![Orang bansa asal ngemesaika penyalah ngerampas tanah dikereja sida Taib sebilik](/wp-content/uploads/imgcache/2013/11/pImg_98e0d002f4d591aa5dc556ece853fdaa.jpg)
Sekali agi bala orang bansa asal di Sarawak enda tau enda pansut lalu mantah penyalah ngerampas tanah dikereja sekeda orang ti rangka enggau chara ti enda betagang.
Sekali agi sebengkah endur ti manah ti besai bendar rampa lalu bisi ngembuan cherita lama udah belabuh kena keruga.
Lalu sekali agi penyalah nya dikereja sida Taib Mahmud sebilik ti balat bendar rangka ba sebengkah kandang endur ti bebukit ti pemadu tuchi Sarawak lalu kandang endur ti bisi ngembuan cherita lama ti nyelai.
Ba ujung minggu tu tadi bala orang bansa asal ari 17 buah genturung pendiau bansa Bidayuh udah begempuru ba pasar Siniawan laban deka mantaika kes ngerampas tanah ti baru ditemu sida, ba sebengkah kandang endur enggi sida, iya nya Gunung Serumbu.
Nitihka repot sida, sida madahka dalam pengelama dua bulan dia kompeni kuari nya udah nebang sereta nerangka rampa menua dia lalu besedia deka ngulihka asil batu granit ti berega. Bala orang di menua nya nadai kala dibai besaraka penemu lalu pengerusak nya dikereja ba pun penatai ai enggau endur ti tuchi sereta besai reti ke orang menua nya, lalu mega nadai ngeluarka sebarang repot pansik empas projek ba rampa menua.
Bala orang bansa asal di endur nya udah nganjung 2 iti repot polis lalu mega enda kurang ari 5 puchuk surat ti ditujuka sida ngagai kompeni nya, enggau mega ngagai Opis Tanah & Survei. Sida mega bisi nuliska serebana sida ngagai tiap iku pengari rakyat ti udah dipilih sida di endur nya.
![Aku meda diri empu nyadika orang ti rindu meri tulung – Pengarah ba kompeni Serambu Quarry, Robert Geneid](/wp-content/uploads/imgcache/2013/11/pImg_6f56eb51ef80a5395b964488f39d5a46.png)
Tang ba cherita ti ngenyinuka ati tu, baka selama mega, bala orang di menua nya nadai nerima sebarang saut ari opis-opis ti patut ngelindung orang mayuh.
Pemendar dikena tama ngagai kandang menua nya udah diberi lalu nadai ditanya, ngagai sebuah kompeni ti dipejalaika ngena nama ti tau ngasuh saru ketegal sengaja salah sepil ba nama Serambu Quarry Sdn Bhd.
Lalu tentu iya bisi kebuah ti terang bendar.
Sarawak Report ulih mantaika Pengarah kompeni nya benama Robert Geneid, siku Pengarah Urusan dalam Opis Pemansang Reta CMS dulu suba, ti mega ipar ke Kepala Menteri Sarawak Abdul Taib Mahmud.
Lalu pekara ti nyelai mimit mega lebuh kitai tetemuka orang ti megai syer kompeni pemadu mayuh dalam Serambu Quarry nya bini iya empu, iya nya menyadi indu Kepala Menteri, Raziah Mahmud.
Baka ti suah dikenang kita, Raziah enggau laki iya Robert Geneid udah terang bendar nyadi pemun penyalah ngeruga sereta ngerampas tanah pemadu rangka sereta tampak rita di Sarawak.
Tang ba sekeda ketegal ti enda diterangka ngagai orang mayuh, Gunung Serumbu ngembuan cherita lama iya empu. Nyadika sebuah tapak cherita lama Sarawak, pengerusak rampa menua ti dikereja siku orang ti ‘mentas nulung orang bukai’ ti suah ngumbai diri nyadika pengatur pengawa ‘main asal enggau dagang temuai’ udah ngeruga rampa menua enggau chara ti kelalu balat.
![Saya menggambarkan diri saya sebagai dermawan - Pengarah Serambu Quarry, Robert Geneid](/wp-content/uploads/imgcache/2013/11/pImg_01c7b8295ca81084771b53e2dea7c165.png)
Dalam pengelama tiga hari beturut tu Sarawak Report udah nusui enggau silik baka ni Robert Geneid ngulihka penguntung bejuta-juta ringgit duit wang turu menua ari projek Bandar Samariang CMS, ti disukung ipar iya empu Taib Mahmud ti meri kebuah ke projek nya dikena mantu raban orang ti seranta di Kuching.
![Rindu ke perengka penganta iya ti berega – Raziah Mahmud-Geneid](/wp-content/uploads/imgcache/2013/11/pImg_adaa2992e493366d79a54d6a837d5f16.png)
Tang agi mayuh kompeni enggau pengawa ngerampas tanah dikaitka enggau orang dua iku melaki bini tu, ti udah salahguna kaul seduai ti nyadi kaban belayan Kepala Menteri ti bekuasa nya dikena seduai ngengkahka jari seduai ba kandang menua ti bisi ngembuan cherita lama, nyengkaum kandang menua enggi bansa Berawan di Mulu, kandang menua enggi bansa Iban di Sebangan, Kampung Galau Ensengei enggau mayuh agi kandang menua ti besai guna di Sarawak.
Orang dua iku melaki bini nya bejalaika mayuh bengkah kompeni ari opis-opis seduai di Kuching, mayuh agi ari kompeni nya nerima kontrak besai-besai enggau rampa tanah ti besai di Sarawak, terima kasih ke kuasa menyadi Raziah empu, Abdul Taib Mahmud.
Batang pengawa kompeni-kompeni seduai tu dipejalai baka reti ‘kerubung’, nyerahka sab-kontrak seduai ngagai kompeni bukai ti endang landik dalam pengawa sida, lalu beserimbai enggau nya ngulihka tanduk duit agih ti mayuh ari “batang” pengawa seduai.
Raziah ti rindu masuk nyadi kaban lembaga pengarah dalam mayuh bengkah kompeni, suah dipeda chakah ngulihka pemendar dikena bejalaika pengawa-pengawa sida.
Penyalah makai suap ti balat dikereja dalam perintah menua ti betuaika Abdul Taib Mahmud mai reti, siti chara bejamin dikena ngulihka peluang nerima lisin enggau kontrak nya ngena chara ngambi raban sida sebilik nyadi kaban pengarah lalu meri sida syer ti besai-besai.
Ambi ke banding, Raziah dipaduka nyadi Pengarah dalam Quality Concrete, sebengkah kompeni ti udah enda tau enda ngelepaska pemendar sida ngulihka kayu batang enggau chara ti enda beradat ari kampung di Sebangan, udah bekau bala orang di menua nya udah chakah bendar bejalaika kimpin dikena sida nyelamatka tanah NCR sida.
Baka nya mega, Raziah enggau Robert diatu masuk dagang kunsi enggau bala sida Yong sebilik ti ngulihka peluang endur masuk kandang menua ti bisi ngundan cherita lama sereta sensitif di menua Sarawak. Raziah udah diagihka siti syer lebih ari setengah pemayuh semua syer dalam kompeni nya!
![Rega ke bagi iya – pegai syer pemadu besai diagihka ngagai Raziah Mahmud-Geneid!](/wp-content/uploads/imgcache/2013/11/pImg_0556eb63ec42f655c36ce48f36f06d67.png)
Tang enti sema Robert enggau Raziah mujur bulih pegai syer pemadu besai ketegal seduai ti kaban belayan enggau Kepala Menteri, reti nya pegai syer ti mit-mit dalam kompeni nya meri gambar ti ngenyinuka ati baka ni atur perintah Sarawak dipejalaika Abdul Taib Mahmud.
Datuk Leo Chai nya siku Pengarah ke dulu suba dalam Opis Kampung Sarawak. Iya patut nemu agi pemesai reti ngemataka pemanah sebuah rampa menua enggau ti ngembuan cherita lama ari kena keruga pengawa ngulihka kayu batang enggau ngulihka asil tanah.
![Pesaka asal rampa menua ti agi bepanggai idup ba sebuah kampung bungas di Sarawak](/wp-content/uploads/imgcache/2013/11/pImg_363949a70259f367f2679645574c92d3.jpg)
Tang iya mega patut nemu agi, enggau ngulihka penemu enggau pengaruh ba atas sebarang kandang kampung galau Sarawak lalu baka ni deka begunaka iya!
Gunung Serumbu enggau “Undang-undang Sarawak”
Gunung Serumbu enggau pemanah rampa menua iya nyadika pengari sebuah tapak ti besai bendar reti ba cherita lama enggau pesaka rampa menua ti ba ikas dunya.
Ba endur tu mih Rajah Ribai Sarawak ke terubah, Sir James Brooke ngaga rumah pengenduh iya, ti tau dipeda bala temuai enggau bala orang ti niki gunung nya.
Pekara ti besai agi reti nya, ditu mih endur siku orang kelia ti landik pasal rampa menua ti mega nyadi kaban Charles Darwin bejalaika pansik beduduk ba teori evolusyen iya nengkebang utai ti dikumbai iya ‘Sarawak Law (Undang-undang Sarawak)’.
![Patung Alfred Wallace, dipandangka di London ba pun bulan tu tadi](/wp-content/uploads/imgcache/2013/11/pImg_b3bb54c11c1c4108900dc4bf6d6f9ea3.png)
Alfred Wallace udah dikangauka Rajah Brooke bejalaika pansik iya ba Gunung Serumbu lalu ba endur nya mih iya nuliska rekod iya ba semua macham leman utai tumbuh enggau utai idup ti ditemu iya.
Taun tu genap taun keseratus dikena ngingatka Alfred Wallace ti dirami ngena sekeda jaku penerang enggau pengerami ti besai di serata dunya, nyengkaum sebuah jaku penerang ari siku orang ti landik ba pekara rampa menua ti tebilang, David Attenborough ba Muzium Cherita Lama Rampa Menua di nengeri London ba pun bulan tu tadi lalu ditangkanka pengawa ngelancharka patung Alfred Wallace dikena ngingat sereta meri basa ke iya.
Pekara ti ngenyinuka ati kitai diatu lebuh kitai meda kandang menua ti besai bendar reti ba pengidup Wallace nya udah dirusak ba hari dikena ngingatka iya.
Ari dulu suba Wallace endang ulih meragamka pemasuk bala orang ti rangka ti deka ngeruga rampa menua baka sida Abdul taib Mahmud.
Wallace udah chakah bendar ngansak mayuh perintah enggau institusyen sida ngambika nyaga sereta ngintu rampa menua enggau semua macham leman utai tumbuh enggau utai idup ti agi bisi ba planet baka di Sarawak.
Lebuh maya orang bisi nemu sereta meratika rampa menua, iya udah ngelala, rampa menua kena keruga ketegal dosa rangka mensia ti dikereja ba mua mata diri empu.
Baka ni munyi saut Taib Mahmud pasal tindak enggau pengerangka sida sebilik ti seruran ngumbai diri bebasaka pemanah rampa menua?
Raziah enggau Robert udah nemuai ngagai menua Monaco laban ti deka ngangauka Putera Albert nemuai ngagai palan temuai di Mulu lalu udah nya nyuaka duit bantu dikena nyukung pengerami ngayanka Fesyen Islam, semua nya dipejalaika dikena sida nyukung wang turu ti endang ditagaka dikena ….. nyelamatka rampa menua.
![Raziah enggau Robert ngelaluka penemuai Putera Albert ngagai Mulu – nyadika sebengkah atur pengawa dikena nyukung wang turu nyaga pemanah rampa menua.](/wp-content/uploads/imgcache/2013/11/pImg_32375d5918465eafa99c33953c0397c5.png)
Raban bansa Bidayuh ari kandang menua Serumbu ti idup rumpas, penuh basa ke orang bukai nya, diatu begunaka sukung menua Malaysia empu enggau orang mayuh ba ikas entarabansa nyaga pesaka asal sida ari kena keruga kerita lipan enggi sida Taib Mahmud sebilik.