PENYUMBONG TI TAU MUNOH KEPALA MENTERI!
Sarawak report bisi bulih sebengkah penerang ti tau ngasoh ati tekenyit bekaul enggau Kepala Menteri, ti ngelama tu bentaruh ke nyawa iya terebai dalam bilun ti enda selamat! Tu dijangka ari ketegal penyumbong iya empu ti selalu ngumbai diri nemu semua pekara pasal pengawa nerebai ke bilun, lebih ari bala orang ti endang landik ba pengawa nya. Penyumbong iya nya tau bendar mai penusah soh orang bukai, laban iya udah ngasoh bala menteri kroni iya ngemata ke kompeni penerebai bilun nya.
Kami bisi bulih sekeda penerang ti madah ke berapa bulan dalam taun 2004 suba ti endor Taib enggau sida sebilik enggau bala bakih politik iya suah nepan bilun ti enda selamat nya. Kami mega bisi tetemu ke berapa puchok surat tangkan ti endor bala jurutera enggau juruterbang ti deka madah ke pasal pengerusak ba bilun-bilun kompeni nya, tang jako tangkan sida ti landik nya enda dikibuh ke, ti bepun ari penyaru runding bala orang di bekereja ba kompeni nya.
Enda tentu lama udah bekau 4 buah bilun enggi kompeni Hornbill laboh terempas dalam timpoh setaun, ti udah munoh sepuloh nyawa, nyengkaum siko menteri, lisin dagang kompeni nya pan lalu ditarit.
Bilun iya empu!
Penyalah ‘makai suap’ ti dikena Taib ngulih ke sebuah bilun udah mega digaga ke penerang betulis. Taib ti nyadi Chairman dalam gerempong STIDC udah bempu sebuah bilun. Dalam taun 2004, gerempong nya ti dikemata ke Perintah Sarawak bempu 70% share dalam kompeni Honbill, lalu share ke lebih dipegai Yayasan Sarawak, sebengkah gerempong ti dikemata ke perintah menoa.
Dalam sebengkah penerang ti diterima kami ari ‘orang dalam’ kompeni nya Taib madu kediri nyadi kepala ba kompeni nya ti endor iya bulih lalu bempu sebuah bilun ti berega mar lalu dibayar ngena duit bala pemayar chukai menoa Sarawak. Kompeni STIDC beguna ke bilun engkabang, tang bilun jet endang ditaga ke dikena Kepala Menteri aja, enggau sida sebilik. Bala orang ti bepangkat tinggi ti kala udah kereja enggau kompeni nya madah ke Taib diatu bisi bilun Cessna Citation enggau sebuah bilun engkabang ti disedia ke sepanjai maia. Sekeping chek mega deka dikeluar perintah Sarawak dikena melanja pejalai bilun nya!
Pendiau enggau ulah ti enda ibuh ti tau ngasoh bebadi
Tang, Kepala Menteri ditemu orang selalu deka ngereja pengawa ngena chara iya empu, lalu serimbai enggau nya iya selalu ngumbai diri ulih mutar ke semoa penanggol ke diri empu aja, nyengkaum mutar penanggol ti bekaul penyelamat nyawa mensia. Bala orang ti landik dalam pekara penerebai bilun madah ke kami sida berasai tekenyit udah sida nemu bala pemesai-pemesai ti bempu lalu ngemata ke kompeni nya bala orang politik magang ti enda nemu sebarang kuing penerebai bilun.
Semoa ator ti standard dikena ngemata ke pemanah enggau pengelikun bilun enda tau enda dikereja bala orang ti endang udah bulih pelajar enggau latih ti chukop. Tang Taib enggau bala pengarah dalam kompeni iya milih lalu beguna ke orang-orang politik ti semina ‘tukang anggok pala’ aja. Chairman Hornbill ke diatu iya nya siko orang ti kala kereja dalam bank lalu diatu iya siko orang politik, Aidan Wing, ti ditemu nadai pelajar dalam pengawa penerebai bilun tau ke pengawa ngemata ke pemanah enggau pengelikun bilun. Bala orang ti landik pasal pekara penerebai bilun ti meri kami penerang mega madah ke penanggol kurang penemu nya meh ti udah ngujong ke penusah bilun terempas ti udah nuntong kompeni nya dalam taun 2004 suba, ti mega ngujong ke lisin dagang kompeni nya kena batak pulai baru.
Bilun Taib empu nganti maia ti betemu enggau penusah bebadi
Kami bisi nerima penerang ti madah ke Kepala Menteri suah nepan bilun iya taja pan bilun nya kurang diperesa pemanah enggau pengelikun iya dalam pengelama beberapa bulan. Siko ari jurutera ti kala kala bekereja enggau kompeni nya udah ngelalau bala pemesai dalam kompeni pasal pengerusak ba bilun nya, tang jako lalau enggau jako tangkan iya enda dikibuh ke. Enda lama udah nya jurutera nya lalu diketu ke ari pengawa iya dalam kompeni nya, ti ngujong ke pengawa iya diganti orang bukai ti kurang agi penemu enggau pengelandik. Enda lama udah bekau nya bilun nya bisi udah dianjong ke Singapura ti endor bilun nya diperesa dikena nentu ke pengerusak. Maia nya bala orang ti meresa bilun nya nemu sekeda daun kipas dalam injin jet bilun nya bisi bingkok! Sarawak Report diterang ke, enti pengerusak nya diteju ke lama agi, bilun nya tau naban ke nyawa Kepala Menteri enggau penumpang bukai.
Bila’-bila’ kipas ti bingkok pan enda dikiboh ke bala juruterbang
Kami mega bisi bulih penerang ti madah ke bala juruterbang pan nyau enda ibuh ke bila kipas bilun ti bingkok, laban sida bekereja dalam kompeni nya udah teleba nurut ke sebarang ator bala ke tuai dalam kompeni nya.
Semoa juruterbang ti udah bulih pelajar enggau latih patut nemu pemesai reti pengelikun bilun, tang dalam kompeni ti betuai ke Taib, pekara bekaul enggau pengelikun enda dikibuh ke. Laban Taib empu endang nadai beseling penemu ba pekara penerebai bilun. “Bala menteri nepan bilun, duduk lalu nginsap dalam bilun, lalu bala juruterbang enda berani ngerara sida ti nginsap nya, taja pan bala sida ti palui nya duduk nyandih ba tangki minyak bilun nya”, pia ko tusi siko orang ti meri penerang soh kami.
Taib sebagai pentadbir
Taib ke tuai dalam kompeni
Tambap sereta jugau meh Taib enggau kompeni nya ti udah melakang ke penemu enggau runding bala jurutera enggau juruterbang ti landik ti seruran nguji deka ngerara penanggol ti ditapi kompeni nya. Penambap enggau penyugau ti baka tu meh tau ngujong ke Taib empu tau bebadi.
Diatu kompeni Hornbill benong didawa dalam court ngelaban siko ari pegawai eksekutif ti udah badu enggau sida, Asharat Ali, laban Asharat madah ke diri udah dipelakang ke enggau chara ti enda asi, udah bekau iya nguji deka ngemetol ke pengawa ngemata ke kompeni nya. Kes nya deka didinga ke baru dalam bulan May tu ila.
Kepala Menteri udah ngujong ke menoa Sarawak ngeluar ke belanja bejuta-juta ringgit dalam setaun ba sistem pemindah ti baka tu. Diatu iya mega ditemu bempu sebuah bilun Cessna Citation ti berega USD19.5 juta lalu bilun ti bansa nya sebuah bilun ti pengambis mar dalam dunya tu, ti semina ditaga ke dikena iya enyyagu sida sebilik aja.
Udah tu ila, Taib disadang deka meli sebuah da agi bilun ti manah agi ngena duit bala pemayar chukai menoa Sarawak, nengah kompeni Hornbill enggau gerempong STIDC. Tang runding enggau penemu iya diatu nyau udah alah laban pengingin iya ti seruran deka nambah ke pengaya iya empu enggau sida sebilik. Ba taun 2004 suba, orang tuai tu nyau deka bebadi ditaban ke bilun iya empu.