![Bildschirmfoto 2013-09-25 um 16.11.35](/wp-content/uploads/imgcache/2013/09/pImg_0fca1134769b92b6cc1ec73fee92f27f.png)
Sekumbang ti nganti ai tekat makin niki di Murum di Sarawak, Sarawak Report mega bisi nerima berita pasal atur ti ngena ulun bekereja ba tapak projek nya.
Beribu-ribu iku ulun ari menua China, Myanmar, Bangladesh enggau Pakistan bisi udah dibai tama dikena ngaga tekat ba sebengkah kandang kampung enggau tanah pesaka enggi raban bansa Penan Barat ti idup bepindah-pindah nya.
Bisi beberapa iku ari bala ulun nya ti mujur lari ari tapak projek nya udah meri penerang ngagai bala pengarang berita ba minggu nyin kemari, ti madahka sida udah tepejal lari ninggalka tapak projek nya laban sida nadai udah dibayar gaji.
Berita ti udu agi ngasuh irau ati ti bisi mega diterima seraban pengarang berita entarabansa, ti udah mujur masuk ngagai tapak projek tekat Murum ti udu dijaga, bekaul enggau kes-kes masung orang indu ba raban bansa Penan ti dikereja orang luar ti datai bekereja ba endur nya.
Jaku tuduh ti udu nya dikeluarka beberapa minggu sepengudah Sarawak Energy Berhad (SEB) nya ngemesaika chara baru sida ngisi tanggungpengawa korporat, sosial enggau rampa menua sida ba Aum Besai Gerempung Pengeluar Kuasa Hidro Entarabansa di Kuching, ti diatur ba bulan Lima tu tadi, taja pan aum besai nya udu nerima jaku kutuk ari mensia mayuh.
Ubah?
![Bildschirmfoto 2013-09-25 um 16.13.02](/wp-content/uploads/imgcache/2013/09/pImg_83167183eabbfd7d70a179082e060e7d.png)
SEB ti betuaika petunggal enggau mega ti nyadika proksi dagang ke Kepala Menteri Sarawak, Abdul Hamed Sepawi ti nyadika penerima mayuh bengkah kontrak, lisin ngereja pengawa ti bukai dalam menua nya.
Siku CEO kenyau ari 2009, Torstein Sjotveit bebansa Norway, udah madah ke semua projek ngaga tekat kuasa hidro di Sarawak sebedau tu enda dikereja nitihka standard entarabansa ti ditetapka.
Tu nyengkaum projek tekat Murum empu, ti udah didirika enggau chara belalai dalam pengelama dua taun, enggau dijangkaka pengawa ti ngaga tekat nya tentu deka ngeruga rampa menua raban bansa Penan endur sida begigaka pengindup.
![Bildschirmfoto 2013-09-25 um 16.14.15](/wp-content/uploads/imgcache/2013/09/pImg_105d5dc4a53b81e157802b15e8aade92.png)
Torstein Sjotveit udah ngeringka penemu diri ti udah mai ubah ngagai raban bansa Penan. Tang enggau berita raban ulun ti lari ari Murum udah ngelemika jaku Sjotveit nya, enggau mega kurang penerang ba pengawa sida bebasaka pengelantang raban bansa Penan.
Agi mayuh pengirau ati pasal penusah indu kena pasung ti ninggang raban bansa Penan
Utai ti udu ngasuh ati irau nya sebengkah pekara ti baru ditemu seraban pengarang berita ari menua Jepun, India enggau mega ari Sarawak ti udah mujur namaka diri ngagai kandang menua ti dijaga perintah ba minggu nyin kemari. Pekara ti ditemu sida nya bekaul enggau baka ni raban bansa Penan ti udu dikeruga bala pengereja pengawa ari menua luar ti bekereja enggau diau semak sida.
Bala pengarang berita nya udah mujur nemuai ngagai genturung pendiau raban bansa Penan ti udah diansak perintah pindah ninggalka menua sida, taja pan peminta sida dipampas nya lalu bedau dibayar perintah.
Bala pengarang berita tetemuka beberapa iku nembiak bebansa Penan ti agi mit bisi mua enggau tukuh tubuh sebaka enggau ‘orang India/Pakistan’, kenu ku siku pengarang berita, Peter John Jaban ari stesyen radio Radio Free Sarawak.
Bala orang ba genturung pendiau nya madahka bala nembiak mit nya bisi nyerupa gamal bala ‘sabat’ bebansa India/Pakistan ti datai bedagang ngagaikandang menua nya.
Raban bansa Penan nya sebengkah raban bansa asal ti idup enggau chara bepindah-pindah pendiau dalam kampung Asia ti penudi lalu sida iya raban bansa ti seranta enggau mega raban bansa ti mudah bendar kena keruga. Sida diatu beung ngemataka kampung ti endur sida begigaka pemakai kena rusak pengawa nebang kayu batang.
![Bildschirmfoto 2013-09-25 um 16.15.35](/wp-content/uploads/imgcache/2013/09/pImg_688a09e28a0dec2df5b4918d98a3b107.png)
Dalam taun 2010 suba James Masing, Menteri Pemansang Tanah Sarawak (ti kala didinga madahka perintah deka muka kebun sawit ari 1 juta ngagai 2 juta hektar da agi) udah bebeula berita ti madahka penerang pasal pengawa masung nembiak indu bansa Penan laban kenu ku Masing indu bansa Penan udah belaki kenyau ari umur sida sepuluh taun lalu sida pandai becherita.
Alfred Jabu Numpang ti nyadi Sapit Kepala Menteri mega bisi didinga madahka kes masung orang indu bebansa Penan ti direpotka NGO nya sebengkah ‘pengawa ti masau jam’.
Diatu badu agi bejaku tinggi lalu pansutka penerang ti bendar dikena berubah
![Bildschirmfoto 2013-09-25 um 16.16.37](/wp-content/uploads/imgcache/2013/09/pImg_02c453068b239c28265acdff405aed7f.png)
Enggau Torstein Sjotveit ti nyadi kepala dalam Sarawak Energy Berhad, agi mayuh penerang ti sumbung dipansutka.
Ukai semina maya Aum Besai Gerempung Pengeluar Kuasa Elektrik Hidro Entarabansa di BCCK Kuching, tang ba dini-dini endur nyengkaum dalam laman web sida SEB empu, pasal program ngamatka tanggungpengawa korporat, sosial nya ngagai raban bansa asal enggau rampa menua ti kena keruga tinjau pengasar perintah Taib Mahmud ti deka ngubah rampa kampung nyadi kandang menua berindustri.
Tang, penerang-penerang nunjukka kompeni nya agi puntan ngisi peminta protocol entarabansa bebasaka pengelantang enggau kuasa mensia enggau orang bansa asal ti endur Malaysia endang nyadi kaban dalam sempekat nya.
Raban NGO International River mega bulih penerang baka ni perintah Taib udah semina milih pengari raban bansa Penan ti endang dipilih sida, ti udah diupah laban meri kereja sama enggau sukung sida ba pengawa ngaga tekat nya.
Bala pengarang berita ti nemuai ngaga endur nya ba minggu nyin kemari tetemuka pengawa nipu nya udah mechahka kaul pupu bansa di menua nya.
![Bildschirmfoto 2013-09-25 um 16.17.56](/wp-content/uploads/imgcache/2013/09/pImg_b0467306723d16476d42d8e1140d4466.png)
Palan pengentap pendiau ti baru nya udah diperesa bala pengarang berita ti madahka asil jari tukang dia setengah standard, ruang ti mit lalu enda nyamai endur diau. “Merinsa agi endur diau ari di Sungai Asap” ku Peter John Jaban, ti bebanding ke palan pengentap pendiau di Bakun, ti endur udah lebih sepuluh taun raban bansa dia agi nganti diri dipampas baka ti disemaya perintah.
Bala ulun ti lari
Sepemulai sida ari Murum dia raban pengarang berita nya udah mansa kandang menua di ili tekat Bakun. Udah bekau lebih kurang setaun tasik di endur nya udah ngundan ai dia terus ngeluarka ges methanol ke dalam ruan angin lalu raban bansa ti diau di endur nya madahka sida berasai takut ke empas ubah ba gaya angin dia tau ngeruga pengidup sida.
![Bildschirmfoto 2013-09-25 um 16.19.40](/wp-content/uploads/imgcache/2013/09/pImg_939a29dab6f8b728aacf604da5f8d132.png)
Di endur tu bala pengarang berita bisi betemu enggau sekeda ulun ti udah ngelarika diri ari kem anak kuli di Murum, lalu sida nguji ngiga pengidup baru enggau ngereja sebarang pengawa ti tau endur sida ngiga belanja.
Mayuh ari bala sida nya dianjung bekereja ke Murum mar bendar nerima gaji tauka enda dibayar sebarang gaji, nitihka jaku randau sida enggau raban pengarang berita nya. Nya kebuah sida ngelarika diri.
Sida ulun nya dibayar gaji ngena chek kompeni, ti endur di menua ulu sungai sida enda ulih enda nukar chek nya ba kerani kompeni. Ba pengawa betukarka chek ngagai mata duit nya, sida dipinta mayar chaj ‘bayar servis’ 10% ari penyampau gaji dalam chek nya.
Repot nya udah muka sebengkah agi skandal ti ngemaluka menua Sarawak. Sistem ulun ti dipejalaika perintah Taib Mahmud nya beduduk ba asil rampa menua enggau pengawa bekebun di Sarawak.
SEB udah puntan enda nitihka kondisyen enggau tanggungpengawa sida ngaga bala pengereja pengawa taja pan sida udah chakah bendar ngemesaika diri empu ba laman web sida.
![Bildschirmfoto 2013-09-25 um 16.21.06](/wp-content/uploads/imgcache/2013/09/pImg_b470822e7e034c5f8449e1923728bf70.png)
Perintah Sarawak patut belabuh mansik pasal pengawa ngena tulang raban ulun enggau pengawa masung indu orang bansa asal; ba endur nya.
Ke sebarang kompeni entarabansa ti deka bedagang enggau Sarawak Energy tauka enggau perintah menua Sarawak ti udu dibalut pengamah nama nya, sida patut ngambi kira reputasyen sida.
![Bildschirmfoto 2013-09-25 um 16.22.03](/wp-content/uploads/imgcache/2013/09/pImg_08e40c1e24456953d90e3106746f6988.png)