Dalam beberapa hari aja udah bekau filem ti ngusaika penyalah makai suap ari NGO Global Witnesss ti nyadika pengamat jaku tuduh Sarawak Report pasal penyalah makai suap ti malit Kepala Menteri Sarawak Abdul Taib, dia sebengkah agensi berita entarabansa udah ulih ngamatka semua repot kami pasal atur perintah ti kamah ti dipejalaika Kepala Menteri Sabah Musa Aman.
Agensi berita entarabansa Reuters bisi udah ngeluarka sebengkah asil pansik sida bekaul enggau penyalah makai suap ngulihka kayu kampong, baka ti kala dibantaika kami dalam laman blog tu suba.
Kenyau ari beberapa taun tu udah Sarawak Report udah ngeluarkka mayuh bendar surat penerang ti ngerintai penyalah ngubah duit dikena ngemasukka duit suap bejuta-juta dollar ti dibayar ngagai Kepala Menteri Sabah, Musa Aman, ba mayuh bengkah akaun bank di menua tasik lalu udah nya di menua Switzerland.
Kami bisi bulih penerang kira-kira pasal pemindah duit ari seraban tauke kayu batang ti semak bendarenggau Musa, ti betuaika siku orang dagang benama Michael Chia.
Lalu kami mega bisi bulih surat-surat penerang ti dikeluarka seraban penerit undang-undang ngelaban penyalah makai suap menua Malaysia enggau Hong Kong (MACC enggau ICAC, ti udah bejalaika pansik sida ba pekara tu) ti mayuh agi nya udah kala dipansutka kami nengah internet.
Surat-surat penerang nya udah nyidi pengawa ngubah duit ti enda kurang ari US$90 juta lalu mega nunjukka bala tauke kayu batang ti udah kala nerima lisin ngulihka kayu batang di menua nya.
Pugu penerang ari agensi Reuters
Pugu penerang ti kala dikeluarka agensi berita entarabansa Reuters nya udah nyadika surat dikena ngamatka penerang-penerang ti kala dikeluarka kami dalam laman blog tu dulu ari tu lalu ke bendar iya mega nyadika penerang ti datai ari opis MACC enggau ICAC. Dalam pengelama beberapa bulan, Musa Aman, balat bendar ngumbai repot kami nya semina petenah lalu ngembuan pemula.
Kelimpah ari nya, Reuters mega bisi nusui dua iku ari tauke kayu batang ti bisi kena pansik nya udah ngaku ngagai agensi berita sida ti madahka sida endang bisi mayar duit suap ngagai Musa Aman bekaul enggau konsesyen ngulihka kayu batang.
Engka tu mih kebuah endur Kepala Menteri ti kaya raja ari menua Sabah nya bebendar nuduh laman blog kami tu naburka petenah enggau pemula lalu ngujungka iya enda mujur ngirit kami ngagai court.
Artikel ti ditulis Reuters nya nunjukka “Musa udah ngeluarka konsesyen-konsesyen ti ngelui ari patut, tauka dua kali lipat, ari tebang ti dikemendarka” lalu sebagi ari pemayuh konsesyen nya udah diberi ngagai menyadi iya empu, Anifah Aman, ti nyadi Menteri Pekara Luar Malaysia.
Bala tauke kayu batang udah ngaku meri duit suap
Reuters ngamatka penerang ti diberi Sarawak Report ti madahka Musa Aman kala muka akaun-akaun bank di Singapura nengah bank UBS Switzerland ti bepalan di menua Hong Kong dikena ngemasukka duit suap ari bala tauke kayu batang.
Bala tauke ti nyadika bakih iya mega nyadika nomini ke Musa Aman, lebih agi Michael Chia ti kala ditanka bala penerit undang-undang Hong Kong ketegal nguji deka mai pansut duit tunai S$16 juta ba taun 2008 suba.
Bank UBS diatu napi tuduh penyalah dalam court di menua Switzerland bekaul enggau pengawa ngubah duit ti dikereja bala orang ti meri suap nya.
Bank nya diatu udah ngamatka tuduh nya lalu ngaku lebuh pechara dalam court di Singapura ti endur semua surat penerang ti dibantaika kami dalam laman blog kami tu suba nya amat magang. Sama dikamatka maya nya mega penerang pasal bala anak Musa Aman ti suah ngeluarka duit ari akaun endur nyimpan duit ti diubah nya sekumbang sida belajar di menua Australia suba. Sarawak Report udah ngaga simpul penemu beduduk ba semua akaun bank enggau surat-surat penerang ti nusui enggau silik konsesyen-konsesyen kayu batang di Sabah ti bisi ba kami ti endur bala tauke baka sida Andrew Lim enggau Freddie Lim, ti bempu kompeni-kompeni Wayco Enterprise enggau Hillywell Inc lalu mega nyadi penerima konsesyen ngulihka kayu batang Maju Sinar ba pemesai rampa 32,000 hektar kena 22/08/2006 suba.
Duit ti udah dipasukka tama akaun bank datas nya tadi, lalu dipasukka, kena 22/08/2006, udah dipindahka ngagai akaun ti dikemataka Christopher Barnes ti nyadi “pengintu reta” ngarika Musa Aman, nitihka sepuchuk surat penerang ti bisi disimpan raban pemansik ICAC di menua Hong Kong.
Penerang nya diatu, ti benung disimpan raban ICAC, udah dikamatka bala pemansik Reuters.
Duit nya SEMINA ke BN?!
Baka ti endang disadang, Musa Aman udah enggai nyurutka diri tauka ngaku diri bisi bekaul enggau semua jaku tuduh nya, taja pan diatu udah bisi mayuh penerang ti madahka US$90 juta duit suap udah dipasukka ngagai akaun-akaun ti dipegai iya.
Kepala Menteri Sabah nya, ti nyadika penyukung ke Menteri Besai Malaysia Najib Razak, udah bepanggai ba siku kaban iya ti nyadi Lawyer Bansa, Abdul Gani Patail ti suah enggai kiruhka kes ti dianjung ngagai iya.
Cherita pasal Musa Aman enggau BN suah bendar udah bebali-bali dalam tiga taun tu lalu ditambahka pemayuh penerang ti bisi kaul. Ke terubah iya sida udah bebula ke semua jaku tuduh nya lalu sida mega udah ngarapka pekara nya tau padam diri laban timpuh pansik ba kes nya udah ngetu.
Tang sepengudaah Sarawak Report mantaika mayuh agi penerang lalu penerit undang-undang Switzerland nyau belabuh bejalaika pansik sida, BN lalu ngubah cherita sida. Musa Aman enggau bala penyukung iya lalu NGAKU madahka duit suap nya bisi diterima, tang ukai pulai ke Musa, tang ke parti sida, UMNO!
Dunya udah ditejuka meragam baka ni penerang tu tau digaga nyadika tegal ti ulih diterima akal mensia?
Nama kebuah bendar agi enti sebuah parti politik tau nerima beratus juta dollar duit suaap enti dibandingka enggau duit suap ditagaka ngagai bala tuai dalam parti politik nerima duit nya terus?
Sekali ke bala tuai dalam BN mereti ke pengawa nya sebengkah penyalah tauka sekali ke bala lawyer ti landik-landik ngaraapka bala rakyat ti beli sereta mabu runding deka nerima penerang ti munyi nya ukai nyadika sebengkah penyalah?
Lalu sekali ke Musa Aman enggau BN mengkang ngumbai rakyat Sabah enda nalat baka ni mudah bendar endur bala aanak Musa ngeluarka duit beribu-ribu dollar sepeneka ati sida ari bup akaun ti diatu udah ditagaka ngagai parti UMNO nya?
Udah tentu bendar, siti ketegal nama kebuah Musa enggau menyadi iya mujur ngasuh diri empu kaya ari ti nguna semua pengeraja asal menua laban seduai iya nyadika pemeri duit suap pemadu mayuh ngagai tabung parti UMNO/BN di Sabah.
Dua iku diri menyadi nya mega udah nyaga ati Menteri Pekara Luar Malaysia, Mohd Nazri Aziz ti ngelindung penyalah seduai. Sehari tu Menteri Besai Najib Razak udah besemaya madahka pekara nya deka “dipansik”.
Tu meh duit ti deka dikena BN bejalaika kimpin bepilihbesai sida dikena ngulihka sukung rakyat Sabah. Sida semina nyuaka dua-tiga ringgit ngagai bala pengundi ti seranta dikena ngulihka undi sida. Nya pulai ngagai pemutus runding rakyat Sabah empu ti sanggup nyual diri awakka seraban orang ti jai majak ngerumpak beratus-juta dollar ari menua sida dalam pengelama 5 taun agi.
BN endang enggai meri peluang enggau awak ngelepaska penanggul nya. Musa Aman enggau bala penyukungnya deka enggau bebendar nutup penerang nya awakka enda ditemu rakyat sida. Sida deka ngereja semua chara ti jai sereta kamah, nyengkaum nipu ba pengawa bepilihbesai tu ila.
Keruga sida ba menua diri empu udah ngujungka sida bulih penatai pemisi ti mayuh dikena sida ngereja utai nya.
[SARAWAK REPORT DEKA MANTAIKA MAYUH AGI PENERANG BEKAUL ENGGAU PENYALAH NGUBAH DUIT BA PENGAWA NGULIHKA KAYU BATANG DI SABAH ENDA LAMA AGI]