Bala orang asal di menua Julau udah kena keduan baka ti diterangka dalam filem ti diayanka Global Witness minggu nyin kemari, diatu ringat sereta nyida lalu begempuru mandangka pengeringat diri dikena sida ngelaban pengawa meri tanah-tanah NCR sida enggau chara belalai ngagai sida Taib Mahmud sebilik.
Siku pengari ari PKR ke sitak menua nya, Andy Wong, udah ngaga repot polis kena 23hb Mac nyin kemari, lalu udah nya ngaga repot ba Suruhanjaya Pencegahan Rasuah Malaysia kena 26hb Mac.
Ba hari nya mega Andy Wong enggau bala kaban PKR ke Pampang Julau udah begempuru bebala mayuh dikena sida mantah atur magi tanah sida ngagai bala anak indu Kepala Menteri Sarawak ke dulu suba, Tun Abdul Rahman Ya’kub, ti mega bala petunggal ke Abdul Taib Mahmud.
Penyumbung dua iku diri menyadi ti ngumbai diri bisi kuasa nerima “pemeri” tanah NCR ari petunggal seduai iya, Abdul Taib Mahmud, nengah kompeni Ample Agro Sdn Bhd enggi sida menyadi nya ukai nyadika siti ketegal ti ngasuh bala orang di Julau ringat, tang dua iku diri menyadi nya udah ngumbai bala orang asal ti udah nguan menua nya beberapa serak tubuh nya “orang kampar”.
“Bala sida nya orang kampar ba tanah nya, laban tanah nya ukai enggi sida, tanah nya tanah perintah, nya kebuah sida nya kampar”
pia ku Norlia Abdul Rahman ti ngumbai diri lebih bekuasa agi ba atas tanah nya, ketegal kaul iya ti nyadi petunggal Kepala Menteri ti, munyi ku iya, mudah dibai berunding.
Dikena nambahka kelese sida ngagai bala orang di Julau nya adi iya, Fatimah Abdul Rahman, sama ngumbai orang di Julau nya “manchal” laban enda beiga-iga minta bayar pampas ke tanah ti dirampas sida menyadi nya.
Dalam jaku randau seduai enggau NGO Global Witness, ti udah mujur ngerikod filem nya chara belalai, dua iku diri menyadi nya nerangka baka ni penumbuh kompeni Ample Agro Sdn Bhd nya nyadika “kereban” dikena ngemudahka sida menyadi nerima pemeri tanah kampung 5,000 hektar ti udah direjista nyadi tanah NCR ari petunggal seduai iya, Taib Mahmud.
Siku ari seduai menyadi nya, Fatimah Abdul Rahman, direjista nyadika orang ti tau enggau betemu ke kompeni nya, baka ti udah ditusui kami dulu ari tu. Pansik kami ba rekod-rekod ti bisi tiris ari Opis Tanah enggau Survei Sarawak udah nunjukka nya bisi beratus-ribu hektar tanah NCR udah nyadika konsesyen enggau lisin ngagai sida Taib Mahmud sekaban-belayan.
Kompeni Ample Agro nya sebagi ari pemayuh kompeni enggi sida Taib Mahmud sebilik, bala bakih iya enggau bala pengari dagang iya, ti udah mujur bulih tanah enggau rega ti mit tang udah nya nyual baru tanah nya enggau rega tinggi agi ngagai kompeni-kompeni kebun dandang besai.
Ba rega munyi ti dipinta bala anak Tun Rahman ba filem nya, sida menyadi nya dipelabaka ulih bulih untung US$16 juta ba pengawa nyual tanah nya, ti nunjukka pemurah rega asal tanah ti dipinta Taib Mahmud atas tanah enggi orang di Julau nya.
Dulu ari tu Sarawak Report bisi ngayanka cherita pasal bejual-beli tanah ti dikereja bala sida Taib Mahmud sebilik baka Arif Mahmud, Tufail Mahmud, Ali Mahmud, Ibrahim Mahmud, Raziah Mahmud enggau mega adi ipar iya, Robert Genied, nyengkaum bala anak menyadi iya.
Pemeri-pemeri ti pemadu besai nya ngagai kompeni-kompeni enggi Taib Mahmud empu, Mahmud Abu Bekir (nengah kompeni Titanium Management) enggau petunggal iya ti mega nyadika proksi iya, Abdul Hamed Sepawi (nengah kompeni Grand Perfect).
Kepala Menteri nya empu endang ngembuan share ba pemisi ti mayuh nerima pemeri nyadi pemegai share dalam kompeni Mesti Bersatu Sdn Bhd.
Tang penguntung iya mayuh agi datai ari duit suap enggau ari bala nomini iya.
Diatu, kitai sekali agi ngemataka pengawa ngerampas tanah baka ti didawa dalam court, lalu sekali agi kita meda Menua Sarawak enggau Kepala Menteri nya udah ngereja pengawa ti salah ba rakyat diri empu.
Tang, iya enggau chara ti bependiau baka siku raja, Taib Mahmud udah melakangka pemutus court nya lalu ngapil ngelaban sida, lalu ukai ngereja utai ti manah ke raban bansa Dayak di Sarawak.
Bala orang di Julau ti ringat nya madahka sida enda ulih nerima pengamat ti endur tanah sida udah diambi enggau chara belalai lalu diberi ngagai bala anak Tun Rahman, lalu bala orang Julau nya mega deka mandangka peringat diri di nengeri Kuching enda lama agi.