PENERANG-PENERANG TI DILALAI KE BEKAUL ENGGAU PEKARA PENGERAI MENSIA MAIOH DI SARAWAK – PEMATI BALA INDAI TI BENONG SARAT NGANDONG
Sarawak Report udah bisi bulih penerang ti silik bekaul enggau penanggol dalam pengawa ngemata ke pengerai mensia maioh lalu nyengkaum ikas pemati bala indai di dilalai ke ngelama tu.
Bala lutor ti meri penerang soh kami madah ke sida bisi amat pengirau ati ba pansik ti dipejalai ke sida bekaul enggau pengelemi ba pengawa ngemata ke pengerai mensia di menoa tu, taja pan menoa tu endang ditemu kaya ba pengeraja asal. Nitih ke pansik sida nya ikas pemati ba bala indai ti beranak jauh tinggi ari ti direpot ari Opis Pengerai Sarawak, taja pan belanja diagih ke menoa tu jauh mimit ari ti diagih ke soh menoa-menoa bukai di Semenanjung Malaysia!
“Sarawak tu menoa ti enda maioh orang nguan ti diau ngachir”, ko siko ari lutor ti meri penerang soh kami. “Tu meri reti menoa kitai patut diagih ke maioh agi belanja dikena ngemata ke pengerai mensia maioh. Tang perintah BN mengkang neju lalu melakang ke pengidup enggau pendiau orang-orang bansa asal nguan menoa pesisir”
Nadai perengka dikena mantu bala indai ti mar beranak
Report nengah data enggau statistic ti ngasoh kitai tekenyit ati ti nitih ke pekara ti diasai ke bala lutor ti bejalai ke pengawa sida di Sarawak. Siko agi pakar kesihatan bisi madah ke maioh agi bala indai ti benong sarat ngandong ari menoa pesisir enda ulih enda napi pemar maia ti deka ngada ke anak, laban ator-ator ti mudah enda dikirau ke orang-orangorang ti bisi tanggungpengawa.
Ator-ator selamat tu jauh murah ari ti melanja pengawa lutor terebai” ko iya. Taja pan baka nya, ko iya, enti siti-siti pekara nya nadai ulih meri penguntong soh sapa-sapa dalam perintah, pekara ti mudah ti ulih nyelamat ke nyawa endang tentu enda dipejalai ke.
Pakar nya mega meri komen ngenang pasal penyuntok pengidup enggau pemar jalai ti ditengah nya nyadi ke sebengkah tegal ti ngujong ke nyawa bala indai ti benong sarat ngandong. “Bala rakyat nyau majak miskin lalu rega barang enggau minyak motor pan suah niki. Tu deka mai penanggol soh bala indai nya ti deka nurun ke sepital. Enti sema bisi sebarang penanggol nyadi ba maia ti enda disadang, jalai ti jai sereta mar ditengah nya meh nyadi ke tegal sida enda ulih datai di sepital”
Maioh bala pakar kesihatan ti meri penerang soh kami madah ke pemati ba bala indai ti ngandong nya nyengkaum penanggol datai kain ti enda badu-badu, kena rampit penyakit, darah tinggi enggau penanggol-penanggol ti bukai. Penanggol ti baka tu ulih diseliah ke enti bala indai-indai diau semak sepital. Tang meh sida nya diau jauh ari sepital, lalu maioh ari bala sida nya mati di rantu jalai. Penanggol ba kurang bala pakar ba sepital mega nyadi ke ketegal ti nuntong bala indai nya.
Tang bala lutor pakar madah ke data ti dikeluar ke Opis Pengerai Sarawak nya bisi mai penyaru soh orang maioh, ti ngayan ke ikas pemati ba bala indai ti ngandong nya enda tinggi lalu enda ngasoh kitai irau ati.
Data ti meri penyaru runding ari Opis Pengerai nya ukai bepelasar ke pansik ba Sarawak aja, tang ba serata Malaysia tu.
Helikopter ‘ti enda ulih kena nguntong ke orang ti sakit, tang semina meri penguntong soh akaun bank Jabu!’
Bala lutor ti meri penerang soh Sarawak Report endang besalah perintah BN laban peninggi ikas pemati ba bala indai ti ngandong, laban perintah rindu agi nyendia ke perengka-perengka ti mar-mar endor meri peluang soh bala menteri bulih kontrak lalu perengka-perengka nya enda ulih kena nyelamat ke nyawa.
Siko ari bala lutor ti kala kereja enggau raban lutor terebai meri penerang soh Sarawak Report nyebut pasal penyalah ‘makai suap’ ti udah ngujong ke menoa tu ngeluar ke belanja manggai RM90 juta dalam setaun. Ko iya nambah:
“Pengawa lutor terebai tu sebengkah pengawa ti udu masau belanja ti maioh bendar menoa tu. Bilun lutor terebai nya enda muat dikena mai orang sakit ti patut gali dalam bilun, lalu semina numbas endor dua tiga iko lutor enggau bekal ubat-ubat sida. Kami bekejang nitih ke jadual lalu sangkai ba genturong pendiau orang nitih ke maia ti betul, tang ukai ba maia orang ti benong raya sakit beguna ke perubat. Jarang amat kami ulih ngubat lalu nyelamat nyawa orang ti sakit raya. Bilun-bilun ke dikena kami nya semina manah ditepan bala lutor ti gerai-nyamai aja lalu enda manah ke orang ti benong garing-garing sakit lengit!”
Nitih ke penerang lutor pakar ba Sarawak Report ti nyebut, mrah agi enti bala lutor para-medic diengkah ke bekereja dalam genturong mensia maioh dikena mantu bala indai ti benong nganti hari deka beranak, ti lalu ngator pejalai nganjong bala indai nya ke sepital ba maia ti patut. Lutor pakar nya mega nyebut, belanja patut diagih ke perintah dikena melanja bala indai nguan rumah tumpang ba sepital sekumbang ti nganti hari deka beranak ambis kurang dua minggu. Kedua-dua ator tu tentu ulih nyelamat ke nyawa sida indai tu, tang pengawa lutor terebai bedau tentu ulih nyelamat ke nama-nama.
Taja pan baka nya, pakar nya meri siti kebuah Perintah BN suah agi ngenan ke pengawa lutor terebai tu.
“Nya sebengkah penyalah ‘makai suap’. Bala menteri deka berebut ngulih ke kontrak nya! Ninting kali maia sangkai, ungkos belanja ke sebuah bilun manggai RM4,000. Kami sangkai empat kali dalam sari, lalu dalam sari bisi 3 buah bilun sereta bekejang. Kompeni deka bulih bejuta-juta ringgit ba kontrak lutor terebai tu, lalu bala menteri seruran berebut ke kontrak tu lalu deka bulih chara begintir-gintir!”
Sarawak Report udah bejalai ke pansik sapa-sapa ti bempu kompeni ti benong bulih kontrak Lutor Terebai ti dikeluar ke chara tender dalam taun 2009. Ditu kami ulih ngeluar ke penerang orang ti megai share pemadu maioh dalam kompeni nya iya nya Gerald Rentap Jabu, iya nya anak Sapit kepala Menteri Alfred Jabu. Enggau tu kami deka enchabar Jabu nyaut jako dawa bala lutor ti meri penerang soh kami ti madah ke perintah BN udah melakang ke jako penyanding penemu bala lutor nya, lalu semina ngira diri bulih penguntong ari kontrak nya!
Kes Kam Agong
Kepala Menteri Taib Mahmud empu pan bisi mega didinga nyebut pasal menoa pesisir di Sarawak agi jauh amat kurang bala orang ti bekereja ba pengawa perubat. Dalam taun 2008 Taib kala nyebut semina 22.2% aja pengawa puang ba klinik-klinik diisi. Iya mega nyebut sebagi ari tiga bagi rakyat Sarawak nadai bulih pengawa perubat enggau meruan ba dini-dini sepital tau ke klinik. Ba bulan nyin kemari Menteri Besai Najib udah dikemeli ke bala orang laban iya ti udah bejadi sepital di Belaga, semina udah nya nemu sepital nya nadai lutor bekereja dia. Nama reti melanja pengawa lutor terebai ti nadai meri penguntong soh rakyat? Bala sida Kam Agong sebilik, siko indai ti bisi 8 iko anak, ti udah mati beranak untuk nudok ke sebengkah kempen dikena ngemesai ke penyalah ‘makai suap’ ti masau duit belanja rakyat. Bala kaban belayan niang Kam mengkang besalah perintah ketengal jalai ti jai lalu enda ulih sereta enda manah dikena nganjong bala indu ti benong sarat ngandong.
Sida sebilik udah ngayan ke ngagai orang maioh bala orang ti kereja ba 4 buah klinik di serata Sarawak agi kurang kemata lalu penanggol ti baka nya ngujong ke bala indai ti patut bebuntas mati ba jari bala orang ti enda chukop landik. Uji perati ke laman web sida ba http://kamagong.org/ ti endor kitai tau meda ke diri empu. Menoa Sarawak tu endang menoa ti kaya ba pengeraja asal, lalu enggau nya kitai patut nyeliah ke bala menteri ti rangka datai semak pengeraja asal nya!