![Lumur ti tau diubah turun-tiki – kuasa penuh enjin Bakun seruran berubah nitihka jaku gerah](/wp-content/uploads/imgcache/2014/01/pImg_5609598c752e24b648c837a5d9396056.jpg)
Pemeri penerang ari dalam Rumah Enjin Kuasa Elektrik Bakun udah madahka kami tekat lumur dua pemadu tinggi di dunya nya semina bejalaika setengah ari kuasa penuh iya.
Penerang nya ditiriska kena hari Empat minggu tu tadi berebak enggau pengawa ngelai hari ke-100 pengawa bala orang bansa asal ti ngempang jalai di Baram.
Tu udah meransang bala orang ti mantah projek nya mantaika jaku tanya nama kebuah Taib Mahmud keran bendar deka ngaga 12 buah agi tekat baka nya taja pan semua tekat ke bisi diatu ngeluarka kuasa elektrik lebih ari chukup.
Pengawa ngaga tekat ai Bakun suba endang diperambu dikena mekalka kuasa elektrik ngena kabel dalam tasik ngagai Semenanjung Malaysia lalu mega ngagai menua-menua bukai di pulau Borneo – sebengkah buah penemu ti enda ulih diguna.
Diatu Taib dipeda udah nguji mai masuk industri ti ‘aus’ kuasa elektrik digaga semak enggau Bakun, sebengkah pengawa pengeluar barang ti udah ditinggalka kompeni-kompeni ari menua tasik baka Rio Tinto Alcan ari ketegal ti deka nyaga pemanah nama sida bekaul enggau bebasaka kuasa pengelikun enggau pengelantang mensia.
SEB udah madahka ba maya ke diatu mayuh bendar peminta ba kuasa elektrik hidro.
Kami udah diterangka kuasa penuh 8 iti kipas turbin Bakun udah dikurang, nitihka penerang ari pengari sida, baka CEO Torstein, ari 300MW ngagai 200MW aja!
![Portal Malaysian Insider – lebuh dipinta nerangka nama kebuah beguna bendar ngaga mayuh agi tekat, Sjotveit dipeda besedia madahka kuasa kipas turbin nya semina ngeluarka 200MW kuasa aja!](/wp-content/uploads/imgcache/2014/01/pImg_27fad63b4d4858a676ef3e03b1e0c274.png)
Bakun, ti udah diisi lebih setaun tu udah, nitihka pematut iya dipejalai ngena 8 iti kipas turbin, tiap iti nya ulih ngeluarka kuasa 300MW. Semua kipas nya diperambuka dipejalaika ba ujung taun nyin kemari.
Enggau nya, nama kebuah agi deka ngaga mayuh agi tekat, taja pan balat dibantah orang ti bempu menua, taja pan Bakun dipejalaika setengah ari kuasa penuh iya?
![Palan pengelebur besi aluminum didirika ba atas kampung Sarawak](/wp-content/uploads/imgcache/2014/01/pImg_e4c4f00a90f4beace77c36498476e9ec.jpg)
Taib Mahmud endang merambu ngeluarka kuasa elektrik ti mayuh, enggau chara ngerusak sungai enggau rampa menua di Sarawak, endang dikena iya mai masuk palan pengeluar barang ti kamah-kamah ari menua tasik ti endang begunaka kuasa elektrik ti murah.
SCORE (Sarawak Corridor of Renewable Energy) endang besetuju perambu gila nya, nyerumba tuai perintah ti bisi kuasa ti kelalu lebih udah ngeregaska agi projek ti besai-besai baka nya, lalu enda irauka empas penanggul nya deka nuntung rampa menua enggau mensia mayuh.
Industri menua tasik ti dibai tama lalu bedagang nya nadai sebarang sidi, jurai tauka undang-undang, lalu langgur ngaga tekat ai di Sarawak deka mai penanggul, lalu orang bansa asal bisi kuasa mantah langgur pengawa nya.
![Gaya rumah orang di Sarawak, tang tu ukai nyadika tagit pengawa pemansang ti besai-besai](/wp-content/uploads/imgcache/2014/01/pImg_9c1b01b0e19f678965a875e8b2f32e6e.png)
Terang bendar, taja pan penemuai iya digembarka iya enggau jaku pasal ‘pemansang tu, pemansang nya’, Taib udah melakangka pengidup rayat iya empu lalu ngenuluka langgur tekat ai iya.
Enti enda nya, iya tentu ngiga projek bukai ke dipejalaika iya.
Sarawak bisi bepuluh-ribu iku orang asal ti idup nadai dibekalka enggau kuasa elektrik, lalu sida nya udah disemayaka deka diberi kuasa elektrik ari projek tekat ai ti besai-besai tu
Utai ti dikinginka tuai autokrat tu ngaga palan pengeluar barang (ti endang digaga kompeni sida sebilik) lalu mai tama kompeni-kompeni pengeluar kimia enggau pengelebur besi ari menua tasik ngagai kandang SCORE.
Ngaga loji kuasa elektrik ti mit-mit nya jauh murah agi lalu ulih dikena mantu ngangkatka pemanah pengidup orang di menua pesisir bebanding enggau pengawa mai tama palan pengeluar barang ari menua tasik ti tau mai pengamah ke angin enggau rampa menua.
Tang, loji kuasa ti mit-mit nya enda ulih meri kontrak ti besai ngagai kompeni di Sarawak ti bisi kaul politik, baka kompeni enggi sida Taib sebilik empu, CMS.
![Empang jalai di Baram – pengeliat ati udah meransang bala pemantah projek betan nyentuk ngagai 100 hari baka tu](/wp-content/uploads/imgcache/2014/01/pImg_0d62f348bdb519c27e32c3370fa5ca84.jpg)
Tu mih kebuah Kepala Menteri nya ngasaika diri empu nya benung charut enggau rayat iya empu.
Sebagi ari raban bansa asal Baram nya bisi di nengeri Miri minggu tu tadi laban sama deka ngintu hari ke-100 bantah sida ba tekat Baram ti betuaika Pengerusi Peter Kallang ari raban NGO Save Rivers.
Dua buah empang jalai nya udah mujur muru raban tukang pengaga tekat ai ari kompeni SEB ti datai ba dua iti tapak ti deka digagaka tekat nya di Baram, lebuh sida ti baru deka belabuh bekereja taun nyin kemari. Lalu bala orang bansa asal ti ngibun empang jalai nya udah mujur nagang bala raban SEB nya nikal kia baru.
![Raban bansa asal ti betan ba tapak empang jalai sida di Baram](/wp-content/uploads/imgcache/2014/01/pImg_9b7fdf42eee65dea6c1242c96c090670.jpg)
Ba pun bantah sida, bala orang politik BN udah ngansak SEB enggau perintah menua ngambika nyurutka diri ari projek Baram nya laban nangi pekara ti jai agi tau nyadi. Tang sida mengkang arapka semengat bantah bala orang bansa asal nya deka pudar-sepudar ila.
Enti utai tu amat, pengawa endur majakka projek nya diatu benung ngasaika tekan. Diatu nadai sebarang kelai orang bansa asal nya deka ngalahka diri, lalu ngemendarka Taib Mahmud berundingka chara bukai ti sekut-sekut sekali ke iya a) nyurutka kediri b) ngena atur pengasar tauka c) ngubah runding orang bansa asal ti mantah iya nya.
Sekali ke Taib udah merambu deka majakka penemu iya “dikena ngangkatka pemanah pengidup rayat iya” ngena kuasa soldadu? Sekali ke iya deka bulih sukung ari Perintah Besai? Engka nya enda.
Enggau nya, ulih tauka enda iya ngubah runding rayat iya. Pengawa iya nguji meri duit bantu ba maya Krismas nyin kemari udah direpotka ngagai opis polis laban sida ringat ke pengawa nya ti nguji nyuap sida.
Langgur penemu iya ke diatu nya ngemaduka kontrak pengawa CEO SEB Torstein Sjotveit ti majak enda dikerinduka orang mayuh lalu diganti siku anak bansa asal Sarawak empu, ari bansa Kelabit, ti benung bekereja enggau CMS, Isaac Lugun.
![Sjotveit, dikumbai udah nemuai ngagai menua Burma, ti endur iya deka mantu ngaga mayuh agi tekat ai di menua nya](/wp-content/uploads/imgcache/2014/01/pImg_97affabf589aabb7f88f8d8433e61d85.png)
Sjotveit tentu deka badu bekereja enggau kompeni SEB, nitihka penerang ari dalam SEB nya empu.
Kontrak gawa dua taun iya deka tembu ba ujung taun tu lalu kontrak nya enda digaga baru ulih tuan iya, Kepala Menteri Sarawak nya.
Enggau nya, penatai Isaac Lugun ke dalam SEB nya disadang nyadika perengka dikena mujuk orang bansa asal, ti semina ningaka cherita lama ti udah nuntung orang bansa asal di Bakun, Murum enggau mega di Batang Ai dikena sida mutuska runding sida nama kebuah sida enda tau arapka jaku semaya Taib ti deka ngangkatka pemanah pengidup sida.
Engka nya enda sekali-kali.
Agi bisi pemilih iya endur iya nyurutka diri. Tambah mega Taib udah suah bendar didinga besemaya deka ngetu bekereja, lalu nama kebuah iya enda ngubah runding iya bekaul enggau Baram mega?