Sepengudah ti meri penerang ngagai DAP Sarawak ari Sarawak Report, parti nya deka ngerepot Torstein Sjotveit siku CEO Sarawak Energy Berhad (SEB) bebansa Norway ngagai Opis Penagang Penyalah Makai Suap Malaysia (MACC).
Dalam pengelama beberapa bulan parti nya udah nyungkak pengirau ati sida ba SEB ti diperatika seruran ngenuluka kompeni Sarawak Cable Berhad lebuh meri kontrak.
Kompeni SEB empu nyadika pemegai syer pemadu besai dalam Sarawak Cable Berhad lalu siku ari raban pengarah sida nya Abu Bekir iya nya anak lelaki Kepala Menteri Sarawak Taib Mahmud.
Penerang ti balat bendar ngirauka ati DAP taun nyin kemari iya nya bekaul enggau jaku gerah ti madahka peneka Sarawak Cable meli Trenergy Infrastructure Sdn Bhd, ti nyadika pugu kontrak ti dikerinduka SEB dikena masang tali arus elektrik bekuasa 500kV ti beungkus RM1.15 bilion berangkah ari menua Simalajau nyentuk ngagai menua Tondong.
Kompeni Trenergy Infrastructure empu nya enggi Abu Bekir.
Pengari parti DAP nya balat bendar mantah ti ngumbai Abu Bekir nya siku ari raban pengarah dalam Sarawak Cable ti udah ngambi alih Trenergy enggau chara pejal lalu kompeni SEB nya endang bekaul bendar enggau Sarawak Cable.
Bantah sida udah ngelaunka atur meri projek nya ti udah ditender baru, tang diatu pemutus ti asal nya tetap dikena baru. Berebak enggau nya Sarawak Cable udah ngambi alih Trenergy, ti ditagaka dikena ngulihka projek bebilion-bilion ringgit nya.
Nyerumba nya mega Sarawak Report bisi udah madah ngagai DAP pasal Abu Bekir ti nyadika pemegai mayuh agi syer dalam Sarawak Cable, sebengkah penerang ti udah dipelalaika ngena kompeni kumang menyarung enggau kompeni nomini lalu parti penyakal nya deka ngeripotka pekara nya ngagai opis MACC enti sema Trenergy ditemu mujur ngulihka kontrak baka ti udah disadang.
YB Chong ari parti DAP Sarawak madahka iya udah diterangka sebengkah pemeri berita ari dalam SEB ba urung tengan 2012 ti madahka SEB udah besedia nyerahka projek nya ngaga dagang kunsi ti mar agi taja pan kurang pengelandik ba pengawa nya, ti seninjik bendar nya betuaika anak Kepala Menteri Sarawak empu:
1) Shanghai Electric Group Co. Ltd (Shanghai Electric) ti nikam tender ba rega RM1,017 juta;
2) Sinohydro Corporation JV Trenergy Infrastructure Sdn Bhd (Sino-Trenergy JV) ti udah nikam tender ba rega RM1,151 juta; enggau
3) Toshiba Transmission & Distribution System Asia Sdn Bhd (Toshiba) ti udah nikam tender ba rega RM1,275 juta.
Nitih pemeri penerang nya ti madahka Shanghai Electric, sebengkah kompeni pengeluar kuasa elektrik ti tebilang ba pengawa nya, udah ngena timpuh setaun endur sida meresa sereta mansik projek nya ngena semua pengelandik ti tinggi, tang enda mukai-mukai Sino-Trenergy JV ti udah nikam tender ba rega ti tinggi agi mujur bulih kontrak nya.
Pekara ti balat agi ngasuh ati irau nya, munyi ku Chong Chieng Jen pada maya tu, nya kompeni Sarawak Cable nadai belalai ke langgur sida ti meli syer dalam Trenergy.
Sebagi ari Sarawak Cable nya diempu SEB, lalu reti nya SEB beempu syer terus dalam pengawa meri tender projek ngagai anak kompeni sida empu!
Tambah mega, Sarawak Cable beempu syer ti besai bendar dalam sebengkah agi kompeni enggi SEB, iya nya Sarwaja Timur, ti endang landik masang tiang elektrik bekuasa tinggi.
Pekara ti dibangkitka nya nama kebuah kompeni menua (ti betuaika petunggal Taib, iya nya Hamed Sepawi) udah milih nyual syer ngagai Sarawak Cable ti diempu sechara nengali nya.
DAP Sarawak udah ngamatka Abu bekir nya siku ari raban bala pengarah dalam Sarawak Cable.
Sepengudah parti penyakal nya mansutka pengirau ati sida nya, langgur asal ti deka meri kontrak nya lalu ditangguhka dulu, ti udah nya ngujungka DAP mega nangguhka niat sida ti deka ngenataika repot ngagai opis MACC nya.
Taja pan baka nya Sarawak Cable udah majakka langgur sida lalu ngambi-alih Trenergy baka ti udah dilanggur sida lalu pekara nya sekali agi nyadi buah kenang.
Sepenembu bepilihbesai tu tadi, SEB meri siti projek besai ti nengali ngagai Trenergy/Sarawak Cable, iya nya masang tali bekuasa tinggi ba padang bilun Tudan di Miri enggau ungkus RM32 juta.
Tang utai ti enda ditemu DAP nyentukka iya dipansutka Sarawak Report nya pasal orang ti megai syer pemadu mayuh dalam Sarawak Cable nya anak Taib empu, Mahmud Abu Bekir!
Penerang pasal kompeni nunjukka enggau kabur-kabur pasal syer ti dipegai sida Taib sebilik, laban Abu Bekir udah ngengkahka syer iya dalam Sarawak Cable ngagai ibun bala pengari iya enggau sebengkah agi kompeni, Central Paragon.
Tang, nitih ke repot taun Sarawak Cable empu nunjukka Abu Bekir megai lebih ari satu petiga ari syer dalam kompeni nya taja sebedau iya ngambi-alih kompeni iya, Trenergy.
Enti sema pelaba ke diatu nya nyadi nyata lalu tender nya deka pulai ngagai Trenergy, DAP tetap deka ngeripotka pekara nya ngagai opis MACC laban pekara nya bisi kaul enggau penyalah bechampurka pengawa perintah enggau dagang.
Orang ti bempu tanggungpengawa mutuska penemu dalam SEB nya siku CEO bebansa Norway dalam SEB, Torstein Sjotveit.
Udah bekau DAP mansutrka pengirau ati ti madahka Trenergy tentu deka bulih kontrak nya ba taun nyin kemari, SEB enggau enda mukai-mukai madahka pengawa ngeluarka kontrak nya ditangguhka dulu.
SEB madahka pengawa nikam tender nya deka diatur baru, enggau projek masang tali arus bekuasa tinggi nya deka dibagi tiga, ngambika ditender kediri-kediri.
Nyerumba nya SEB udah mujur nentuka sapa di entara sida udah muchurka penerang pasal penuduk Trenergy ti bulih projek bejuta-juta dollar ti dipelalaika sida nya.
Beduduk ari nya dia Kepala Menija sida, Chua Yaw Chiang udah dibuai ari penuduk iya laban kenu ku SEB pengawa ngeluarka tender nya dikereja opis iya.
Tang Chong Cjieng Jen udah enchabar pemutus pen emu tuai SEB laban Chong madahka Chua nya siku pemesai ti diambi Torstein bekereja ke SEB enggau siku agi pemesai ari menua Norway.
Diatu jaku tanya majak ditujuka ngagai Torstein, laban sadang sekali agi madahka Trenergy deka disebut nyadika pemenang ba pengawa nikam tender ba kali kedua nya.
Jaku tanya ke terubah nya nama dalih Torstein meri kontrak nya ngagai kompeni kontraktor ti kurang pengelandik ba pengawa nya – di endur SEB empu bisi utai dijuluk ati sida?
Jaku tanya ke dua, nama kebuah selampur proses nya udah dipelalaika ari ti patut ditemu orang mayuh lalu nama kebuah bisi orang ditekanka salah ketegal ti bisi tanggungpengawa dibuai ari kereja, lebuh bisi penerang ti beguna ti patut ditemu orang mayuh?
Jaku tanya ke tiga, nama kebuah siku menija asal ari Sarawak ti biak agi nya dibuai ari pengawa iya lalu ukai tuai menija, ti endang diambi iya ari menua asal iya Norway?
Jaku tanya ke empat, enggau penuduk pekara belanja enggau pengelikun orang mayuh nyadika entaruh, nama kebuah siku aja pemesai pemeresa teknikal dipaduka (iya nya Raphael Chung) lalu baka ni pengulih pemesai tu ulih meri asil pansik bebanding enggau pansik ti mar-mar ti dipejalaika kompeni Shanghai Electric dalam timpuh setaun?
Semua jaku tanya tu patut diperatika bepelasarka konteks penanggul ba kuasa elektrik ti pemadu jai ti udah nuntung menua Sarawak beduduk ari projek Tekat Bakun. Penanggul nya dikemataka Torstein Sjotveit ti makai gaji berates juta ringgit udah ngujungka pengerusak enggau pengerugi bepuluh juta ringgit ngagai perengka pengelebur besi aluminum enggi kompeni Pressmetal di menua Mukah.
Kompeni ti bejalaika projek Bakun nya pangan dagang kunsi Trenergy, iya nya Sino Hydro.
Pekara-pekara tu patut diperatika enggau pengerembai rintai projek besai-besai ti deka diberi SEB ngagai anak Taib. Tu nyengkaum kontrak ti beungkus RM90 juta dikena masang tali arus elektrik bekuasa tinggi ari tekat Murum enggau projek bukai mega ti manggai ba ungkus USD$200 juta, munyi ti disebut NGO ari menua Switzerland, Bruno Manser Fund.
Bepelasarka pengawa meri kontrak besai-besai tu mih ti ngujungka BMF udah nekanka Torstein Sjotveit ngereja penyalah makai suap ti udu.
NGO BMF nya mega nekanka sebuah agi kompeni ti ampit nerima kontrak besai-besai ari SEB, iya nya Naim Candera enggi petunggal Taib, iya nya Hamed Sepawi. Tu nyengkaum kontrak beungkus USD$70 juta dalam taun 2009 suba dikena masang tali arus elektrik bekuasa tinggi 275kV ari tekat Bakun ngagai Simalajau.
Taja pan penerang tu udah dikumbai bula, Sarawak Report udah mujur ngamatka kompeni SEB ti dikemataka Torstein enggau Hamed Sepawi nya udah nginjau duit RM30 bilion dikena sida melanja projek-projek gajah burak ti enda besemaya meri penguntung ngagai mensia mayuh di Sarawak.
Duit injau nya deka dibayar pulai bala rakyat menua Sarawak (ti nyengkaum anak duit ti mayuh bendar) dalam pengelama beberapa puluh taun nengah chukai enggau bil-bil bayar elektrik. Tang anak Taib enggau petunggal iya, Hamed Sepawi bulih kontrak bebilion-bilion ringgit dikena melanja projek-projek nya bedau tentu mujur.
Sadang enggau pelaba nya mega madahka Sapit Kepala Menteri Sarawak mega deka ampit bulih sebagi ari kontrak masang tali arus elektrik bekuasa tinggi 500kV nya beduduk ba duit bala pemayar chukai enggau pemayar bil di Sarawak.