![Jauh di tebing tasik lalu jauh pejalai ari pelilih Baram – Hotel Casuarina di KK](/wp-content/uploads/imgcache/2014/02/pImg_f2f1ed48f9060d93332ad88a9d966df1.jpg)
Sarawak Report udah dipadahka pasal pengawa Opis Kampung Sarawak, ti patut bejalaika pengawa di ngabas pengawa kompeni kayu batang udah ditemu nuliska repot pelesu sida ari bilik hotel sida ari hotel di tebing tasik, ti endang nadai ngabas kampung ti ditebang.
Pemeri penerang ari dalam Opis Kampung empu udah ngaku bejalaika pengawa nulis repot chara baka nya, ti munyi ku sida, pejalai sida endang diatur kompeni kayu batang ti besai-besai, ti melanjaka tambang pejalai sida datai ke beribu-ribu ringgit seminggu dikena merindang bala pemesai opis nya kelimpah ari ti meri sida ‘duit belanja’ awakka dikena ngelimpangka sida ari tama kampung ti deka diperesa sida.
Siku ari bala pengereja pengawa ti udah badu bekereja enggau kompeni kayu batang di pelilih Baram madahka ngagai kami ti endur mayuh ari kayu ti ditebang nya ditebang enda nitihka atur ti patut, lalu ngambika nyeliahka raban pemesai Opis Kampung meda asil tebang sida.
Pengelemi ba atur pengawa Opis Kampung, ti disalahguna kompeni nya, endang pengadang opis nya ngemendarka bala pemesai sida bepanggai ba perengka pengangkut kompeni ngabas kandang endur ti deka diperesa sida.
Sebedau penemuai sida ti deka meresa kampung, bala pemesai Opis Kampung nya deka madahka pejalai diri ngagai kompeni dulu ngambika sida madahka diri deka begunaka perengka pengangkut lalu udah nya randau pan dipejalaika.
Raban bala pemesai ari Opis Kampung udah nya deka ngemenuhka pejalai sida enggau chara betikika kedai-kedai judi, makai-ngirup enggau merindang diri ba endur bukai ti dipelanja kompeni kayu batang nya.
Nitihka penerang ari pengawa industri kayu batang ti madahka ngagai kami, bala pemesai dalam kompeni nya endang nemu pasal pekara ti dikereja ba pemesai ari Opis Kampung, lalu opis pekara belanja kompeni nya mega ngemendarka sida mai beberapa ribu ringgit dikena sida melanja pejalai raban ari Opis Kampung. Pengawa tu endang ditemu bala menija besai dalam kompeni nya.
Nitihka pemeri penerang kami, semua kompeni kayu batang di serata menua Sarawak endang ngena chara tu dikena sida ngalihka peresa bala pemesai Opis Kampung. Bala pemesai nya nerima batang gaji bulan entara RM3 – 4,000, tang penatai pemisi sida tau dikembaika ngagai RM20,000 nengah duit suap ari kompeni kayu batang nya.
Ba sebengkah maya lebuh siku ari pengereja pengawa dalam kompeni kayu batang ngaku, kompeni ti endur iya bekereja nya melanja tambang penerebai bilun ke raban pemeresa ari Opis kampung nemuai ke Manila awakka raban nya enda tama kampung ti dikereja sida.
![Log Pond – kayu ba endur tu enda ditemu ari ni penatai, sekali ke ari pelilih ti udah dikemendarka tauka enda](/wp-content/uploads/imgcache/2014/02/pImg_b9395c3527832300f564bb6dedece70c.jpg)
Pemeri penerang kami nerangka baka ni semanjai minggu bala pemesai Opis Kampung nya diau dalam bilik hotel ba tebing tasik ti endur sida nembuka “kereja rumah” sida bekaul enggau pejalai sida ti patut meresa kampung.
Penimpang dalam sistem nya, Opis Kampung kelalu bepanggai ba dendam sida deka ngukum kompeni ti ngereja kampung enggau chara ti salah.
![Tanah tusur ti balat di serata Baram dibai pengawa salah kompeni kayu batang – 90% ari penanggul tu datai ari pengawa ngulihka kayu batang ti enda betagang](/wp-content/uploads/imgcache/2014/02/pImg_aa0188b1e85ff1b6096da342b99c896f.jpg)
Pengawa ti baka tu kelalu berupai lalu nya udah nyadika stindit dikena nyuap bala pemesai Opis Kampung ti nunjukka baka ni chara sida nyeliahka diri ari kena chukai ti besai kelimpah ari sida ti patut nitihka atur nebang kayu chara ti lurus ba undang-undang menua.
Nitihka pemeri penerang kami, 90% ari pengawa ngulihka kayu batang di Baram dikereja ba luar pelilih lisin ti udah dikemendarka, ti udah lama ngujungka rampa kampung dia rusak ari pengawa ti enda betagang.
Penyalah ti betandu-tandu nyengkaum nebang kayu dalam pelilih lisin P.E.C ti bedau dikeluarka.
Ba kes ti baka tu bala menija kem kayu batang deka meri penerang ti bula pasal ari kampung ni ti ditebang sida.
Sereta semua kayu batang nya udah ditugungka ba log pond, pun penatai kayu batang nya mar bendar deka ditentuka, ari ketegal pengelemi ba pengawa ngabas tauka meresa pelilih menua ti patut dilawa sida. Mayuh ari kayu batang nya dianjung ke ili sungai lalu mayuh mega dijual ke menua Jepun, ti endur menua nya endang besedia meli kayu batang Sarawak laban pechayaka atur ngeluarka setipikit kayu batang.
![Ditebang – kayu batang ti enda diperesa ulih dipeda ditugungka serantu tisau jalai di Baram](/wp-content/uploads/imgcache/2014/02/pImg_122a69fcfdb0482c3c172da77f8d1e4f.jpg)
Atur pengawa ti suah agi dipejalaika bala penerit adat ari Opis Kampung nya semina ngitung penyampau tuga kayu ti udah ditebang ari pelilih ti enda dikemendarka, ti dikereja kompeni ti ngereja kayu ari luar lisin sida.
Salah guna lisin nya nyengkaum ngereja kayu dalam pelilih kampung ti dijaga, baka tanah pesaka enggi orang bansa asal, pelilih taman negara enggau zon pengelindung sungai enggau mega bansa kayu ti dijaga, baka kayu Tapang mega ditebang lalu dilekatka enggau label ti salah dikena ngasuh bala pemesai nya saru.
Dikena nentuka pemayuh ukum ba kayu ti salah tebang, raban ari Opis kampung semina deka ngitung tuga (tauka ngeluluka diri ngitung, baka ba kes sida ti dianjung kompeni batang ngelantangka ati di KK) lalu udah nya ngira pemayuh ukum ngagai kompeni nitihka RM200 ke bansa kayu selama ti dijaga, lalu ukum nya tau manggai ngagai RM2,000 ke bansa kayu Tapang.
Tang, ukum nya deka ‘diperundingka’, munyi ti ditusui pemeri penerang ngagai Sarawak Report. Suah agi kompeni deka minta ‘dikurangka’ ukum ba sida, nyengkaum ngurangka ngagai setengah ari ukum nya kelimpah ari nyuap bala pemesai Opis Kampung enggau bala tuai sida mega.
Ari ketegal bala pemesai Opis Kampung ti endang enda ngabas kampung ti dikereja kompenu kayu batang, ‘tuga ti diitung’ sida nya semina ditempa-tempaka sida aja lalu tu ngeringka penanggul tu.
Pengelemi dalam atur ngemataka rampa kampung dalam industri kayu batang di Sarawak, lalu tu mega ngujungka menua dalam serakup EU enggau agi bedagang kayu ramu enggau menua Malaysia, lebih agi enggau menua Sarawak.
![Gaya rampa menua di Baram kemaya hari tu, ti dulu menya enda ulih semekih pemanah iya](/wp-content/uploads/imgcache/2014/02/pImg_a7e3fbc20e80fed9c1cd2fa1833f6fe1.jpg)
Perintah menua mengkang enggai ngubah undang-undang kampung iya, dikena mutarka penanggul nya lalu ngambika kayu ramu Sarawak ulih dikarapka.
Munyi ti suah udah disebut-sebut bala orang politik, Sarawak mengkang nyadi pengeluar kayu batang pemadu besai di dunya, enggau chara mekalka mayuh agi kayu kering ti dibandingka pengeluar kayu menua bukai taja pan digelumuka sekali.
Raban orang asal di Baram diatu madahka rampa menua sida udah balat bendar rusak udah bekau ti dikereja kompeni kayu batang enggau nadai betagang.
Ikas pengerusak tanah di pelilih menua nya mega udah balat nyadi, ti endur tebing bukit mayuh udah runtuh lalu ngerusak batang sungai enggau pengidup dalam ai enggau semua macham utai idup ti bepanggai ba ai sungai.
Menua Sarawak diatu benung dituntung pengerusak rampa menua, terima kasih ke pengelusu raban pemesai dalam Opis Kampung ti rindu agi bejalaika pengawa sida ari bilik hotel enggau mega atur pengawa kompeni kayu batang.
Tang ari atas semua tu, tanggungpengawa nya beduduk ba pengelemi atur pengawa Perintah Menua Sarawak ti betuaika Kepala Menteri Abdul Taib Mahmud.
Nadai siku ti untung agi ari ti ngeluarka lisin kayu batang ngagai kompeni kayu ti udahnya meri duit suap dikena nutup mata baka Kepala Menteri Sarawak ti kala didinga nyebut pasal pengeraja diri nya “lebih ari semua utai ti ulih dipelanjaka”.