Sebengkah program televisyen Dateline Australia, iya nya Last Frontier, udah ngeluarkan sebengkah repot pasal sekeda pekara ti bisi kaul enggau pekara mensia mayuh udah muka pending enggau mata orang mayuh di menua Tasmania enggau mega di Sarawak.
Last Frontier udah mansik enggau silik pasal polisi-polisi perintah ba menua-menua ti bisi kaul enggau penusah ti nuntung pengidup beribu iku orang asal lalu mega ti nuntung sistem rampa menua ba teda kampung puang di menua-menua nya.
Disimpulka enggau jaku pandak, Dateline udah mujur mansik perambu atur perintah menua ti deka ngampuhka kandang menua ti besai di menua Sarawak ngena 12 buah tekat hidro kuasa elektrik ti tentu deka ngerusak rampa menua lalu ngujungka orang bansa asal deka dipindahka ngagai palan-palan pengentap pendiau ti baru.
Program TV nya udah nya lalu ngayanka repot ti madahka perambu projek tekat hidro di Sarawak nya bisi kaul enggau pengawa ngulihka kayu batang di menua Tasmania ti dikereja kompeni kayu batang Ta Ann, ti kala udah ngasuh raban orang ti rinduka pemanah rampa menua balat ringat.
Enggau nya, stesyen TV Dateline udah bejalaika pengawa iya ngayanka repot ti bendar pasal pekara ti benung nyadi diatu lalu pengamat berita nya endang tinggi sereta enda ulih disangkal sapa-sapa.
Tang, kompeni besai ti bisi dikenang dalam program nya, Ta Ann, ti megai indu lisin ngulihka kayu batang enggau lisin muka kebun dandang besai sawit di menua Sarawak enggau kompeni Hydro-Tasmania ari menua Tasmania ti mantu menua Sarawak ngaga tekat hidro, enda rindu sereta besetujuka pansik enggau program nya ditabur ba program TV, laban program ti bansa nya dikena ngelaban sereta mantah pengawa sida.
Sepengudah program nya diayanka nengah TV, sida nguji deka nyekat berita nya diayanka di menua Malaysia, ti endur mayuh gambar udah dikeluarka laban enggaika ngerusak pemanah nama kompeni dua bengkah nya, lalu pia mega pemanah nama perintah Sarawak.
Enggau agih jam ti chukup endur ngayanka program nya, mayuh jaku randau pengarang berita enggau bala pemesai-pemesai dua bengkah kompeni nya diayanka. SBS patut enda ibuh nyaut kes ti bekaul enggau jaku randau ti diayanka nya.
Agi mega, repot berita nya endang digaga nitihka pansik pengarang berita, ti endur kompeni Hydro-Tasmania bulih pengawa mantu menua Sarawak ba projek ngaga tekat hidro elektrik ti deka ngerusak rampa menua di Sarawak, lalu Ta Ann mega udah ditemu ngerusak rampa menua enggau kampung ti besai di Tasmania.
Program TV nya mega udah ngayanka baka ni Chairman enggau pemegai share pemadu besai dalam kompeni Ta Ann, iya nya Abdul Hamed Sepawi (ti mega petunggal ke Abdul Taib Mahmud) mega bekereja nyadi Chairman dalam kompeni Sarawak Energy Bhd, ti meri pengawa ngagai kompeni Hydro-Tasmania di menua Sarawak.
Stesyen TV Dateline udah mansutka berita tu, lalu sida nejuka bala protagonist rampa menua bejuraika sereta berandauka.
Tang kelimpah ari ti mutarka ‘penanggul’ ngena chara ti selalu dikena ngelama tu, Chairman David Crean ari kompeni Hydro-Tasmania udah ‘nyingkang jauh agi ke mua’.
Utai ti ditemu Chairman SBS, nya kompeni Hydro-Tasmania nya sebengkah kompeni ti udah mayar iklan ti diayanka ba stesyen TV sida, ti baru nerima iklan ti patut diayanka ba ninting jam perdana stesyen nya. Kami kala udah nuliska repot pasal Chairman David Crean ti nemuai ke menua Sarawak ba pun taun tu lalu betemu enggau Menteri Perambu menua Sarawak Awang Tengah, ti endur iya meri penemu pasal chara ngatur pengawa baum ke gerempung pengeluar kuasa hidro entarabansa! Kitai patut nemu, kebuah ti bendar endur David Crean ti mansutka jaku serebana iya ngagai stesyen SBS nya, madahka tanggungpengawa Hydro-Tasmania di menua Sarawak semina meri penemu, lalu program ti diayanka stesyen SBS nya udah ngerusak pemanah nama kaul dagang nya.
Tang diatu David Crean udah meri penemu iya ngagai Awang Tengah pasal chara nyaga pemanah nama maya ngatur aum besai entarabansa nya ti endur menua Sarawak deka dikelala nyadi menua pengeluar kuasa elektrik hidro pemadu besai di dunya ba taun-taun ti deka datai ila.
Beserimbai enggau nya, kompeni Entura udah mansutka penerang ti madahka sida ‘benung ngerapitka kaul’ enggau menua Sarawak. Bakih David Crean, Kepala Pemesai Eksekutif Hydro-Tasmania, Roy Adair, udah mega mansutka penerang ti madahka menua Sarawak udah nyadi kaban Gerempung Pengeluar Kuasa Eletrik Hidro Entarabansa (IHA) (ti endur kitai orang biasa tu ulih mega nyadi kaban enti kitai udah mayar £3,000 aja) nya beguna bendar ba dagang. Agi mega kompeni Hydro-Tasmania rindu bendar madahka diri seruran bekereja belalauka standard kereja sida nya entara ti pemadu tinggi di dunya!
Kami mega kala nuliska repot ti madahka Hydro-Tasmania ngaga kaul dalam projek ngaga tekat hidro di menua Sarawak dua taun SEBEDAU Taib Mahmud berunding deka mayar £3,000 masuk nyadi kaban dalam IHA ti enda beguna nya. Utai ti ngasuh alit ati nya, seminggu udah Sarawak nyadi kaban dalam IHA, dia Pemesai Eksekutif ke kompeni Sarawak Energy Bhd ti begaji besai ari patut, ari menua Norway, Tortein Dale Sjotviet lalu ditikika pangkat nyadi CEO dalam kompeni SEB nya! Lalu pia mega beberapa bulan udah nya palan BCCK di Kuching (ti enggi menyadi indu Taib, Raziah Mahmud ti korup nya) deka nyadi tuai pengawa ngatur aum besai entarabansa nya!
David Crean endang bisi bendar pengerindu lalu majak meri penemu ngagai Awang Tengah. Agi mega, sepengudah kompeni iya, Entura ngaga kaul dagang enggau menua Sarawak, kompeni nya udah mujur bulih untung ti mayuh. Penatai pemisi Hydro-Tasmania endang bepelasarka pemerinsa raban orang bansa asal Sarawak. Baka ni David Crean ti udah nulis surat bantah ti madahka kompeni iya enggau kompeni Ta Ann enda direpotka dalam berita enggau chara ti enda besiping? Sekali ke stesyen TV SBS deka angkat lalu mantah surat serebana David Crean nya tauka agi nundukka bayar iklan iya ba program TV sida?
Enda! Stesyen SBS udah ngaku penyaru diri lalu nunduk. Chairman SBS udah nulis surat minta ampun ngagai David Crean ti endur sida madahka Crean sida udah saru ngayanka berita ti enda betul bekaul enggau dua bengkah kompeni ti bisi bekaul enggau pengawa ngulihka kayu batang enggau ngaga tekat hidro di Sarawak!
Ditu, Sarawak Report ulih meri jamin ti madahka Chairman SBS ti minta ampun ari David Crean nya endang nadai udah macha isi laman web kami tu lalu meresa semua penerang ti diayanka kami ditu ti bisi bekaul enggau penyalah makai suap, ngelanggar atur pengelantang mensia enggau penyalah ngerusak rampa menua.
Kami mega deka nemu sekali ke penerang ti dituliska kami ditu dikumbai Chairman SBS ti minta ampun ari David Crean nya enda betul lalu enda asi? Agi mega Repot Taun ti enggi Hydro-Tasmania empu endang madahka anak kompeni sida, Entura, udah mansang ba tanggungpengawa sida di menua Sarawak. Pia mega siku ari pengereja pengawa sida, Andrew Pattle, udah ditikika pangkat nyadi “pengurus projek” ba projek tekat hidro Murum lalu mega nyadi Pengurus Kanan Projek ke tekat hidro Baram enggau Baleh.
Nya alai, kami deka betanya baka ni pemendar bala pengarang berita sida ngiga penerang ti amat, sebedau Chairman SBS nya nulis surat minta ampun ti dikena ngenyamaika ati orang ti mayar iklan ba stesyen TV sida?
Bala pemacha enggau peninga berita di menua Australia enda tau enda beratikia enggau silik ba berita pasal pekara ti benung nyadi.
Enggau chara ti ngalahka diri ba pekara tu, kompeni Ta Ann enggau kompeni Hydro-Tasmania udah ngaku negereja pengawa di menua Sarawak enggau Tasmania nya ‘enda salah’. Sida mega minta program TV nya enggau berita dikeluarka ari sebarang endur iya udah diayanka, nyengkaum ari laman web SBS empu lalu dilabel nyadika berita ti enda betul!
Diatu kompeni bukai ti pintar (di luar menua Tasmania enggau Sarawak) udah nemu chara dua bengkah kompeni nya beduan stesyen SBS lalu mega beduan mensia mayuh ti deka nemu berita ti bendar, laban diatu nyau bisi internet ti endur orang ngiga penerang-penerang enggau jampat dikena ngayanka pengawa salah sida nya!
Enggau keruga ari kompeni Hydro-Tasmania enggau Ta Ann nya, Last Frontier ari Dateline udah nyadi sebengkah ‘filem ti enda patut dipeda dunya’. Dalam taun 2006 suba, Menteri Besai Tasmania, Paul Lennon udah ngelaluka penama kompeni Ta Ann ngambika muka dua buah kilang kayu ti deka ngena asil kayu ari kampung di menua Tasmania.
Perintah Tasmania mega udah ngeluarka sabsidi $8 juta dikena mantu ngaga dua buah kilang kayu nya lalu arapka duit agih nya dibayar ngena chukai ulih ari kilang nya.
Beserimbai enggau nya bala pengarang berita udah beratika dua buah kilang kayu nya digaga ba kandang menua ti bisi kaul politik enggau Ta Ann. Sebuah digaga ba sitak bepilihbesai Menteri Pengeraja Menua ti dulu suba, Bryan Green (ti diatu nyadika pejuang politik ke kompeni Ta Ann ti kala udah ngemulaka bala penguna asil kayu sida datai ari kayu ‘mesra alam’).
Agi mega tuai Green Party ke dulu suba, orang politik veteran Bob Brown udah mantah kontrak Ta Ann ti ditanggam sida enggau stesyen TV Dateline, laban nitihka penemu iya, kelimpah ari ti ngulihka penatai pemisi ke Opis Kampung Tasmania, Ta Ann mai bejuta-juta dollar pansut ari menua nya, enggau chara nebang kampung ti patut dijaga sida.
Beserimbaoi enggau nya, Bryan Green udah dipaduka nyadi pengari Ta Ann, udah kompeni nya dipadahka ngemulaka bala penguna asil kayu sida datai ari kayu ‘mesra alam’ ti datai ari kayu tanam! Ditu, sekali agi kami deka nanya Bryan Green, sapa orang ti mayar tambang iya mindah kin kitu nyadung jaku iya nya?
Bala pejuang pemanah rampa menua di Australia endang ngumbai penatai kompeni Ta Ann ke menua nya endang dikena iya ngemanahka nama diri laban bepelasarka nama menua Australia ngambika asil kayu sida diterima entarabansa, ti mega lalu dikena ngalahka pemanah nama kompeni kayu bukai di menua Sarawak. Kontrak Ta Ann mega mai pengerusak rampa menua di Tasmania.
Program Last Frontier dalam Dateline udah ngayan ngagai bala orang di Australia pasal utai ti endang amat-amat nyadi di Sarawak ngagai menua bukai.
Mayuh agi orang di Australia agi ngumbai rampa kampung puang di menua Sarawak agi besai lalu bedau ditegu, lalu sekeda ari sida endang enda kala ninga berita pasal menua Sarawak bekaul enggau pengamu Taib Mahmud ti ngereja penyalah makai suap, ngerampas tanah orang bansa asal, ngulihka projek besai-besai ke sida sebilik, merambu deka ngampuhka rampa menua ngena projek tekat hidro lalu mega meri lisin nebang kampung enggau bebukaka kebun sawit bedandang besai ke sida sebilik.
Nya alai, diatu betul bendar ba maya iya, pengarang berita David O’Shea ti udah kiruh bendar ngulihka berita pasal utai ti benung nyadi di menua Sarawak sebedau iya mansutka penemu diri dalam program nya ngagai bala orang di Tasmania, ti endang bedau ngelala pengawa ti dikereja kompeni Ta Ann Tasmania enggi petunggal Taib Mahmud, Hamed Sepawi, di menua Tasmania.
Repot ari David O’Shea nya udah mujur ngayanka kompeni nya ti ngaku nyadi sebengkah kompeni pengeluar asil kayu ‘mesra alam’ di menua Tasmania, ke bendar bejalaika pengawa ngeruga rampa menua enggau pengidup raban orang bansa asal di menua Sarawak.
Kompeni Hydro-Tasmania bisi bendar pengarapka bala orang ti meda berita pasal sida nya enda nemu pasal pengawa salah sida enggau kaban dagang sida, Taib Mahmud, ti benung merintah menua Sarawak, tauka baka ni Taib Mahmud nirika petunggal iya empu nyadika pengari iya ba mayuh pengawa dagang sida sebilik (siti ari dagang nya ba kompeni Sarawak Energy Bhd) lalu berebak enggau nya baka ni Taib meri Hamed Sepawi lisin kampung enggau lisin dikena muka kebun dandang besai sawit enggau mega kontrak-kontrak bukai ti besai-besai.
Dateline udah mujur bejalaika pengawa lurus sida ngayanka baka ni Hamed Sepawi dalam Ta Ann udah ngena penuduk iya dalam Sarawak Energy Bhd, ke bendar iya udah mai masuk kompeni Hydro-Tasmania nyadika penyanding penemu ngaga 12 buah tekat hidro di menua Sarawak nitihka perambu Taib Mahmud.
Ba senentang ni dalam berita nya ti ngayanka kompeni Hydro-Tasmania nya besai agi guna dalam projek-projek nya? Pia mega, sekali ke kompeni Ta Ann Tasmania udah bebendar nyeliahka chairman sida ari kena tuduh ngereja penyalah makai suap lalu ngelanggar atur pengelantang mensia di Sarawak?
Nambah ke nya, ba minggu nyin kemari, sebengkah agi kompeni enggi Hamed Sepawi, Perkapalan Damai Timur, udah ditemu ngereja sebengkah penyalah di menua Liberia ketegal dituduh ngereja penyalah makai suap, serak tu kompeni nya direpotka raban NGO Global Witness dalam repot sida “Liberia Poised To Hand Over Lands To Timber Pirates”. Enggau tu, orang di menua Australia patut ngelala kompeni ngulihka kayu batang ti udah mai pengerusak ke rampa menua di Tasmania nya bisi kaul enggau kompeni “lanun kayu batang” di Liberia, lalu pia mega bisi kaul enggau kompeni-kompeni kayu batang ti udah ngerusak rampa menua di Sarawak empu dalam pengelama 40 taun.