Ba pun minggu nyin kemari kami bisi udah ngayanka baka ni MP parti BN Perintah Besai ari sitak Baram, Jacob Sagan, udah dibeli ngena beberapa iti konsesyen ngulihka kayu kampung enggau kontrak pengawa beungkus beratus-juta ringgit ngambika nyukung perambu enggau pengawa Taib ngampuhka kandang menua raban bansa iya empu ngena projek tekat hidro ti besai.
Sepengudah 30 taun bala YB enggau Datuk ari parti BN ti kaya-raya seruran nangkan raban orang ti seranta di Sarawak, ngasuh sida ngenatka sereta enda besebana ke pengidup enggau pendiau sida.
Ambi ke banding, raban sida Tiong sebilik ari menua Sibu, ti betuaika Datuk Tiong Hiew King pengerusi kompeni Rimbunan Hijau. Tiong udah nerima mayuh bendar konsesyen ngulihka kayu kampung ari Taib Mahmud ti ngujungka iya nyadi siku ari orang ti pemadu kaya di dunya tu, nitihka penerang ari majalah Forbes ti bepalan di menua Amerika.
Raban sida Tiong sebilik nya udah ngena pengeraja nya ngemesaika agi dandang kebun sawit, ngena konsesyen ti diberi Taib Mahmud, lalu pia mega sida ngulihka kayu di menua tasik, ti udah ngujungka mayuh kampung di menua tasik kena keruga.
Datuk Tiong mega bekuasa atas perengka pengerembai berita, nyengkaum suratberita jaku China di Sarawak (Sin Chew Daily, Nanyang Siang Pau, Guan Ming Daily), ti mega nyadi ke sebengkah chara ngerembaika berita enggau mudah agi!
Menyadi Tiong Hiew King ti biak agi, iya nya Datuk Tiong Thai King masuk pengawa politik. Ba kes mahkamah ti bedau lama tu udah, bisi malut Datuk Tiong Thai King, udah ngayanka baka ni chara bala YB ari BN ngena kuasa menteri sida berampaska tanah enggau konsesyen dalam sitak menua ti diarika sida empu
Dalam taun 1997 seraban orang asal udah mantaika sebana sida madahka kompeni Rosebay Enterprise Sdn Bhd bisi tama lalu ngeruga tanah kampung NCR sida laban deka muka kebun dandang besai sawit.
MP Tiong Thai King enggau Chairman Sibu Municipal Council (SMC) mengkang enda ibuhka jaku sebana ari raban orang asal nya, laban sida nyukung pengawa kompeni nya.
Lawyer Baru Bian udah nyaman opis Lands and Survey, Perintah Menua Sarawak enggau kompeni Rosebay Enterprise laban sama bisi bekaul ngeruga tanah kampung NCR raban bansa Iban ba endur nya.
Diatu raban orang asal di menua nya mengkang nganti bayar pampas ke pengerusak kampung NCR enggau pendiau sida.
Nyerumba nya mega kita deka nemu sapa bagi orang ti ngempu kompeni Rosebay Enterprise Sdn Bhd nya.
Kompeni Palmgroup Holdings nya sebengkah kompeni beenterprise ti diempu sida Tiong sebilik ti endur mayuh agi share dipegai kaban MP Tiong Thai King sama enggau kompeni Fatherland Sdn Bhd. Kompeni Rosebay Enterprise nya siti kompeni ti mit ti sama ampit konsesyen ngeruga rampa kampung ti besai bepukuka ungkus ti murah bendar. Opis Lands and Survey bisi surat-surat penerang bekaul enggau pengawa tu. Kami mega bisi bulih penerang ti ngayankan raban sida Tiong sebilik nya kala meli kandang menua ari Taib Mahmud sebilik ti ngujungka sida nya nambahka pengeraja sida.
Baka nya mih chara pengeraja datai ngagai raban YB baka sida Tiong ti nyadika upah sida taluk ke Abdul Taib Mahmud. Tang, penguntung ngagai raban orang bansa asal ti endang beempu menua kenyau ari beratus-ratus taun enggau berapa serak tubuh nya, nadai nyengala dipeda sereta nadai udah mansutka sida ari tanggam penyeranta.