Beberapa hari udah tembu bepilihbesai bulan Lima tu tadi ti udu dibalut penyalah makai suap enggau pengawa ngelakar, Kepala Menteri Sarawak Abdul Taib Mahmud udah mansutka jaku ti nyadika iya dipeda baka ‘petara’.
Iya udah nikika gaji bala YB enggau bala menteri iya.
Enggau gaji ti niki ngemesai nya iya empu ti nerima gaji RM13,000 sebulan deka ditikika ngagai RM39,000. Iya endang enda begunaka duit gaji ngemayuh nya, tang iya deka ngayanka pemesai gaji ti ulih dibayar perintah menua iya ngagai Menteri Besai, ti diatu benung bepanggai ba penaluk bala pengundi Malaysia Timur dikena sida mengkang megai perintah ari ikas perintah besai din.
Tang, gaji bala menteri ti niki nya endang lama udah dilanggur, lalu mensia mayuh bisi kuasa betanya nama kebuah Kepala Menteri enda mansutka jaku gerah nya ngagai bala pengundi sida dulu agi? Nama kebuah pekara nya dipelalaika nyentuk ngagai sepengudah bepilihbesai?
Pia mega, Kepala Menteri nya mengkang ngetanka penemu iya ti madahka gaji bala menteri enda tau enda besai awakka sida ulih meri penguntung mayuh agi ngagai mensia mayuh.
Nejuka bala orang mayuh enda nemu ulu-ili pasal perambu nya, lalu udah nya betindak enggau jampat sepengudah bepilihbesai, nya sebengkah chara nipu rakyat enggau bala pengundi diri empu.
Bonus
Taib udah nyadika peniki gaji nya utang ti bedau dibayar 17 bulan ke belakang ti nunjukka langgur nya lama bendar udah digaga ke pemanah iya empu enggau ke bala menteri iya. Tu mega ngayanka iya enda lurus ati sekumbang iya bepagut ba kuasa nyentuk ngagai sepengudah bepilihbesai dikena iya ngelipakka jaku kutuk orang mayuh.
Ingat kita, Taib diatu mangku 3 batang pengawa menteri penuh dalam kabinet perintah iya empu. Nya alai, enggau dua iti pengawa ti nambah nya ti mega dibayar gaji niki tiga lipat nya, Sarawak Report mujur nyadang penyampau gaji ti diterima iya nya manggai RM1,200,000 setaun.
Enggau utang gaji ti laun dibayar dalam pengelama 17 bulan nya, semua YB enggau menteri dalam kabinet menua Sarawak disadang deka nerima RM17 juta.
Nyerumba genturung rumah-rumah panjai di sekayu menua Sarawak napi penanggul bekal ai ketegal perintah ti kaya tang enda mujur beranakka puku duit dikena nganjung ai ti manah, uji kitai ngira, berapa buah lori tangki ai ulih dibeli dikena mutarka penanggul nya?
Kelai pengering tauka pengelemi Taib?
Tang, tuju ke bendar mayar gaji niki enggau bonus ngagai bala menteri iya endang berupai bendar. Taib udah dipeda besak ti endur iya dipeda meli penaluk sukung bala orang ti ngelingi iya lalu diumbaka berita angin ti madahka pasal ati bala orang enda puas ngagai iya.
Enggau chara nikika gaji ngemayuh nya Taib arapka sukung bala penyukung iya ulih dibeli enggau mudah taja pan iya enda tau enda besemaya bula ti deka nyurutka diri ninting kali bepilihbesai.
Nyerumba nya, bala pengundi Sarawak ti ditagaka mayar semua macham bil nya dikarapka meri sukung sepengudah sida disuap ngena RM50 siku ba bepilihbesai.
Sinu ngenang bala rakyat ti kena tekan BN nya sida ti disuap-suap ngena duit sida empu, lalu bala orang politik BN berasai gaga ati dibayar gaji ti besai-besai.