Udah bekau beberapa jam 8 iku sida sekaban ti kena tangkap polis, nyengkaum dua iku nembiak mit, bala orang di serata menua Sarawak tekenyit meda pemerani siku nembiak mit bansa Penan ti sama enggau orang ngibun empang jalai ba tekat Murum.
Iya agi kelalu biak. Sarawak Report diterangka, nama nembiak nya Peter Senang lalu umur iya baru 6 taun!
Tang dalam nembiak mit nya bisi panchar bintang ti terang lalu bisi mega semengat nyadi tuai, ti endur siku tuai menua ti rangka Taib Mahmud enggau CEO SEB bebansa Norway, Torstein Sjotveit, patut numpuka perati sida ngagai sada nyawa ti mit tu.
Jaku enggau gambar iya direkod ngena kamera ti mudah ba tengah petang ba tapak empang jalai, nembiak nya udah meranika diri bejaku ba mua kamera. Bejaku enggau lantang sereta terang ngagai Taib Mahmud, lalu ngela iya siku “penipu” ti udah ngerampas tanah enggau pesaka sereta ngerusak sebengkah kandang menua ti pemadu manah rampa di dunya tu.
Dikelingi bala bakih ti sama rebak iya, ti sama meranika diri, enggau mega bala orang ti besai, ti ngiring iya bejaku nya. Sapa raban ‘NGO ari menua luar ti ngachuk’ nembiak mit nya mansutka jaku kutuk iya ngagai Taib Mahmud?
AGI MAYUH DIPASUKKA DALAM RUMAH PASUNG BALAI POLIS BELAGA KENA HARI LIMA NYIN KEMARI
Cherita nya pansut kena lemai hari Lima nyin kemari nya pasal dua iku bansa Penan kena tangkap, lebuh seduai datai ba balai polis Belaga laban deka betanyaka berita pasal 8 iku kaban belayan sida (nyengkaum dua iku nembiak mit) ti ditangkap dulu ari nya.
Dua iku nembiak ti kena tangkap nya Philip Bujang, ti baru beumur 16 taun enggau Merit Gadong, 21 taun. Nembiak bukai ti kena tangkap baru beumur 13 taun enggau siku agi bakih ti sama rebak enggau iya, ti ngambi gambar ulah bala polis ba sida ba tapak empang jalai kena hari Empat nyin kemari.
Kebuah polis ti nangkap sida nya laban bepelasarka tuduh ‘beduan orang’ ti direpotka dua iku ‘orang periman’, ti endur raban polis madahka bansa Penan ba empang jalai nya balat bepintaka ari sapa-sapa ti deka meraka ketegal sida ti udah lenyau pendiau laban ditiki ai tekat Murum nya.
Sarawak Report diatu ulih madahka, repot polis nya endang bepun ari kompeni enggi menua Sarawak, Sarawak Energy Berhad, ti benung charut enggau raban bansa Penan nya. Ke terubah iya, bekaul enggau pemindah ti bepejal lalu kedua, bayar pampas ti kelalu mimit.
CEO SEB bebansa Norway, Torstein Sjotveit, udah berandau dalam sebuah laman web becheritaka pasal tuduh munyi repot polis ti digaga iya. Penemu iya ba pekara nya nunjukka iya endang bisi bekaul enggau pengawa ngaga repot polis nya.
Ke bendar iya raban NGO ti bisi betemu enggau bansa Penan udah ngamatka penerang ti madahka sida ngumpul sedekah dikena sida nyukung pengawa ngibun empang jalai nya. Sigi tin ti ngundan mata duit ba penyampau RM700 (US$220) udah dirampas polis. Nitihka penerang ari pengari NGO, bansa Penan nya semina mgai tin ti betulis “BANTU KE ORANG TASAH MURUM” – Permupa. Sebarang sapa ti deka meraka empang sida endang ditanya dulu sekali ke sida deka meri enggau peneka diri empu. Bansa Penan dia nadai mejal orang mayuh. Nya ukai tol chukai jalai baka ti disebut raban polis tauka SEB.
Ari pendiau bansa Penan ti nelap nya, SEB tau meri pengarap ke orang Sarawak ti madahka ruang bilik bala orang diri sebilik bansa Penan nya balat mejal sapa-sapa ti deka meraka empang jalai nya.
Bansa Penan nya madahka sida enda ngempang jalai enggau chara ti balat regas, tang semina nagang pemasuk perengka pengangkut enggi SEB ti ngundan barang projek dibai masuk ngagai tekat Murum lalu mega nagang kerita anak kompeni Shin Yang ti benung ngaga jalai anak ngagai endur nya.
![“Kami enda tau enda ngambi tindak” – berita dalam Borneo Post ngamatka tindak raban polis belalauka penerang ‘orang periman’: “kami patut betindak udah bekau kami nerima repot ari mensia mayuh … ti udah ngujungka kami patut ngelawa endur nya bejalaika pansik”](/wp-content/uploads/imgcache/2013/11/pImg_cda2e419f92215cd1e23f447524aa02b.png)
Lepaska bansa Penan!
Gerempung-gerempung NGO enggau bala pemerati pekara pengelantang mensia diatu deka nemu nama kebuah polis nangkap bala nembiak mit enggau siku nembiak ti baru beumur 21 taun lebuh seduai ti ngelawa balai polis Belaga laban deka betanyaka berita ari sida diri semenua ti benung dalam rumah pasung polis nya?
Lawyer pengelantang mensia Abun Sui ti ngarika raban bansa asal nya, benung dalam pejalai iya pulai ngulu sebengkah krisis di menua Sabah.
Berebak enggau nya, sebengkah serebana ari raban NGO Switzerland, Bruno Manser Fund ti ditujuka ngagai CEO kompeni SEB Torstein Sjotveit, awakka ngelepaska dua iku nembiak bansa Penan ti kena tangkap ba tapak empang jalai udah disaut iya enggau jaku ti enggai masuk champur dalam pengawa polis.
Sekali agi CEO ti sumbung nya lalu nyalahka ‘jaku achuk’ raban ‘NGO ari menua tasik’ lalu madahka batang pengawa iya ‘mantu’ orang bansa asal Sarawak.
![Deka tinduk – Torstein (muak ke kiba) ti nerima gaji lebih sejuta ringgit setaun nya madahka diri balat kiruh mantu raban bansa asal Sarawak (enggau chara ngampuhka rampa menua sida) taja pan sida mengkang ngenggaika bantu iya nya.](/wp-content/uploads/imgcache/2013/11/pImg_47fe7f6620f1942d6563ba0f48801f18.png)
Deka tinduk
Enggau nya, Datuk Sjotveit, ti udah ringat bendar lalu laun tinduk laban kiruh betuliska email beapi-api sereta betelefon enggau bala lawyer iya, laban anak enggau bini di menua “Oslo ti chelap” nya udah nerima sepuchuk surat tesau, diatu tau tinduk jenak laban udah besabi penemu enggau raban polis ngatur pengawa nangkap nembiak Penan ti baru beumur 13 taun, ti diatu benung dalam rumah pasung balai polis Belaga.
Diatu ‘munsuh’ iya ti baru nya jauh bendar biak sereta mit. Deka enda kini Datuk Sjotveit nganjung raban polis nangkap anak mit tu pagila?
Kami deka meri buah penemu awakka CEO bebansa Norway ti kelalu berani nya patut nyurutka diri dulu lalu berunding sebedau iya nyingkang jauh agi. Iya enggau bos iya ti kelalu rangka, Abdul Taib Mahmud nya, tentu deka betemu enggau siku orang ti jauh besai agi ari seduai.
![Jaku ari siku nembiak ti mit ti ngemeranika diri ngenang nasit bala kaban iya ti kena tangkap perintah.](/wp-content/uploads/imgcache/2013/11/pImg_d858256eafe7093890c432c29ac8b6df.png)