Sarawak Report kala dikumbai sepenemu ketegal seruran ngambi bagi nempa berita sepeneka ati pasal pengawa mechat sereta ngena “kuasa kereja ajih ti jai” dalam perintah BN Taib Mahmud, lalu diumbaka mayuh bengkah raban tuai dalam BN empu seruran nguji ngambi kuasa ari Kepala Menteri ti majak tuai sereta enda regas agi nya.
Seraban orang ti setanah enggau ipar iya, Adenan Satem, ti diatu benung ngenatka diri ketegal penyakit tungkul ati, madahka penanggul pengerai ti nuntung Adenan nya dikereja bala munsuh politik sida!
Sekumbang nya, gerempung parti-parti dalam BN ti udah ditumbuhka enggau manah dulu suba, diatu dipeda belabuh besengki penemu enggau pangan diri rambau pengawa bepilihbesai ti nyau semak deka diatur tu.
Dulu suba, raban parti penyakal dikumbai seruran charut ngelaban diri sama diri, tang diatu kitai meda gerempung parti dalam BN nyau belabuh berebutka kerusi entara sida empu!
Baka nya mega, ba menua ti berimbai enggau garis entara menua Sarawak, penyarut dalam gerempung BN enggau pengawa ninggalka parti UMNO di Sabah mega bisi nyadi. Di Sabah, Kepala Menteri Musa Aman udah ditemu bekaul enggau penyalah ngubah duit kamah berpuluh juta dollar nengah mayuh akaun bank bala proksi iya.
Ba kaban enggau bakih iya dalam UMNO diatu nyau enggai bedawa iya lalu sida udah lenyau pengarap ke iya.
Bisi mega didinga jaku ti disadung pasal “kuasa kereja ajih ti jai” dikereja sida UMNO ti besepenemu enggau Menteri Besai Najib Razak, berebak enggau bala UMNO ti seruran ngenang lalu besalahka kuasa Rosmah Mansor ti rangka sekumbang laki iya ti benung bekuasa.
Tang pengawa ti ngena kuasa kereja ajih ti jai enda tentu berupai dipeda enti dibandingka enggau kusai berita pasal penyalah munuh model ari menua Mongolia, Altantuya enggau kaul niang nya enggau Najib lalu mega pengawa iya ti meli kapal selam Scorpene suba.
Jaku randau dalam raban UMNO nyau enda nuju juluk ati parti sida empu, iya nya baka ni chara bulih pemenang ke parti UMNO. Tang batang randau sida betumpu ngagai ni maya sapit Najib, iya nya Muhyddin Yassin (ti bulih berekat ari pemerintah bekukut besi Mahathir Mohamad) deka angkat lalu mechat Najib.
Sekali ke tulak tauka pechat nya deka dikereja sebedau tauka sepengudah bepilihbesai tu ila? Nya batang pekara ti dikerandauka bala orang dalam UMNO empu!
Sekali ke pengerami nyambut Taun Baru tu nyadika tenung pasal penyarut entara mayuh parti dalam BN ti mujur merintah menua tu dalam pengelama 50 taun tu deka terus dikena mujuk ati bala pengundi ti madahka sida nya agi ulih terus megai perintah?
Beputung mindahka tungkul ati
Ipar Taib Mahmud, Adenan Satem, diatu benung berubat ba ICU di Singapura, ngati gintir diri empu ti deka beputung tungkul ati.
Bala sida Adenan Satem sebilik madahka peluang endur iya mujur berubat chara beputung nya 50/50, tang bala kami udah dipadahka nyau deka sampal sida sebilik enda arapka penyakit ti nuntung iya nya nyadi kediri empu.
Sampal sida sebilik diatu nyau putus pengarap laban orang ti dikarapka Taib Mahmud suba diatu nyau makin kena pechat orang PBB/BN empu. Pia mega, tuai ti dikarapka sida ti benung megai perintah diatu mega deka ditulak ari penuduk iya.
Nya alai, sida sebilik nyau besalah “kuasa kereja ajih” ti dikena bala munsuh politik iya!
Nya semina peragam ti nyadika kelai kuasa Taib nyau majak buruk ba atas parti iya empu lalu bala penyukung iya nyau majak irau ke penusah ti deka nuntung sida udah nya ila.
Gamal bini biak enda ulih dikena ngelamun gamal penuai Taib.
Ke bendar iya, Ragad kala ngereja pengasar ba Taib ti dipeda nyadika balas semaya Taib ti enda dikamatka iya, ke terubah dalam taun 1991 suba iya madahka diri enka nyurutka diri ari pengawa Kepala Menteri ti dipangku iya diatu, lalu bedau dikamatka iya.
Parti ti semakin bepechah-belah
Baka nya mega, Taib diatu ukai semina mupuk-mupuk lenyau kuasa iya ba atas sida sebilik, tang mega lenyau kuasa iya ba atas bala penyukung iya.
Baka ni iya deka nerangka penyelai utai ti benung nyadi ba sitak raban bansa Iban ti udu dituntung penyarut baka di Julau, Selangau, Lubok Antu, Kanowit, Sri Aman enggau Ulu Rajang diatu?
Tuai parti PRS, James Masing, ti taluk bendar ngagai Taib Mahmud, diatu udu dibalut penyalah udah mujur mai pemenang bala pengari ari parti iya beberapa taun tu udah, diatu belabuh napi sakal siku-sama-siku ari munsuh iya ari parti SWP ti baru ditumbuhka, dipelanja bakih iya ti dulu suba dalam BN, Sng Chee Hua.
Tu mai reti, dua buah parti BN nya belabuh berebutka kerusi ti sama, iya kerusi ti kala udah diperebut enggau parti penyakal ngelama tu. Dulu suba, kitai meratika raban parti penyakal ti seruran enda sepenemu lalu berebutka kerusi lalu semua parti dalam BN dipeda begempung!
Tang enti Taib enda mutarka penanggul ti nuntung PRS, iya mega dipeda puntan mutarka penanggul ti nuntung sebuah agi parti BN, iya nya SPDP. Parti SPDP ti betuaika William Mawan Ikom diatu udah dipeda charut enggau diri sama diri.
Pengari SPDP ari Mas Gading, Dr Tiki Lafe, diatu udah mai raban penyukung iya numbuhka “kelab BN” udah iya ti ditulak ari SPDP sama enggau sekeda pengari rakyat ti bukai, lalu Dr Tiki mengkang madahka diri deka ngetanka kerusi iya ba bepilihbesai ti deka datai tu ila.
Taib lalu bedau ulih mutarka penyarut dalam parti nya. Sekali ke William Mawan deka nyabung ‘manuk’ BN iya napi ‘manuk’ “kelab BN” ila? Utai baka tu dipelabaka tau nyadi.
Lalu diatu mega sebuah agi parti dalam BN Sarawak, iya SUPP, dituntung penyarut dalam parti lalu ngujungka bala kaban dalam parti nya bebagi nyadi dua raban.
Tuai parti SUPP ti dulu suba, Dr George Chan Hong Nam, ti mega kala nyadi Sapit Kepala Menteri dalam perintah Taib, udah ditulak bala pengundi iya empu ti udah leju enggau iya ba pengawa bepilih besai dulu suba. Tang penganti iya, Peter Chin Fah Koi diatu benung napi penyarut entara dua bengkah raban dalam SUPP
Ba bulan nyin kemari, sereta Menteri Besai Najib Razak madahka iya enda deka mechat sapa-sapa ari SUPP, Peter Chin lalu ngena kuasa iya mechat Wong Soon Koh ti benung enda senutuk penemu enggau iya. Enggau pechat nya, Wong Soon Koh lalu nuduh Peter Chin enda bebasaka pemutus penemu Menteri Besai.
Ulih tauka enda kini Najib tauka Taib nguasa bala penyukung seduai ti benung charut entara diri sama diri? Enti enda, tentu bala pengundi seduai deka nguingka luan diri empu ila.
‘Apek bayat’ Awang Tengah – sekali ke menua Sarawak deka terus tama ngagai nyawa baya?
Tu mulaika pengingat kitai ngagai penyarut ti nyadi entara bala penyukung Taib empu ti berebutka kuasa deka nganti penuduk iya. Diatu siku orang ti balat dikenangika orang dalam PBB iya nya Awang Tengah Ali Hassan, pengari ari Bukit Sari.
Ngelama tu Taib udah arap bendar ke Awang Tengah lalu meri iya pengawa nyadi Sapit Menteri Perambu Pengawa, ti ngujungka orang ti biak nya nyadi kaya-raja enggau jampat.
Nitihka perati sekeda bala orang, Taib diatu nyau puntan kuasa pengerangka bala sida sebilik tauka bala penyukung iya. Orang ti baka nya udah bebendar ngena semua peluang enggau ruang ti ditemu sida seagi-agi sida ulih, sekali ke ba kontrak ti besai-besai, tanah NCR tauka keengka iya lisin ngulihka kayu batang tauka muka kebun dandang besai.
Diatu Awang Tengah dipeda nyadika orang ti pemadu rangka lalu enggau pengaya iya nya iya tau bulih kuasa ke iya empu.
Diatu sida Taib Mahmud sebilik empu nyau mupuk-mupuk ngadang laban Awang Tengah udah ditemu ulih meli sukung ari bala penyukung Taib ti udah chukup dikina iya nulak orang tuai nya lalu ngerampas kuasa ari iya.
Utai ti nyengala bendar, taja pan Taib diatu mengkang bekuasa, tang iya tetap dipechat sereta ditulak. Dua iku anak lelaki iya udah ditulak ari tintai tuai parti dikena nyilih iya (Abu Bekir, ketegal iya bisi kes sarak enggau bini iya enggau Sulaiman, laban iya ngelarika diri ari pengawa pengari rakyat iya ba ikas parlimen).
Pekara ti nyadi baka tu udah enda ngelantangka ati bala orang di menua Sarawak empu, tang nyangka sida udah mutuska penemu enggau runding sida empu deka nulak BN ti benung charut dalam semua parti sida ba bepilihbesai tu ila.
Jelu rimau dipeda kitai mangah, tang jelu jagu nya tau mangah sereta kering agi ba bala sida ti kaya-kaya enggau bekuasa di Sarawak.