Berita ti tau ngemalu istana Britain ti udah dipesebutka orang di serata dunya bisi nyerumba penemuai di-raja William enggau bini iya Kate ke Sabah.
Reti nya pengerusak kampung di Borneo, ketegal penyalah makai suap ba bala orang politik di menua Malaysia, enda tentu dikibuhka.
Siku orang ti tau berasai lantang ati nya Kepala Menteri Sabah empu, Musa Bin Aman. Menua Sabah engka enda bulih perati ari serata dunya, lalu pia mega penyalah makai suap ti dikereja Musa Aman ngelama tu.
William enggau Kate udah diperindang ngena pengawa ngelantangka ati bejalai nengah andau puchuk kayu di Emperan Danum, ti endur seduai diberi peluang ngambi gambar jelu mayas ti dikurung, lalu udahnya seduai iya ninggalka endur nya.

Ba pun minggu nyin kemari, suratberita menua UK, Guardian, udah nuliska kenang sida pasal gaya rampa menua di Sabah, ti endur sida mega ngenang pasal pengirau ati orang mayuh bekaul enggau penemuai di-raja nya enda ulih mantu ngemanahka gaya utai ti agi tinggal di Borneo, kelimpah ari ti dikena meresi penyai nama siku tuai menua ti udah meransang pengerusak rampa kampung. Global Witness, sebengkah NGO entarabansa udah bebendar amat mantah penemuai William enggau Kate ke Sabah, lalu sida mega betanya ngagai William empu minta berunding dua-tiga kali pasal pekara ti udah ngujungka pengerusak rampa menua di Sabah nya ketegal pengamu enggau pengerangka bala menteri di menua nya. Musa Aman udah dipaduka ngemataka pekara kampung di Sabah kenyau ari 1993 lebuh parti UMNO mujur ngerampas kuasa megai perintah ari parti-parti menua nya empu sepengudah sida alah ba bepilihbesai ti beresi, enggau chara nyuap bala kaban parlimen di menua nya ngambika betukar parti. Sepengudah parti UMNO bulih kuasa sida lalu ngasuh Tukang Wang sida, Musa Aman, mangku pengawa nyadi Kepala Eksekutif dalam Yayasan Sabah, ti endur iya betanggungpengawa ngemendarka lalu ngeluarka lisin-lisin kayu batang dikena nebang keengka iya kampung di Sabah.
Musa Aman udah ngeluarka mayuh lisin kayu batang lalu udah ngemendarka pengawa makai suap dikena ngulihka duit ti mayuh bendar dikena parti UMNO bekuasa atas majoriti ti mimit, dikena ngulihka kayu batang dikena melanja kuasa politik sida, nyengkaum pengawa meli undi maya bepilihbesai.

Sekumbang maya nya meh Musa Aman udah nyadi kaya-raja, lalu pia mega menyadi iya empu, Anifah Aman, ti mangku pengawa nyadi Menteri Luar menua Malaysia.
Enda kurang ari RM100 juta bisi ditemu disimpan dalam akaun bank UBS atas nama Musa Aman, ti dikemataka bala pengari iya lalu penatai semua duit nya endang ari penyalah makai suap ngulihka kayu kampung, ulih dikena nerangka ni penatai pengeraja iya.
Tu mega ulih nerangka ngagai kitai nama kebuah mayuh agi orang asal di Sabah majak merinsa bebanding enggau sebedau Musa Aman nyadi tuai menua Sabah, taja pan rampa kampung menua Sabah udah dirusak lalu ditanam ngena madang sawit.
Kepala Menteri Sabah nya rindu bendar begendangka leka jako ‘pemansang’ di menua nya lalu pia mega nyebut pasal asil ti keluar majak ‘betambah’, taja pan ke bendar di Sabah, baka di Sarawak, nya sebuah menua ti ngembuan bala rayat ti agi merinsa di Malaysia, taja pan pengeraja asal iya mayuh bendar.
Enti William ngemasukka penerang tu dalam jaku ba penemuai iya, jaku iya nya tentu enda ditusui ba suratberita ba renggat entarabansa.
Ke bendar menua UK rindu agi ngelakuka kompeni-kompeni sida baka kompeni BAE ti nguji nyual senyata perang enggau teknologi tinggi ke bukai ngagai menua Sabah. Bala rayat Sabah ti merinsa tentu enda begunaka senyata perang ti mar-mar lalu pengawa meli senyata nya mega deka mai penatai-pemisi Sabah pansut ari menua nya, lalu mega dikena nambahka pengaya sekeda bala orang ti endang udah kaya di menua bukai.

Bala orang ti benung meratika pechara skandal kapal selam Scorpene diatu bela enda ulih meragam sapa ti deka bulih untung ba pengawa meli senyata perang ti enda tentu dipeguna nya ari menua Eropa ngagai menua Malaysia?! Sekali ke pengawa meli senyata nya deka diatur siku pengari ke Menteri Besai Najib, baka kes iya ti bekaul enggau Razak Baginda (nengah kompeni Perimekar ti dikena iya ngulihka 100 juta euro enggau nadai ngereja nama-nama lebuh meli kapal selam Scorpene) tauka ngena pengari Musa Aman?
Beserimbai enggau nya, sebengkah laman blog pro-Musa (ti nerima komen ari siku orang tang ngena mayuh nama) udah belaba ke penemuai William enggau Kate nya endang dikena meresi nama Musa Aman ti udah kamah laban pengawa makai suap nya. Kenu ko kenang dalam laman blog nya:
Kitai patut beratika penemuai raja nya dikena ngelai jaku petenah orang ti ngumbai rampa kampung di Sabah nya jaku bula. Nama kebuah Musa Aman deka nerima penemuai William enggau Kate enti amat Sabah diatu benung dituntung penusah rusak rampa kampung di menua Asia Tenggara”?
Sekali ke tu nyadika sebuah kes, nuan meresi nama aku, aku meli senyata ari menua nuan?