POLIS MAMPUL MULUT BARU BIAN – VIDEO EKSKLUSIF!
Diatu terang bendar meh Kepala Menteri Sarawak, Taib Mahmud enggai ngena ator demokrasi kejang ti napi pengawa ngundi ti deka diator enda lama agi. Sarawak Report bisi nerima video enggau penerang ti bukai ti endor bala polis udah diasoh nagang kepala penyakal PKR Baru Bian bejako ba moa mensia maioh di pelilih menoa iya empu. Kami mega bisi bulih penerang baka ni Taib udah ngeluar ke ator ti terit ti endor polis enda diasoh ngeluar ke pemendar (permit) ngagai sebarang parti penyakal ti deka ngator pengawa begempuru lalu bejako ba moa orang maioh!
Apin lama tu udah penanggol ti baka tu udah diasai ke seraban parti PKR ti betuai ke Baru Bian, iya nya di pelilih menoa Lawas, Sarawak. Bala kaban parti PKR enggau bala penyukong sida bisi datai ngulu pengawa begempuru ba kedai kopi Sin Yang ti endor bala orang nya dijamu makai malam. Bala orang ti datai kia deka ninga ke pesan enggau berita ari raban PKR lalu nyadang deka mai pesan pulai ke rumah diri udah nya. Endang baka selama, sebedau sida ngator jako randau ba moa orang maioh sida dulu minta pemendar ari orang ti bekuasa (baka polis), tang baka selama mega, pemendar begempuru endang enda diberi ke sida
“Bala polis mengkang enda ngasoh kami begempuru dia. Sida nadai meri kami nama kebuah kami enda tau begempuru”, pia ko Paul Bian, siko Pengator Kempen ke Baru Bian.
Kami nerima ator ari atas!
Raban PKR madah ke sida nadai chara bukai, tang mengkang nerus ke pengawa begempuru nya. “Enggau chara ti nagang kami begempuru sida udah enda bebasa ke hak-hak demokrasi kami”, pia ko Paul nambah, iya nya menyadi Baru Bian empu ti mega nyadi pangan lawyer Baru ba niri ke hak pengelantang pendiau mensia. Paul nambah:
“Hak kami udah enda dibasa sida. Menoa tu menoa demokrasi lalu tetiap iko rakyat di menoa bedemokrasi baka tu bisi hak meri tudoh penemu diri empu lalu bisi hak begempuru dikena ngenatai ke berita ti enda ulih dikenatai ke kami ngena chara bukai. Kami ti raban penyakal tu endang nadai diberi peluang ngayan ke diri enggau penemu kami nengah sebarang media baka suratkabar, radio tau ke TV”
Baru Bian ti kala udah ngeruga penegap kuasa Taib Mahmud bekaul enggau beberapa iti kes bechara ke penyarut tanah NCR ti endor iya ngari ke bala orang asal, semina ngasai ke diri udah alah ba pengawa bepilih taun 2006 suba, ti endor iya semina alah 200 iti undi aja. Leboh maia nya Baru Bian udah mungkal sebengkah prosiding ti endor iya ngerintai ke maioh penyalah BN ‘makai suap’ enggau bebeli ke undi. Tang bala akim ti ninga ke prosiding iya nya udah nulak kes nya lalu madah ke kes nya bisi ‘penanggol-penanggol teknikal undang-undang”.
PKR udah ngasai ke Baru Bian patut dikemendar ke bejako ba moa mensia maioh dalam pelilih menoa iya empu. Ba penemu bala pengereja pengawa kempen ke PKR, Taib Mahumd udah ngena chara ti kamah ti endor iya salah-guna kuasa raban polis ba pun pengawa bepilih ti deka datai enda lama agi, ti mega nunjok ke Taib udah bisi penangi enggau penakut ke menoa Sarawak tu ti mupok-mupok angkat ngelaban iya. Kuasa sepengelama 30 taun iya udah mai pengeraja ngagai iya enggau sida sebilik, tang udah mega mai penyeranta soh bala rakyat iya empu ti dirampas iya menoa ti endor iya ngulih ke kayu enggau numboh ke kebun sawit bedandang besai.
Pengawa begempuru ti chelap udah dikeruga raban polis
Bala saksi ti ngemata sereta ngulu gempuru nya madah ke bala penyukong PKR ti datai ngagai endor nya bisi datai sebedau pukul 7.00 malam. Maioh agi orang ti datai ari jauh menoa nya laban deka ninga ke penemu enggau penerang pasal parti. Gaya hari ti enda manah sari nya lalu pia mega gaya jalai ti jai enda nekul sida ngulu pengawa nya. Nitih ke sebengkah agi penerang ti diterima Sarawak Report, bisi mega sekeda ari sida nya ti kurang agi penatai-pemisi endang udah undor ke pasar Lawas sari dulu ari nya laban endang deka ninga ke Baru Bian bejako, lalu sida nya bemalam di sebelah kaki lima ba pasar Lawas dia.
Ba urong pukol 7.15 malam nya, nitih ke penerang ari raban PKR, dia seraban polis datai ngagai endor nya. Bala saksi mega madah ke polis nya bisi 20 iko ti ngena gari polis lalu kira-kira 10 iko ari opis Special Branch ti ngena gari biasa. Penatai raban polis di endor nya udah ngenendu ke semengat bala orang dia, lalu bisi sekeda bala orang ti dia mupok-mupok nyurut ke diri ari endor nya. Paul Bian bisi nerang ke tusun pengawa sida malam nya deka belaboh mandang ke video ngagai orang maioh – sebengkah video pasal Baru Bian sereta enggau julok ati PKR ke ditaga ke diator ke menoa Sarawak ila. Tang raban polis udah dulu agi nagang Paul mandang ke video nya.
“Bala kami serebana minta pengawa tu diterus ke, laban kami nadai chara bukai endor madah ke julok ati parti soh bala penyukong kami. Kami nadai diberi peluang ngayan ke diri ba media suratkabar, radio tau ke TV, nama kebuah sida (polis) nya nagang kami ngayan ke video kami tu?” pia ko Paul. “Kepala raban polis nya bisi ngayan ke penyinu ati ke bala kami, tang iya mega nerang ke ngagai kami iya nerima ator ari “orang atas”! ti dipelaba ke kami, sekali ke ari Kepala Polis, tau ke ari bala boss sebengkah parti politik”.
Nitih ke perambu pengawa ti dipadah ke Bian, pengawa begempuru disadang endor tiga iko orang ti dipadu ke bejako lemai nya. “Aku udah minta siko Tuai Raban Bansa, Pemancha Jenging Anak Radin, ti udah ngeleka ke diri ari BN udah iya meda tanah NCR diri kena ambi BN, ti udah nya lalu deka ditangkan ke lawyer hak tanah NCR, Abun Sui, ti kala udah menang kes penyarut tanah di menoa nya, lalu ke penudi Baru Bian deka mansut ke jako”. Tang ketegal kena tekan ke bala polis dia Paul Bian lalu ngemuntang ke pengawa lemai nya lalu semina ngasoh Baru Bian aja bejako.
Ditagang
Ba video kami ti dipandang ke ditu, Baru dipeda ditapat ke bala polis ti “ngengkah ke jari sida ba bau iya”. Bisi dua iko polis ari sepiak-sepiak iya ke bediri dia. Bala polis nya madah ke Baru Bian iya “enda tau bejako”. Bisi sekeda ari bala penyukong madah ke pengawa ti tejanggal nya ngujong ke bala orang berasai takut laban bala mensia maioh ti dia nyau majak ringat ngagai bala polis.
“Bah! Kitai tu maioh tuboh, kitai ulih ngelaban sida (polis) nya, 30 besaup ke siko!” pia ko panjong siko ari bala penyukong dia. Enggau nya, baka ti ayan ba video nya, Baru Bian lalu ngena pemutus iya empu ngerara bala mensia maioh. Baru Bian udah mujor mujok bala orang ngambi ke besabar lalu sida patut mereti ke pengawa polis ti bejalai ke undang-undang. Enti pengawa begempuru lemai nya enda betuai ke Baru Bian, penyarut tentu deka nyadi lalu enda ulih tagang, ari ketegal dikachau bala polis.
Udah nya bala orang lalu diasoh mulai ke diri udah bekau hak demokrasi sida ti deka mending ke jako penerang ari pengari PKR ti endang datai ari menoa nya empu kena tagang.
Beserimbai enggau nya, kena 5 haribulan March tu ila, parti PBB ti betuai ke Taib Mahmud deka ngempuru ke 5000 iko mensia ba Borneo Convention Centre di Kuching, lalu kitai enda berasai alit ati laban parti BN tentu bulih pemendar (permit) dikena sida begempuru! Sarawak Report mega deka nyadang bala orang ti diasoh bejako maia nya ila tentu enda nyebut seleka jako pasal penyalah ‘makai suap’ maia ngaga Borneo Convention Centre nya, ti udah bulih kontrak ari Kepala Menteri empu, dikereja kompeni PPES Works, sebengkah kompeni ti nyadi “tukang” ba kompeni indu, CMS ti endang enggi sida Taib sebilik!
Kepala bala pengarah dalam CMS nya anak lelaki Taib empu, Mahmud Abu Bekir Taib ti mega pemegai share pengambis maioh dalam CMS. Nyentok ke ngagai maia iya parai suba, semoa share iya dipindah ngagai indai iya, Laila Taib. Laki Laila, iya nya Kepala Menteri ditemu suah bendar nyerah ke kontrak besai-besai ngagai CMS dalam pengelama 30 taun ti ngujong ke share kompeni CMS niki enggau ngenyit semina dalam beberapa bulan aja, laban ti deka belaba ke duit deka maioh agi datai dikena numboh ke projek SCORE!
Nitih ke penemu bala PKR, pengawa anti-demokratik ti dikereja perintah BN ba pengawa ngeluar ke pemendar udah terang bendar ngayan ke perintah nya bemata adat. “Bala orang ti datai ngulu pengawa gempuru kami nya ukai takut, tang sida nya berasai ringat sereta pedis ati”, pia ko Paul Bian. “Penanggol ti baka nya kemari udah muka mata orang maioh, lalu penanggol nya pait bendar ba sida. Sepengudah penanggol nya kemari Baru Bian nerima maioh bendar peminta ari bala penyukong ti ngasoh iya ngator pengawa begempuru ba genturong pendiau sida di pelilih menoa nya. Ko sida, ‘datai ngagai menoa kami, kami ka ninga nuan bejako’. Penanggol nya kemari udah ngujong ke bala mensia maioh di endor nya nyadi berani agi angkat ngelaban ator perintah ti bechiping enggau parti-parti politik ti enda sejalai enggau sida”.
BN deka mereti agi, enti sida majak ngemedis ati mensia maioh ba siti endor ngundi, nya ukai runding ti betul dikena ngulih ke pemenang ba pengawa bepilih. Orang maioh diatu deka ngumbai BN udah ngayan ke penakut sida ngagai kepala parti penyakal nya, ari pengawa sida ti nagang mensia maioh ninga ke iya bejako!