Udah bekau repot kami pansut ba pun minggu tu tadi ti madahka Menteri Pekara Orang Islam ti mega nyadika Pengerusi Wang Turu Baitulmal ti udah nagaka projek besai ngagai kompeni enggi iya empu, raban parti penyakal PKR udah ngeripotka Daud Abdul Rahman ngagai Opis Suruhanjaya Pencegahan Rasuah Malaysia (SPRM).
Parti penyakal DAP mega kala udah madahka sida deka nandu pinta sida ba Tabung Baitulmal Sarawak, iya nya sebengkah gerempung pengawa pengasih ti dipelanja raban orang Islam, patut ngeluarka akaun-akaun sida.
Pengirau ati mensia mayuh diatu majak betambah udah bekau pengawa ngaga palan enggau atur ti nyelai dikereja Tabung Baitulmal Sarawak (TBS) lebuh maya bala orang Islam ti seranta beserebanaka duit bantu ti diterima sida ngelama tu udah diketuka.
Mayuh orang enda berasai tetarit ati lebuh Daud madahka duit tulung ti manggai RM2 juta udah diagihka ninting taun taja pan beratus-ribut ringgit udah dipelanjaka dikena begagaka palan-palan dagang di negeri besai baka di Kuching, Miri enggau Sibu.
Ba berita ti diatu, udah bekau dibantaika Sarawak Report ti madahka palan Baitulmal ti baru ti deka digaga, Baitul Makmur II di pelilih Petra Jaya, udah dikomsiyenka ari kompeni Eastbourne Corporation enggi Daud empu ba rega RM253 juta, sebedau kontrak nya disub-kontrak ngagai kompeni Hock Seng Lee empat minggu udah nya, ba rega RM228 juta.
‘Penatai duit turu ke TBS nya endang ari chabut zakat ti dibayar bala orang Islam. Wang turu nya sebaka enggau batang pengawa Opis Chukai Menua, iya nya ngumpul chukai ari mensia mayuh.
“Enggau nya, TBS beempu tanggungpengawa ngeluarka repot pekara wang ti diatur sida ngagai orang mayuh. Bala pemayar chukai deka nemu baka ni TBS melanjaka duit zakat ti dituruka dia,” pia ku Abdul Aziz ti nyadi penulung ke tuai pati DAP Chong Chieng Jen.
Dituntung penusah
Beserimbai enggau nya, sebengkah penerang suratberita ti dikeluarka Tuai Pampang Indu PKR Sarawak, Puan Nurhanim Moksen, udah madahka siku ari kaban komiti dalam parti nya (ti datai ari pelilih ti deka endur ngaga palan Baitul Makmur II ti dilanggurka nya) udah ngenataika repot ngagai opis SPRM kena lemai hari Lima nyin kemari.
Puan Nurhanim madahka bala kaban PKR udah ngansak ngambika pansik lalu dipejalaika ba tuduh bekaul enggau salah-guna kuasa enggau penyarut pengawa ba atur wang turu dalam TBS.
“Enggau diri empu ti orang Islam ti udah diletak mayar zakat ngagai wang turu Baitulmal nya, aku berasai enda lantang ati udah bekau aku macha repot dalam portal berita “Sarawak Report” nya.
“Kami .. irau bendar ati ke penanggul tu laban nya deka ngeruga raban bansa Melayu/Islam lalu sida dipinta mayar zakat ngagai wang turu nya. Kami dipadahka Baitulmal udah belabuh beranakka puku dagang ba dagang reta enggau pengawa begagaka palan dagang ti besai-besai ….
“Wang ti dituruka dalam Baitulmal nya enda tau enda diatur enggau chara ti engkeman, ke lebih agi ke pengelantang orang ti seranta enggau pekara pelajar sida. Aku nemu bendar gaya pengidup orang ti seranta, agi mayuh bendar bala nembiak ti datai ari ruang bilik orang islam ti seranta enda bepeluang bulih bantu pelajar, pia ku Nurhanim Moksen.
Penerang ari PKR nya udah ngenegapka agi pinta ari DAP bekaul enggau penampak dalam pekara ngatur wang turu lalu minta penerang ari Daud, ti mega nyadi Menteri Pemansang Infrastruktur, ngambika iya tau nerangka penuduk iya, udah bekau ti dibantaika Sarawak Report ti madahka wang turu nya betuaika iya empu ti udah meri kontrak ngagai palan ti besai nya ngagai kompeni iya empu.
“Beguna bendar ba Daud ngeluarka sebengkah penerang dikena besakalka tuduh dalam Sarawak Report ti nyebut Sapit Menteri ti udah diberi kuasa penuh ngemataka Baitulmal udah ngelanggar atur pengawa enggau chara meri kontrak ngaga palan Baitul Makmur II ngagai kompeni iya empu. Udah nya projek nya lalu disub-kontrak iya ngagai kompeni bukai ba bida rega RM25 juta. Aku deka nemu ari Daud Abdul Rahman empu, sekali ke RM25 juta nya udah tauka benung disimpan ke guna Baitulmal, ti endur Sapit Menteri enggau kompeni enggi iya empu nya nadai bulih sebarang penguntung munyi ti dituduh lalu mega nadai nyadi sebarang penyalah konflik pengawa Sapit Menteri nya.” [Penerang ari PKR]
Agi mayuh kontrak ke Daud
Beserimbai enggau nya, Sarawak Report deka narit perati ngagai kontrak ti beungkus RM9 juta ti udah diberika ngagai kompeni enggi Daud empu, Eastbourne Corporation. Kontrak tambah nya udah direjista ba opis CIDB baka ti ulih dipeda dalam laman web ofisyel opis nya. Kontrak nya udah diserahka ba bulan Satu, iya nya tumu mimit ari kontrak besai ti beungkus RM253 juta dikena ngaga palan Baitul Makmur II, tang dua iti kontrak nya endang bekaul enggau siti projek ti sama.
Enggau Daud Abdul Rahman ti nyadi Menteri Pemansang Infrastruktur lalu enggau laman web ofisyel CIDB ti udah ngayanka lebih tiga-suku ribu juta ringgit ungkus kontrak awam ti udah diserahka ngagai kompeni iya empu. Lalu enggau penuduk sereta pangkat iya ti bisi kuasa penuh lebuh ti meri kontrak-kontrak nya, terang bendar penyalah konflik pengawa udah dikereja iya.
Lalu enggau mayuh agi jaku tanya diatu ti patut disaut iya, semua orang mengkang nganti saut ti silik sereta lenak ari Daud Abdul Rahman empu.