![Sebaka enggau iya ti diayanka nengah iklan, sebuah reta ti ngundan ruang ti besai bendar](/wp-content/uploads/imgcache/2014/01/pImg_03bd3693318c20195a104c88911eb8c4.jpg)
Raja pengaga wayang ti jampat bendar tampak nama, Riza Aziz ti beempu kompeni Red Granite Pictures, bisi ditemu kami udah meli sebuah rumah besai di Hollywood ba sebengkah pelilih menua pemadu mar di Beverly Hills ti bisi sukut timpai nunga ngagai kandang negeri Los Angeles.
Diatu Sarawak Report ulih ngamatka Riza Aziz ti baru beumur 36 taun nya, ke terubah iya, iya bekereja ba bank HSBC London, udah ditemu mujur meli sebuah rumah besai di 912 N Hillcrest Road ba rega $17.5 juta ba bulan Semilan taun 2010 nyin kemari.
Reta nya ba pemesai 11,500 kaki besegi lalu bisi 5 buah bilik tinduk enggau 10 buah bilik mandi. Sukut timpai iya nunga sebuah pegung endur nyemerai ti besai bendar lalu mega nunga kandang nengeri Hollywood Timur.
Rumah nya dikelingi kandang endur ti tebilang sereta besai bendar rampa, mayuh agi rumah dia enggi bala orang ti beberita ba pengawa ngaga wayang.
![Indu opis Red Granite bepalan ba tingkat 7](/wp-content/uploads/imgcache/2014/01/pImg_90fc94c156dab3361147c01eef0baf56.jpg)
Bas ti mai bala temuai ari serata dunya bisi dipeda mansa-mansa ba takat maya ti tetap lalu kerita ti besai sereta berega mar mega bisi dipeda kin-kitu nengah jalai alun ti nadai orang dipeda bejalai kaki.
Rumah besai 912 North Hillcrest Road nya semina beberapa singkang ari endur nya (enti bisi sekeda ari kitai sanggup bejalai kaki) ari indu opis Red Granite Pictures ti dipeda manah bendar ba Sunset Boulevard.
Endur tu mega dipelalaika kompeni ti udah dipaduka ngemataka reta nya enggaika ditemu orang mayuh.
Tang seninjik bendar Sarawak Report udah mujur nemuai ngagai tingkat 7 endur nya lalu ngamatka penerang ti madahka endur nya disikap ngena perengka ti sereba baru sereta manah.
Ruang rumah nya disewa ba rega $3.75 sekaki besegi ti endur tiap tingkat iya mungkur kandang endur ba pemesai 11, 600 kaki besegi, ti nunjukka sewa bulan iya manggai lebih $20,000 ke sebuah kompeni ti baru melanja pengawa ngaga wayang.
![Aram! Rerak kitai rumah tu lalu ngaga baru. 912 N Hillcrest ke diatu!](/wp-content/uploads/imgcache/2014/01/pImg_1ce873e9d4bad87f6c29ea74018acf66.jpg)
![Kami tepedaka tapak enggi Red Granite lalu mega ruang opis sida](/wp-content/uploads/imgcache/2014/01/pImg_9eec72886766cc15eef033cddf5c2845.jpg)
Rumah besai Riza Aziz nya enda direjista atas nama iya empu, tang ngena nama kompeni ti benama 912 North Hillcrest Road (BH) LLC, ti direjista ba pelilih menua Delaware, sebengkah pelilih menua ti manah endur bala orang dagang ti deka nyeliahka diri ari chukai.
Tang kompeni Nigro Karlin Segal Feldstein & Boino (NKSFB) ti ngemataka reta nya, dagang ngatika diri enggau pengaya Riza Aziz udah ngamatka penerang madahka reta nya endang enggi Riza Aziz.
Lalu lebuh kami nemuai ngagai endur nya ba minggu nyin kemari kami meda rumah nya udah direrak lalu benung digaga baru ngambika manah agi.
Sekeda ari gambar iklan (di atas nya) ngayanka gaya rumah ti dulu agi, ti nitihka penerang bala orang ti diau semak nya dia, udah diubah sebedau iya dijual ngagai Riza Aziz dalam taun 2010.
![Bilik ti besadiaui buka benung diubah dikena ngambarka konsep tebuka](/wp-content/uploads/imgcache/2014/01/pImg_dfa1fc8c4fa7143eac105c700c29296c.jpg)
Lantai iya benung digaga raban kontraktor Winters Schram.
Kami bisi mega dipadahka endur nya deka digagaka pegung endur mandi ti “besar bendar” adap ke mua rumah nya.
Kami meda mayuh pengereja pengawa benung bekereja ba endur nya lalu bisi sekeda sida benung ngatur rampa lanskap.
![Besai sereta lantang endur](/wp-content/uploads/imgcache/2014/01/pImg_aae8277fc6dcf617f0e919cbe96b9d4d.jpg)
Nitihka cherita pemeri penerang kami, ungkus ngubah rumah nya manggai bejuta-juta dollar lebih ari rega asal rumah nya, ti nyadika rega rumah nya tinggi agi ari $33.5 juta ti udah dibayar Riza Aziz ba reta ti dibeli iya di menua New York dalam taun 2012 baka ti kala ditusui kami dulu ari tu.
Portal berita reta tengkira di endur nya madahka rumah ti dibeli Riza Aziz ba pelilih Park Laurel 15 West 63rd Street nya sebuah ari sekeda rumah pemadu mar di indu nengeri nya.
Rega rumah nya dipeda sebanding enggau rumah ti dibeli bakih iya, Jho Low, siku nembiak kaya ari Malaysia ti udu bekontroversi, iya nya sebuah rumah gaya penthouse ba Menara Trump, ti mega berega $33.5 juta.
![Pengawa benung dikereja ba tapak rumah besai nya](/wp-content/uploads/imgcache/2014/01/pImg_3f141e5278a48af0c70fbbb4efdbd880.jpg)
Lebuh maya Krismas rayat Malaysia udah tekenyit lebuh ninga berita Riza Aziz udah meli rumah berega bejuta-juta dollar di menua New York dibantaika ngagai mensia mayuh.
Engka diatu rayat Malaysia enda agi tekenyit lebuh sida nemu Riza Aziz, ti deka beranakka puku dagang iya ba pengawa ngaga wayang, udah ngentapka opis iya di Hollywood enggau mega rumah ti besai agi?
Tang, sekali agi, jaku tanya ti disungkak ditu nya ari ni pun penatai pengereja iya?
Mujuk orang bukai sama enggau beranakka puku dagang beratus juta dollar ba wayang nya siti pekara, lalu bebelika rumah enggau reta tengkira nya pekara ti bukai.
Nyadika siku orang ti bisi kaul dalam politik ti dibantaika di Malaysia Riza Aziz enggau sida indai iya sebilikdipinta meri penerang baka ni sida ulih ngeluarka belanja dikena bebelika reta tengkira baka rumah besai, kelimpah ari ti ngulihka duit bejuta dollar dikena melanja wayang Wolf of Wall Street?
Kompeni raban lawyer Loeb & Loeb, ti udah nulung numbuh sereta ngerejista Red Granite dalam taun 2010, diatu nyadika penyanding penemu ke Riza Aziz ba pekara penampak pengawa dagang iya.
![Pengemata kes Channing Johnson nya laki Pengarah dalam NKSFB Debra Johnson, ti ngemataka pengawa dagang Riza Aziz](/wp-content/uploads/imgcache/2014/01/pImg_5d993dda13615d7630a7e4b3166d1880.png)
Siku pangan dagang dalam Loeb & Loeb, Channing Johnson, ti udah ditujuka surat deka ngambi tindak undang-undang ba Sarawak Report udah diberi siti salin surat nya, laki Debra Johnson, siku pengarah dalam NKSFB, baka ti udah diterangka kami tadi, nya nyadika pengurus pengawa dagang ngarika Riza Aziz.
Kami minta Channing Johnson ari Loeb & Loeb ari bantu Riza Aziz empu enggau Debra Johnson meri ngagai kami semua macham penerang pasal pengawa melanja wayang nya.
Terubah iya, sida enda patut balalaika utai tu lalu ke dua, laban Riza Aziz enggau sida sebilik, sebaka reti enggau Presiden Obama ari menua US, endang orang ti bisi kaul enggau politik ti benung dibantaika.
Presiden Obama empu endang meruan ngeluarka kira-kira pekara belanja iya ninting taun lalu mayuh bendar rayat Malaysia deka meda kaban politik sida empu nunda atur baka nya tauka abis nadai pan sida diberi kuasa betanyaka penampak kira-kira, lalu enda diemba ngena undang-undang menua diri empu.
Ngena peluang tu kami deka nemu nama kebuah nama Jho Low diberika tanda terima kasih ba wayang Wolf of Wall Street, taja pan bala lawyer dalam Loeb & Loeb udah madahka Jho Low nya nadai bekaul enggau pengawa ngaga tauka ngeluarka wayang nya?
Sekali ke nama iya bisi dia ketegal diasuh melanja bebutul-butul ai bisi champagne berega mar nya bisi kebuah ti bukai, taja pan tanda pengaga ati nya endang ditujuka enggau chara ti nyelai ari ti selama?
![Sewa endur nya, $40,000 sebulan ba 8500 Burton Way](/wp-content/uploads/imgcache/2014/01/pImg_8003562eab30a176148ee76baa86d8ca.png)
![Pengarah dalam NKSFB ti ngemataka akaun Riza Aziz](/wp-content/uploads/imgcache/2014/01/pImg_426d424f4ced138e8001cd5c15171e34.png)
Berebak enggau nya, bisi rekod madahka Riza diatu benung diau sementara ba sebuah rumah besai ti disewa iya, nganti rumah ti dibeli iya di Hollywood nya tembu digaga.
Iya udah diau ba ikas penthouse, sebuah rumah pemadu besai sewa di pelilih Hollywood iya nya di 8500 Burton Way
Kami udah nemuai ngagai rumah mar sereta besai ti baru nya ti diiklanka nyadika rumah Hollywood ti pemadu dikerinduka orang mayuh.
Diatu rayat Malaysia enda agi tekenyit udah nemu pasal pengeraja anak Rosmah Mansor nya ti benung diau di negeri LA. Semina rumah ti pemadu mar diperundingka Riza Aziz.
![Sebuah rumah penthouse ti berega mar di 8500 Burton](/wp-content/uploads/imgcache/2014/01/pImg_d7d6ec734f94df52352dd7f6f72d62b5.jpg)