Dalam adat menua, leka jaku ‘Dayak’ nya enda dikelala nyadika leka jaku, laban bepelasarka penemu ti madahka orang bansa asal Sarawak enda diperansang ngumbai diri nya sebengkah menua, tang nyadika sebengkah raban ti tau dibagi-bagi lalu diperintah.
Tang baka ni chara ti betul agi nyebut nama bansa orang asal ti udah nyerahka pengeraja asal tanah sida ti besai bendar rampa dikena nambahka pengeraja bala tuai di Malaya enggau agen-agen sida di Sarawak empu (Taib Mahmud enggau bala kroni BN iya)?
Dalam langgur pekara belanja (bajet) BN endang silik diterangka: RM76 billion deka diambi ari menua Sarawak, lalu beserimbai enggau nya RM2 billion deka diperanakka baru ba pengawa pemansang enggau perengka diguna ba semua kandang endur ti agi jauh tinggal ba arus pemansang di menua Malaysia.
Lalu nambahka nya, RM16 billion ditagaka ngagai opis Menteri Besai Malaysia!
Rampas tanah-tanah NCR ti dikereja Sarawak Foundation
Siti chunto penanggul udah dibantaika ba pun minggu tu tadi, ti endur siti agi kes rampas tanah NCR ti dibai bala orang ari Rumah Ugoh, Sungai Entuloh, pelilih menua Merirai di Baleh, Kapit.
Konsesyen ngulihka kayu batang ba rampa 2,688 hektar pemesai tanah orang asal nya udah diserahka Opis Kampung Taib Mahmud ngagai sebengkah kompeni ti benama Sanjung Etika Sdn Bhd.
Kenyau ari 2010 suba kompeni tu udah nebang rampa kampung sida lalu mengkang enggai berundingka sebarang pampas. Nitihka penerang ari pengari orang di menua nya, Jesse Jimbun, meda diri lalu nadai dibayar kompeni nya pampas dia bala orang ti di menua nya lalu ngaga repot polis, Opis Tanah enggau Survei enggau Opis D.O pasal keruga kompeni nya, tang nadai sebarang tindak ari opis-opis nya tadi.
Bala orang ti di menua nya lalu nirika empang jalai dikena sida nagang pejalai tama ngagai kandang menua sida, tang pengawa nya mega enda dikibuhka. Sida diarika siku lawyer, Abun Sui Anyit ti madah ngagai Sarawak Report. Lawyer nya madahka bala orang menua nya suah mai kompeni nya berundingka pampas tang nadai kala mujur, lalu udah nya sida mutuska runding mai kes nya ngagai kot.
Nya alai, sapa mih di belakang kompeni tu, ti bejalaika chara beduan, lalu mai penusah enggau pengerugi ba belanja ngagai bansa Dayak ba tanah sida empu nya?
Kompeni Sanjung Etika Sdn Bhd nya seratus persen diempu sebengkah gerempung perintah, iya nya Sarawak Foundation tauka Yayasan Sarawak, ti ba asal iya ditumbuhka dikena mantu “semua raban bansa asal” dalam pekara pelajar, munyi ti ditusui dalam video korporat sida empu dalam taun 1971 suba.
Nama penguntung ke raban bansa Dayak?
Buah runding ke sistem nyerahka konsesyen kayu batang ngagai gerempung awam baka Yayasan Sarawak enggau gerempung pekara pengelantang ti bukai, baka Tabung Islam, nya endang dikena meri penguntung ngagai pejalai gerempung-gerempung nya.
Tang bisi mayuh jaku bantah ba pekara tu. Ke terubah, nama kebuah gerempung awam patut nambahka belanja sida ari ti ngeruga kampung enggau tanah orang bansa asal? Ke dua, ba senentang ni endur gerempung nya tau dikarapka?
Sanjung Etika udah meri sab-kontrak pengawa ngulihka kayu batang ngagai sebengkah kompeni ti endang bisi kaul enggau Taib Mahmud, iya nya kompeni KTS enggi sida Lau sebilik, ti beempu kontraktor Recent Timber Sdn Bhd.
Yayasan Sarawak lalu bedau ngeluarka sebarang penerang pasal baka ni sida ngatur pemeri-pemeri ari Opis Menteri Perambu Pengawa enggau Pengeraja Asal ti betuaika Taib lalu sida nadai kiruhka tauka irau ke orang ti beempu tanah ti dikeruga sida. Sida semina meri pengawa ngeruga kampung enggau tanah ngagai raban orang ti bependiau kasar baka sida Lau sebilik.
Enti sebengkah kompeni awam dipinta ngeluarka penerang pekara belanja enggau rintai reta tengkira kompeni sereta pejalai atur pengawa sida, nama kebuah sebengkah gerempung awam enda dipinta ngereja pengawa baka nya?
Kes ti bansa tu endang bisi bendar kaul enggau menua-menua ti dipejalaika ngena atur demokrasi, nama kebuah Malaysia enda ngemerankan atur nya taja pan sida suah ngumbai diri menua bedemokrasi?
Duit enggau belanja ti dituruka dalam Yayasan Sarawak nya datai ari pengawa ngeruga kandang menua enggau kampung asal enggi bansa Dayak, tang bansa Dayak nya semina mimit aja ti diberi peluang ngena belanja ari gerempung n
Tuju Yayasan Sarawak ditumbuhka dikena melanja pengawa pelajar, suah agi sida ti belajar ke menua tasik, dikena ngangkatka pengelandik raban bansa asal di Sarawak. Tang penanggul ti udah ditemu diatu nya mimit bendar raban bansa Dayak bisi diberi peluang ngena duit bantu belajar ari gerempung nya.
Naka ke ditemu semina bala anak orang Islam ti dikelala enggau sekeda bala anak bebansa China ti mujur bulih duit bantu ari Yayasan Sarawak nya, ti datai ari pengawa ngeruga kandang menua orang asal ti seranta.
Ari rintai bala pemesai dalam gerempung nya, enda mar kitai deka meda sapa-sapa ti udah dipaduka Lembaga Pengarah ti betuaika Taib Mahmud.
Enggau rintai nama bala pengarah ti baka tu, baka ni ku perintah menua Sarawak enggi Taib Mahmud tau ngumbai diri meri peluang ti enda besiping ke semua bansa?
Tang dikena nyeliahka jaku bantah orang mayuh, Taib semina maduka siku aja orang bansa Dayak sama duduk dalam Lembaga Pengarah dalam gerempung nya, iya nya bini siku bakih Taib, Empiang Jabu
Orang baka Alfred Jabu nya udah ngaga pemutus runding nyual nama enggau semengat raban bansa iya empu dikena iya ngulihka pengeraja ke sida sebilik ari tanah-tanah enggau kontrak-kontrak ti diberi Taib.
Bini Jabu nya mega nyadika siku ari pengarah ba mayuh bengkah kompeni iya empu ti bulih kontrak ti besai-besai ari perintah menua, sama enggau bala anak iya enggau anak petunggal Jabu enggau anak lelaki Jabu mega, baka ti kala ditusui kami ba artikel kami dulu ari tu.
Bini Jabu udah dipilih ngambika ngemataka pekara pelajar bala anak Dayak Kristian ti ngarapka diri mujur dalam sekula, nyerumba bala bakih sida bepengarap Islam enggau bebansa China.
Lalu ba ninting taun bala nembiak bansa asal Sarawak kala didinga serebanaka diri enda mujur bulih bantu belajar ti endang patut diterima sida, tauka nemu diri disiping ketegal nyelai jalai pengarap tauka bansa, angka kira-kira nunjukka pemansang ba pekara tu udah ngayanka Taib agi puntan ngemansangka pengelandik bekereja ke bala anak orang raban bansa asal baka ti suah dipanjungka iya.
Ke terubah tu aram kitai beratika serebana raban sida ti nembiak ari menua pesisir, ti patut dibantu menua Sarawak ba pekara pelajar:
Ikas nemu macha ba orang di menua pesisir di Sarawak nya 72%. Ikas nemu macha ba orang bansa asal, ti udah disukat dalam taun 2001, nya 51%. Semina 20-40% ari bala nembiak ti udah tembu belajar ba sekula primari udah masuk ngagai sekula sekondari. 40-60% ari bala sida ti datai ba sekula sekondari renggat ti baruh (Pom 1, 2, enggau 3) enda ulih nampung sekula tinggi agi (repot ari UNESCO Malaysia 2008)
Udah nya aram kitai beratika angka kira-kira enggi menua Sarawak empu, ti nunjukka lebuh bansa Iban dalam pengawa bekuli diarika 30.5% ari semua penyampau tubuh sida, semina 15.5% aja udah nampung belajar ngagai ikas tinggi agi. Angka tu dibandingka enggau raban bansa Melayu, ti bisi dua kali lipat pemayuh bala nembiak ti bulih degree, taja penyampau tubuh sida iya mimit agi.
Baka nya mega, diatu raban bansa Melayu ti mayuh agi tubuh dalam sektor pengereja pengawa. Enti raban bansa Dayak udah dipejal nyerahka tanah enggau rampa menua sida ngagai Yayasan Sarawak, sida tentu ulih meda enggau ngasaika asil iya nya sebaka bagi dalam peluang belajar ke bala anak sida.
Lalu bala orang di Sarawak bisi kuasa beratika rintai nama bala nembiak ti bulih belanja bantu ari sebengkah gerempung ti endur nurukka belanja asil ari ngeruga tanah enggau rampa menua, enggau nya kami minta Yayasan Sarawak ngeluarka rintai nama nya.