![Bildschirmfoto 2013-09-25 um 13.46.39](/wp-content/uploads/imgcache/2013/09/pImg_4b664bc88887b098af970dc85306e426.png)
Sebengkah raban NGO ari menua Malaysia, Suaram, bisi nganjung pengari sida ngagai sebengkah aum Pelapor Bekaul Enggau Kuasa Pengelantang Orang Bansa Asal ba Gerempung Bansa (UN), ti bejuraika enggau lenak bekaul enggau pengawa beduan raban orang bansa asal di Sarawak.
Jurai bejaku ti diatur Nalini Elumalai, siku Pengarah Eksekutif ke raban Suaram, udah ngansak Pelapor, James Anaya dikemendarka nemuai ke menua Malaysia Timur ngambika ulih mansik ke diri empu pengawa salah guna kuasa Kepala Menteri Taib Mahmud di Sarawak enggau Musa Aman di Sabah.
Elumalai udah ngerintaika sekeda bansa penyalah ngelanggar kuasa pengelantang mensia enggau orang bansa asal ti nyadi di serata menua Sarawak, taja pan menua Malaysia nyadika sebengkah kaban ba penetap-penetap dikena ngintu pengelantang raban orang bansa asal enggau pelilih menua ti diuan sida.
Pengari Suaram nya madahka atur nya udah nyadika penyalah ngelanggar kuasa pengelantang mensia enggau orang bansa asal munyi ti bisi dalam penetap-penetap Gerempung Bansa ti endur menua Malaysia nyadi sebengkah kaban iya.
Lalu raban NGO nya mega bisi madahka empas ti nyadi ari sebengkah dokumentasyen ti ditiriska nengah laman blog Sarawak Report taun nyin kemari, enggau nunjukka baka ni opis komisyen pengintu pengelantang enggau kuasa mensia ti ofisyel ari Malaysia, Suhakam, madahka penuduk bala orang bansa asal nya “dipejal nyadi anak kuli ba menua diri empu”.
Raban nembiak Universiti Adelaide ngayanka bantah sida sereta
Beserimbai enggau nya mega, ba Universiti Adelaide di Australia, bala nembiak dia bisi ngayanka bantah sida laban ngutuk pemutus penemu university nya ti udah nerima bantu bejuta-juta dollar ari Kepala Menteri Sarawak, Abdul Taib Mahmud, ti udah nya diberi tanda puji ijazah doctor kehormat lalu ngujungka iya diagihka sebengkah endur lapang ti diberi nama ngangkatka nama iya empu dalam universiti nya.
![Bildschirmfoto 2013-09-25 um 13.48.07](/wp-content/uploads/imgcache/2013/09/pImg_4902f2c90268ff931903b5c9b321b029.png)
Sarawak Report udah ngerintaika semua pemeri ti datai ari Taib Mahmud ngagai universiti nya lalu nunjukka sida Kepala Menteri nya sebilik mega bisi beempu sebuah Hotel Hilton Adelaide enggau kompleks dagang ti begenturung enggau nya.
Kami udah betanyaka baka ni iya ulih ngeluarka puku enggau pemeri-pemeri ti ngemayuh nya, laban lebuh iya belajar dia menya, iya semina siku nembiak ti kurang bepenatai-pemisi lalu iya besekula ari bantu sereta dipelanja orang bukai lalu udah nya iya mangku pengawa menteri ti begaji enggau naka pemesai?
Nyaut sebengkah artikel ti dituliska dalam The Australian ba minggu nyin kemari, opis Universiti Adelaide nerangka ngagai raban nembiak nya, sida endang kala nerima siti pemeri ari Taib dulu suba.
Ba penerang ti ke terubah, opis universiti nya madahka pemeri ari Taib nya ‘diterima enggau niat ti manah’ nyadika puku dagang lalu diperanakka beberapa kali lipat lalu “bisi bekaul enggau tanggungpengawa ti meruan”.
Bisi ngari raban nembiak ti ngayanka bantah sida ba maya nya, Lizzie Taylor ari gerempung South Australian Environment Network udah enggai nerima buah runding ba tanggungpengawa nya.
![Bildschirmfoto 2013-09-25 um 13.49.16](/wp-content/uploads/imgcache/2013/09/pImg_bb1e9e4d735ea5c7430167c54e48705f.png)
Kunsil Pengari Nembiak ba universiti nya udah madahka sida ngenggaika pemeri ti datai ari siku tuai menua ti udu dibalut penyalah makai suap ti bisi bekaul enggau pengawa ngerusak rampa kampung Borneo enggau raban orang asal ti nguan iya.
![Bildschirmfoto 2013-09-25 um 13.50.32](/wp-content/uploads/imgcache/2013/09/pImg_6adbc297b478d9323e9536a8aa2da5b8.png)
Dichiping lalu enda diterima nyadi peranak menua diri
![Bildschirmfoto 2013-09-25 um 13.51.40](/wp-content/uploads/imgcache/2013/09/pImg_3a65076f8b67b6d70b92ad5755cc54e0.png)
Pengirau ati raban nembiak Universiti Adelaide nya udah diatur sama berebak enggau penemuai gerempung NGO Suaram ngagai Gerempung Bansa di Geneva ba hari ti sama.
Raban NGO nya udah madahka pengirau ati sida pasal atur pengawa ti mulau enggau sengaja ba raban orang asal nya, ti mengkang enda direjista nyadi pengundi, enda diberi kad pengelala, enda diberi peluang ngena perengka perubat enggau pengerai enggau atur besekulaka anak sida, taja pan rampa kampung sida udah balat dirusak laban pengawa ngulihka kayu batang enggau pengawa muka kebun dandang besai sawit.
Atur ti bechiping nya udah ngeruga ati orang mayuh di Malaysia, ti nadai udah bulih sebarang penguntung ti nyengala ari polisi-polisi perintah BN bekaul enggau atur ngulihka asil ari tanah enggau tasik ti enda meruan, ti udah enda diberi sebarang peluang politik dikena ngelaban sida.
Atur bechiping nya udah dikereja dalam pengelama bepuluh taun lalu endang ditejuka BN nyadi di Malaysia Timur lalu asil iya diatu, Taib Mahmud udah nyadi siku orang ti pemadu kaya ti Asia, lalu peranak menua iya empu mengkang suntuk sereta seranta, penyampau tubuh sida semakin mimit-semimit, sebaka enggau pemunas jelu enggau utai tumbuh dalam rampa kampung Borneo.
Pengari Perintah Malaysia ti sama bisi datai ngagai aum Gerempung Bansa nya mengkang ngetanka penemu sida ti madahka menua Malaysia benung bejalaika atur “nimbang” kuasa pengelantang orang bansa asal enggau pengawa “pemansang”. Tang sida mega madahka bisi pekara-pekara ti nanggul ti enda tau enda diputarka dulu lalu besemaya deka ngamatka tanggungpengawa sida ngagai rakyat menua sida empu.