja pan udah diterengik iya ngemalat nya, penabor berita madah ke bala peninga bisi pengirau ati lalu deka nemu pasal penusah ti nuntong bala pangan enggau kaban belayan sida ba sitak nya.
Enda iboh aku madah ke pengundi ba sitak aku
“Enda iboh, enda iboh”, ko saut pengari nya. “Nadai hal nya, aku enda irau sekali ke sida (peninga) deka nemu tau ke enda, laban aku empu udah ngereja pengawa aku … leboh aku ngusong menoa nya sekeda ari orang ba menoa nya bisi udah meri berita soh kaban-belayan sida lalu aku tau enda ibuh nerang ke enggau silik ditu!”
Crocodile bin Abdullah (Jagu bin Abdullah)!
Udah iya ti nyau ringat laban ditekan ke nadai basa laban ti enggai madah ke nama bendar, penabor berita nya nyau mansut ke nama baru pengari rakyat nya ti enda ditemu orang ngelama tu.
“Enti nuan ngumbai aku nadai basa, baka ni ko aku ngangau ke nuan manah agi?” ko penabor berita nya betanya. “Aku ngangau ke nuan ngena nama YB Sylvester Entrie, tau ke YB Efendi Abdullah?”
Entrie tau ke Efendi udah kala disangka sekeda orang belalai ke pengawa diri ti betukar jalai pengarap ngagai pengarap Islam ngambi ke enda magi sitak, iya ti dipelaba ke orang bisi tuju politik lalu dikena iya ngulih ke pangkat. Saut iya ngagai penabor berita nya ngena jako ringat lalu berupai enda baka orang ti bepelajar.
“Oh enda iboh! Nuan enda iboh nyebut (leka jako) YB, nama aku Entrie! Nya udah OK. Ya!”
“Tang aku mega ngumbai nuan udah ngena YB Efendi Abdullah?” [Ngetu enda lama]
“Aku tau dikangau ke munyi nya, aku tau baka tu, aku tau nyadi sapa-sapa …”
“Nadai guna nuan ringat, anang ringat soh aku”, pia ko penabor berita nya didinga ngayan ke bantah iya.
“Enda, ukai pia, peda nuan, nuan nyau mangkit pekara peribadi aku! Sekali ke aku Efendi bin Abdullah tau ke Amat bin Abdullah tau ke Crocodile bin Abdullah, nya barang ko aku! Baka nya chara kita pengarang berita ngereja pengawa!” Enggau nya iya didinga nembu ke randau sambil nerengik “nadai guna beradau enggau nuan, terima kasih!”
Tebantai
Sarawak Report ulih ngamat ke penerang pasal maioh agi pengari rakyat BN ti bisi ditemu betukar jalai pengarap lalu kami ngelalau bala sida nya patut enggau ati berani madah ke bala pengundi pasal pengarap baru sida nya. Anang malu!