Pansik raban ari opis MACC ke atas Taib Mahmud udah ngayanka sekeda pemujur ba pengawa dagang iya di mayuh menua di dunya tu.
Bala orang ti kempen ngelaban penyalah nipu duit diatu minta perintah Germany mekuka semua pengeraja Taib ti disimpan dalam bank ti pemadu besai di menua nya, Duestche Bank. Pengawa tu neladan jaku gerah ari perintah menua Swiss ti deka mansik semua pengeraja Taib nya.
Ba sebengkah randau enggau bala pemberita bisi tiga bengkah NGO menua Eropah bisi nunjukka mayuh bendar sempekat dagang entara kompeni-kompeni Taib enggau Duestche Bank ti beungkus bejuta-juta lalu bekaul enggau mayuh bansa pengawa di menua tasik. Naka repot tu ti ditulis, Kepala Menteri mengkang enda ulih meri saut besereta penerang ti betul baka ni lalu ari ni penatai pengeraja iya enggau sida sebilik nya.
Kompeni SOGO Holdings Limited
Diatu Sarawak Report mega ulih meri penerang pasal kaul entara Deustche Bank enggau pengawa ti ngemataka reta sida Taib sebilik di menua US, nengah sebengkah kompeni ti benama SOGO Holdings Limited ti bepalan ba pulau Jersey.
Dalam repot kami ke dulu-dulu agi kami ngayanka baka ni Taib empu, sama enggau dua iku anak lelaki iya, anak tuai iya ke indu enggau dua iku ari sida menyadi lelaki iya udah dirintaikan nyadi raban pengarah enggau pemegai share dalam kompeni sida, Sakti International. Kompeni sida nya dikematakaka menantu Taib empu iya nya Sean Murray sereta mega beempu mayuh reta di US ti beungkus bejuta-juta dollar. Kami ulih meri penerang nya reta tu dikemataka sebengkah kompeni di menua tasik.
Sekeda ari surat-surat ti bisi udah diayanka Ross Boyert, ti udah mati dibunuh, ti kala nyadi pengurus kompeni Sakti ti dulu suba, ngagai Sarawak Report, bisi ngayanka baka ni tukuh raban sida ti ngemataka semua reta dia. Dalam surat Ross Boyert, maya iya agi idup, ti ditujuka iya ngagai Kepala Menteri, iya udah ngerintaika semua macham penerang pasal kompeni nya ti diberi menantu Taib, Sean Murray,lebuh maya iya baru interbiu deka bekereja ba kompeni nya. Sarawak Report mega bisi bulih dokumen penerang ti nyebut pasal Sogo nya ditumbuhka di Hong Kong dikena ngemataka reta-reta bala orang ti kaya-kaya, lalu mega ngarika kandang menua Asia. Udah nya Sogo dipindahka endur ari Hong Kong ngagai Jersey udah bekau Hong Kong merintah diri dalam taun 1997. Udah nya tanggungpengawa diambi Deustche Bank International dalam taun 1998, sama-sama lalu ngemataka reta sida Taib sebilik di Jersey ulih SOGO Holdings Ltd.
Semua surat penerang nya ngamatka Rahman Sulaiman Taib nya endang nyadi Presiden ke kompeni Sakti lalu mega orang ti bekaul enggau pemindah nama pengempu ngagai SOGO Holdings.
Niang Ross Boyert mega bisi ngayan ngagai Sarawak Report sebengkah kaar ti dulukis Rahman empu, iya nya anak kedua Taib Mahmud, baka ni chara iya deka mindahka pengempu Sakti ngagai sebengkah kompeni di menua tasik. Kaar nya mega bisi ngundan enggau silik penerang pasal bank ti dipaduka ngemataka semua reta nya lalu mega agi mengkang bepalan di Hong Kong.
Dawa iya dalam taun 2007 ketegal ti diketuka bekerja bisi udah diengkahka ba Mahkamah Tinggi di California ngelaban sida Taib sebilik.
Dalam surat-surat penerang ti dianjung sida nuju Chancellor menua Germany minggu tu tadi tiga bengkah raban NGO bisi ngerintaika mayuh kaul dagang ti ditumbuhka entara Deutsche Bank enggau sida Taib sebilik.
K & N Kenanga Holdings, sebengkah kompeni beranakka puku nya kompeni ti pengabis mayuh puku dalam Deutsche Bank Asia lalu kompeni CMS enggi sida Taib bisi share datai ke RM611 juta enggau RM2.4 juta ba perengka sida. Kompeni Kenanga Deutsche Futures bisi RM387 juta ba perengka.
Raban-raban NGO nya mega ngayanka kompeni-kompeni Kenanga dikemataka sebengka komiti nyengkaum bala pemesai ari CMS enggau Deutsche Bank. Kepala Pekara Belanja CMS, Richard Curtis, menantu Taib iya nya Syed Ahmad Alwee Asree sama-sama dalam komiti besai K & N Kenanga Holdings, sama-sama enggau Raymond Yeoh Cheng Seong ti nyadi Kepala Operasi di Malaysia ke Deutsche Bank.
Dalam majalah Business Week, profail Raymond Yeoh ngayanka iya bisi kaul dagang enda kurang ari 37 bengkah enggau Syed Ahmad lalu 25 bengkah enggau Richard Curtis, rapit bendar kaul entara dua bengkah kompeni nya! Raban NGO nya deka nemu nama kebuah, Deutsche Bank nya, belalauka undang-undang dagang entarabansa, ulih ngaga kaul dagang enggau raban orang diri sebilik ti bisi pengeraja ke enda patut-patut nya?
Taib udah nerangka baka ni iya deka madahka pasal pansik ti dipejalaika MACC ba atas pengawa iya. Dikena iya ngemuaska ati bala orang ti mantah iya, iya enda tau enda madahka baka ni iya, sida sebilik tau bulih pengeraja kelas dunya semina bepukuka gaji Kepala Menteri iya nya nitihka pematut ba undang-undang.