Sepengudah ti ninga berita pasal pemayuh bala orang ti manggai setengah juta iku begempuru ba Stadium Merdeka enggau di serata nengeri KL, seraban rakyat Malaysia di London udah mansar diri ngelaban penyelap gaya hari bejalai bebala mayuh ari Trafalgar Square nuju Downing Street, lalu udah nya nuju rumah Parlimen Westminster sehari tu tadi.
Sida ngerembaika menira enggau banner, lalu manjung minta pengawa bepilihbesai ti beresi lalu macha jaku penerang ari Tuai Bersih, Ambiga Sreenevasen ti ngangauka semua peranak Malaysia pulai ke menua maya bepilihbesai tu ila lalu mantu beratika pengawa nya dipejalaika enggau lurus.
Seraban orang ti begempuru nya semina disempulang dua tiga iku pemesai polis UK ti semina ngemataka pemujur pejalai kerita lebuh raban orang nya tama ngagai laman Whitehall.
Bala orang ti begempuru nya berasai gaga bendar ati ninga berita pasal raban polis di KL enda ngereja pengasar ba orang ti begempuru din.
Jaku pesan ngagai perintah British
Poster-poster ti dipandangka nya dikena ngenataika jaku pesan ti mudah, ti endur bala pemerati official ari Britain dipinta ngambi kira semua peminta enggau kangau nya.
Ngelama tu Britain enggau Malaysia udah lantang bendar dalam pengawa dagang enggau pangan diri.
Polisi ti dipejalaika diatu dipeda manah bendar ngagai dua bengkah menua nya. Najib diatu benung ngiga pemanah nama iya ba ikas entarabansa, lalu Britain mega benung ngiga peluang bedagang.
Menteri Besai UK, David Cameron udah nentuka semua perambu ti manah-manah ke dua bengkah menua nya.
Sebagi ari ‘kaul dagang diberi seput ti baru’ tu dipeda numpuka focus ngagai pengawa meli senyata baka ti dikereja BAE Systems ti nyual bilun jet perang bansa Typhoon.
Tu nyadika sebengkah dagang ti beperaiska beberapa buah bilun jet perang ti udah dikena ti benung dilepaska ari simpan Pengakalan Penerebai Bilun Perang Raja Britain, ti nyadika sebengkah pengawa sida ngurangka belanja ngintu senyata menua sida. Sempekat Dagang Bebas ti benung ditanggam enggau Kesatuan Eropah lalu terang mega ba dagang dua jalai ti bukai nya benung dipejalaika menua Britain.
Mayuh bengkah penemuai perintah ari menua Britain diatur baka penemuai kaban politik, penemuai bala raja Britain, nitih Komisioner Tinggi Britain. Kangau enggau peminta raban orang Malaysia terang bendar didinga ba nengeri London.
Begulai bekereja enggau perintah BN enda patut beentaruhka kebebasan enggau pejalai perintah ti manah ke bala rakyat Malaysia.
Enti perintah UK besedia napi jaku tuduh dikena sida melakangka penyalah makai suap di Malaysia dalam pengawa iya ti deka bedagang enggau Malaysia, poster enggau banner ti dipandangka bala orang ti begempuru nya udah nyadika lalau ke semua bala diplomat ti deka ngambi bagi.
Sekeda ari rambai jaku ba poster enggau banner ti dipandangka maya nya baka “Penyalah Nipu Ba Bepilihbesai di Malaysia Ti Majak Nyadi”; “Perintah Malaysia Pemadu Korup Di Dunya”; “Beri Meh Kebebasan Ngulihka Berita Nengah Media Ti Enda Besiping Di Malaysia”; “Sama-Sama Meresi Lis Nama Pengundi”.
Pekara ti baka nya deka dibantaika baru dalam rumah Parlimen Britain ba minggu baru tu ila, lebuh NGO Suaram enggau Tuai Bersih, Ambiga Sreenevasen, dijangka deka betemu enggau bala MP di menua UK lalu nerangka ngagai sida pasal atur demokrasi Malaysia ti majak tendu enggau indeks penyalah makai suap ti majak betambah diatu.
Kaul dagang Britain enggau Malaysia udah mujur bendar lalu ditembuka ngena sempekat “meli senyata” Tekat Pergau, sebengkah atur ti dipejalaika Menteri Pengelikun ti dulu suba, Najib Tun Razak, enggau beberapa iku pemesai raban parti konservatif ti bepangkat tinggi.
Pengawa nya udah nyadika lalau enggau tangkan ti endur menua Britain patut bebasa, lalu enggau nya sebuah bup udah dikeluarka, dikena nusui enggau silik pasal penyalah ti dikereja maya nya.
Diatu Menteri Besai Malaysia, Najib Tun Razak endang ditemu bekaul terus dalam pengawa meli kapal selam Peranchis, Scorpene, ti dibalut penyalah ngulihka duit subuk beratus juta Euro enggau penyalah munuh, baka ti benung dipansik dalam court menua Peranchis.
Jerita lama ngelubang penemu ngambika menua UK patut nangi lebuh sida deka bedagang enggau sebuah menua ti udah ditetapka ba ikas ke-3 indeks pemansut duit kamah di dunya tu lalu sida patut ningaka kangau minta bebas ari raban orang ti deka meresi sistem pemerintah sida.