Kuasa Elektrik Ti Beresi? Projek Tekat Hidro Sarawak Ti Kamah Diatu Ngeluarka Bau But!

Bildschirmfoto 2012-11-29 um 13.45.56 — Bebau sereta tau nganu nyawa – Nadai ai ti beresi di ulu Bakun tauka penyalah makai suap ti ngelingi tekat Bakun

Ba seraban orang ti meri sanding penemu ngagai kompeni Sarawak Energy Berhad (SEB), ke lebih agi kompeni Hydro-Tasmania ari menua Australia, udah ngena peluang nya dikena sida ngelakuka semua projek tekat ai ti diperambuka sida di menua Sarawak nya nyadika pun penatai kuasa elektrik ti “beresi”, “enda nemu abis” lalu “seruran meruan”, lalu enda ngeluarka sebarang penanggul baka ti dikeluarka ari kuasa fosil ti bukai, baka minyak enggau arang batu.

Kompeni Hydro-Tasmania nya seruran ngumbai semua tekat ai sida nya “nadai ngundan karbon” lalu sida seruran madahka kompeni sida nya deka nyadi sebuah kompeni “nadai ngundan tauaka ngeluarka karbon” datai ba ujung taun tu ila, sepengudah sida ngetuka semua pejalai enjin elektrik kuasa gas sida ila.

Tang, bala pengari ke bala orang ti mantah projek tekat ai di Sarawak ti majak mayuh tubuh diatu, bisi udah nemuai ke menua Australia ngambi ke sida meda ke diri empu baka ni cherita nya enda munyi ti ditusui kompeni Hydro-Tasmania nya.

Raban nya nemuai ke Australia dikena sida nangkan sapa-sapa orang ti udah saru runding pasal projek tekat ai ti “beresi”, “nadai ngundan karbon” tauka “manah ke rampa menua”, nya ke bendar iya dikena nyungkak pengerusak, ti suah agi nya mai pengamah sereta enda manah ke pengerai mensia, lalu tekat ai mega tau ngeluarka gas rumah hijau ti enda manah.

Bildschirmfoto 2012-11-29 um 13.47.28 — Penemuai raban Save Rivers ke menua Australia – James Nurang siku pengari ari Baram (kiba) enggau Peter Kallang ari gerempung Save Rivers (kanan) betemu enggau MP John Kayes ari Parti Green ti endur MP nya diterangka pasal bantah sida ba 50 buah tekat ai ti deka digaga di Sarawak ti dikereja kompeni besai baka sida Hydro-Tasmania.

Bala orang ti nemuai ngagai tasik ari atas tekat Bakun udah belabuh nganjung repot ti madahka ai tasik nya udah bebali masam (acidic) sereta bebau but ti angkat ari ai Sungai Rajang, taja pan dulu suba ai sungai nya tebilang enggau ai ti chiru sereta beresi lalu mayuh ikan, ke lebih agi kandang sungai ari ulu tekat Bakun nya.

Bildschirmfoto 2012-11-29 um 13.49.59 — Sebengkah pejalai ti mar – orang nengah sungai nya napi panas ti bisa meraka tasik Bakun deka betemu enggau komuniti jelatong ti nguan tasik nya. Komuniti jelatong milih enda pindah ke Sungai Asap ketegal sida balat agi deka tusah di Sungai Asap.

Pengari rakyat ari PKR, YB Baru Bian udah ngelalau bala pengarang berita pasal empas ari tekat ai ti datai ari ikas pemasam ai ti tinggi ketegal bangkai utai tumbuh ti buruk dalam ai lalu nanggul utai idup ai ti bukai.
Iya udah nerangka enggau silik baka ni ai tasik Bakun udah bebali keruh lalu ikas pemasam ai diatu majak tinggi, ti deka munuh semua utai idup, ukai semina di ulu tekat nya tang mega nyentuk ke bepuluh-puluh kilometer ari ili tekat ai nya.

Baru Bian madahka pengirau ati diri ke pengelikun raban orang bansa asal ti diau di pelilih menua ti udah ampuh laban tekat ai Bakun nya, nyengkaum raban orang ti diau ari ili tekat nya.

Bildschirmfoto 2012-11-29 um 13.51.12 — Kuasa hidro ari tekat ti besai-besai kala dikumbai ulih ngeluarka kuasa elektrik ti murah, tang diatu bala saintis nyau tetemuka empas ti jai datai ari tekat ai lalu baka ni tekat ai tau ngujungka ikas pengangat dunya majak tinggi

Empas gas rumah hijau ti bukai nya datai ari kesuh ai ari tekat ai ti dikeluarka enggau mayuh ngagai angin.

Tu meh kebuah Bank Dunya, ti dulu suba nyukung pengawa menua ti deka ngaga tekat ai, tang diatu bank nya enggai agi melanja semua projek tekat ai ti besai-besai, ke lebih agi ba menua ti angat baka menua Sarawak, laban tekat ai, baka Bakun ulih ngasilka gas rumah hijau ti mayuh ukai semina dalam pengelama sepuluh taun, tang nyentuk ke beratus-ratus taun! Nama kebuah, lebuh tekat ai ti besai-besai mai pengerusak lalu ngeluarka gas rumah hijau, tau ngasuh kompeni baka Hydro-Tasmania seruran ngumbai pengawa sida nya ngasilka “kuasa ti enda nemu abis” enti dibandingka enggau kuasa fosil?

Bala orang di Bakun, Murum enggau Baleh enggau di endur bukai ti deka digagaka 50 iti tekat ai di Sarawak udah chakah bendar mantah projek baka nya, lalu jaku tangkan sida ngagai kompeni besai baka Hydro-Tasmania nya “pansut kita ari menua kami tu”.
Taib Mahmud ukai semina merambu deka ngaga 12 buah tekat ai ti besai-besai di Sarawak, tang 50 buah agi!

Bildschirmfoto 2012-11-29 um 13.53.25 — Repot ti tau ngasuh ati irau bekaul enggau projek SCORE Taib ti nadai mai penguntung

Lalu sekeda repot bisi nerangka baka ni Taib ti udah tuai nya chakah bendar ngelakuka projek SCORE ‘baru’ iya, taja pan mensia mayuh di menua bukai udah ngumbai semua bansa tekat ai ti besai-besai nya udah tinggal arus pemansang kemaya hari tu lalu nadai tau ngeluarka sebarang asil tauka penguntung ti nyengala.

Pansik-pansik mega ngayanka baka ni tekat ti besai-besai beungkus dua kali lipat ari ti diperambu tang ngeluarka asil jauh mimit ari setengah ba kuasa elektrik ti disadang nya!
Repot mega betanyaka sekali ke tekat ai ti besai-besai nya tau meri peluang pengawa tauka penguntung ke raban bansa orang di Sarawak ba reti ti bendar?

Kompeni Hydro-Tasmania udah ngumbai projek SCORE deka mai ‘pemansang’ enggau ‘peluang pengawa’. Tang gerempung Bruno Manser Fund (BMF) udah nerangka pasal perengka ti diguna ari tekat ai nya semina dikena besambungka kabel kuasa elektrik bekuasa tinggi ari tekat ai ngagai zon pengawa kilang SCORE. Peratika pelilih menua Batang Ai di Lubok Antu Sarawak ti endur raban bansa orang di menua nya lalu mayuh bedau bisi bekal kuasa elektrik taja pan tekat ai hidro Batang Ai nya 30 taun udah tembu digaga!

Bildschirmfoto 2012-11-29 um 13.54.53 — Kilang dikena ngelebur aluminum di Mukah udah mai penanggul ngagai utai tanam enggau mai penyakit ke bala orang di menua nya – tang ukai meri peluang bekereja ke sida

Juluk ati Taib Mahmud semina ba kilang ti besai-besai aja ti datai bedagang ke menua Sarawak. Kilang Press Metal pengelebur aluminum di Mukah diatu majak napi jaku serebana pasal penanggul ba pengerai mensia mayuh lalu sida mega beserebanaka utai tanam sida mega puntan.

Tang Taib Mahmud chakah majakka juluk ati iya ti nerima penatai kilang ti besai-besai bedagang di endur nya ngena kuasa elektrik ti jauh murah ti deka dikeluarka ari 50 buah tekat ai ila.

Nadai siku ari raban orang bansa asal udah bulih pengawa dalam kilang-kilang ti digaga dalam SCORE, laban Taib Mahmud udah enggai kiruh melanja sida nya belajarka pengelandik bekereja di endur nya.

Bildschirmfoto 2012-11-29 um 13.58.07 — Kelai pengerusak. Bala orang di Bakun suba bisi semua utai ti diguna sida ti datai ari sungai enggau kampung. Tang diatu Taib udah ngerusak lalu ngerampas pengeraja asil kampung ari sida lalu ngampuhka rampa kampung sida ngena ai ari tekat hidro.

Bala menteri BN endang seruran belabaka beratus-ribu iku pengereja pengawa ti datai ari menua bukai tama ke Sarawak ari menua India enggau Pakistan bekereja ba SCORE. Nama reti pemansang enggau pemaju ti baka nya ke bala orang bansa asal di menua Sarawak empu?

Nama penguntung pengereja pengawa ari menua luar nya ngagai Taib Mahmud? Bisi chara bukai dikena ngulihka kuasa elektrik ari sungai-sungai di Sarawak ti tau meri penguntung ke raban orang di menua pesisir enggau enda ngeruga pengidup sida sereta pemanah rampa menua sida.

Bildschirmfoto 2012-11-29 um 14.01.24 — Nadai begunaka mayuh agi tekat ai baka tekat Bakun, laban Sarawak udah chukup mayuh kuasa elektrik lalu kuasa elektrik hidro nya tau mai pengerusak ke rampa menua beduduk ari penumbuh mayuh bengkah kilang

Sekim hidro elektrik ti mit-mit ti enda besai ungkus manah agi digaga bebanding enggau ngaga tekat ai ti besai dikena mantu bala raban orang ti nguan menua pesisir di Sarawak dikena sida ngulihka kuasa elektrik enggau ai ti beresi.
Kelimpah ari ti mutung bajet pengawa pelajar 80% baka ti diperambu perintah BN ke taun nyin ila, mayuh agi orang di menua Sarawak empu tau dilatih ngambika tau ngajar bala anak sida empu dalam komuniti sida empu.

Jalai alun patut digaga mayuh agi ke guna mensia mayuh, ukai ke guna lori kayu batang. Dagang temuai patut dikemansangka enggau chakah agi ngambika bala temuai ti deka meda pemanah rampa kampung menua Sarawak ulih bejalai neresa kampung enggau sungai ti beresi lalu nadai dikeruga.

Comments