![Nitihka pejalai duit nya – ari Laila, Sulaiman enggau Abu Bekir enggau Richfold Investment ngagai Sakto ti dikemataka Sean Murray nengah Jamilah Taib](/wp-content/uploads/imgcache/2014/02/pImg_9048370b5851d2179a43980f0f712075.jpg)
Lebuh iya baru deka nguji ngulihka kebal nengah opis Gabenor Menua Sarawak, Sarawak Report ulih mantaika sebengkah surat penerang ti beguna bendar dikena ngaitka iya enggau skandal nyual keluar kayu batang Jepun baka ti kala dibantaika dalam taun 2007 suba.
Skandal nya udah marit duit kamah bejuta-juta ringgit ti udah dibayar bala penyual kayu batang Jepun ari menua Sarawak ngagai sebengkah kompeni di Hong Kong ti benama Regent Star Company Limited, ba penyampau RM32 juta sepemanjai tujuh taun.
Bisi sekali Taib Mahmud udah mansutka penerang dalam Dewan Undangan Negeri Sarawak, dikena iya ngenyauhka iya empu ari sebarang kaul dalam pekara nya lalu madahka diri enda nemu seling tauka ngembuan sebarang kaul enggau Regent Star, ti dikemataka menyadi iya empu, Onn Mahmud.
Taja pan baka nya, NGO Switzerland, Bruno Manser Fund bisi tetemuka surat-surat penerang di menua Kanada ti terang bendar nunjukka kaul entara bini Taib enggau kompeni nya, ti madahka pemindah duit ari menua Hong Kong ngagai kompeni anak indu iya, Jamilah Taib, iya nya Sakto Corporation di pelilih Ottawa, Kanada.
![Sean Murray ari kompeni Sakto ti nyadika penerima duit jali ti manggai $20 juta ari mentua iya, bini Taib enggau kompeni sapit enggi Regent Star, Richfold Investments Limited](/wp-content/uploads/imgcache/2014/02/pImg_0ca02fcb56c8e0579a125c421ebb6520.png)
Surat-surat penerang nya ngembuan kaul enggau duit jali bepenyampau $20 juta digaga Jamilah empu ngagai kompeni Sakto, ti endur iya madahka duit nya “dipegai ari asuh” ulih iya enggau berutang ngagai “siku orang ari pemendar Jamilah H Taib nginjau duit nya ngagai Sakto”.
Laki Jamilah, Sean Murray, nyadika Pengarah ti mega Sekretari dalam kompeni Sakto, nya siku orang ti dinamaka nyadi penerima duit jali nya lalu orang bukai ti dinamaka nyadi penyali duit nya bini Taib ke dulu suba, iya nya niang Laila Taib; dua iku anak lelaki iya Abu Bekir enggau Sulaiman; kompeni sida empu, Sogo; Onn Mahmud enggau kompeni Richfold Investments Limited, ti mega nyadika kompeni besapit ngagai Regent Star, ti udah dikorpratka ba hari ti sama ba endur ti sama lalu mega dipegai pengarah ti sama.
![Jamilah enggau duit jali nya ‘ti dikemendarka’ bala sida sebilik enggau mega kompeni Richfold](/wp-content/uploads/imgcache/2014/02/pImg_b4825866cef33c338ad21e2fb2ab3b8c.png)
Surat penerang nya ti tau diperesa dalam rekod orang mayuh di Ottawa, Kanada, terang bendar nunjukka kaul enggau kompeni Regent Star, ti nerima bayar bejuta-juta dollar ari gerempung kompeni kapal Jepun ti nyadi ‘orang tengah’ ngeluarka lisin nyual kayu dikeluarka Onn Mahmud, sereta mega ngarika pengawa dagang sida Taib sebilik di Kanada.
![Entara raban orang kaya-kaya di Kanada, Sean enggau Jamilah Taib-Murray. Tang ari ni penatai semua duit seduai nya?](/wp-content/uploads/imgcache/2014/02/pImg_cf02c0c4eccb74012ebba2fb7d943ace.png)
Kaul nya ti endang lama udah betumbuh sebedau skandal nya dibantaika dalam taun 2007. Pekara tu nyungkak jaku tanya, nama kebuah Kepala Menteri nya bebula madahka iya enda nemu pasal penatai kompeni ti bekaul enggau duit jali ba penyampau $20 juta ti malut bini enggau bala anak iya?
Duit jali nya mega ngelemika jaku bebula ti suba ti madahka kompeni Sakto udah kala nerima belanja ti meruan ari iya.
Udah bekau Sarawak Report mantaika kaul tu, Taib udah mansutka penerang ti madahka ‘iya meri sepenyampau duit dikena anak indu iya numbuhka pengawa dagang’ dalam taun 1983 lalu enda lebih ari nya.
Diatu iya patut nerangka enggau silik pasal duit $20 juta ti diisika iya ngagai kompeni Sakti dalam taun 1996 ulih bini enggau bala anak lelaki iya, udah bekau iya enggau jaku tinggi madahka bala anak iya bulih pemujur laban sida nya jauh pandai agi ari orang bukai di menua Sarawak.
Engka Kepala Menteri nya deka ngambi kira penerang ari Jamilah empu bekaul enggau model pengawa dagang kompeni iya ba taun 1989, lebuh iya nyebut dalam sebengkah jaku randau dalam suratberita ti endur iya madahka kompeni nya nyadika perengka dikena mantu raban orang dagang ngena ‘duit ti mayuh’?
Lebuh iya nyebut pasal Pengerusi bala orang ti beranakka puku dagang dalam kompeni iya ‘ti datai ari menua Malaysia dua kali dalam setaun’ sekali ke Jamilah nya mai reti pasal penemuai apai iya empu Taib Mahmud ke Kanada tauka penemuai aya iya empu Onn Mahmud, ti rapat bendar enggau dagang bini enggau bala anak iya?
Diatu Taib Mahmud patut nyaut jaku-jaku tanya ti nekan bekaul enggau pun penatai semua duit tu, sebedau sebarang jaku tanya bukai bekaul enggau iya empu ti minta paduka mangku pengawa nyadi Gabernor menua Sarawak.
![Bala pemegai syer nominal dalam kompeni-kompeni Onn Mahmud? Shea Kin Kwok nerima tanda puji](/wp-content/uploads/imgcache/2014/02/pImg_7da6f84799695d27d139c8c0fa371265.png)
Laban kaul entara duit injau Jamilah enggau pemansut duit ari bala ‘orang tengah’ lisin-lisin pejalai kapal Jepun diatu nya nerangka pasal pun penatai duit nya ukai siti lalu iya ti sama.
Lalu enti sida Taib sebilik enda beranakka duit ulih makai suap nya, ari ni pun penatai duit puku ti mayuh bendar nya, beduduk ba gaji bulan Kepala Menteri maya nya suba ukai tak besai bendar?
Mayuh rekod nunjukka dua buah kompeni, Regent Star enggau Richfold nya udah dikorporatka di menua Hong Kong ari atur sekretari ke Onn Mahmud, Shea Kin Kwok kena 22 haribula Sebelan taun 1983 ngena nama endur ti sama.
Shea Kin Kwok dipaduka nyadi pemegai syer dalam Regent Star, tang pemegang syer enggau pengarah dalam Richfold nya Onn Mahmud empu.
Opis Tribunal Pekara Chukai menua Jepun madahka kompeni-kompeni nya udah dikorporatka bedau lama sebedau ‘bayar ke orang tengah’ belabuh dipejalaika ba Regent Star, nengah kontrak ti ditanggam enggau gerempung kartel pejalai kapal Jepun dikena mantu ngeluarka lisin nyual keluar kayu batang.
Ba danjang tanggungpengawa ti terang bendar atas kompeni Achipelago enggi Onn Mahmud ti dipaduka opis Taib ngemataka lisin nyual keluar kayu batang ngagai kompeni-kompeni kayu batang, taja pan dalam jaku saut iya dalam Dewan, Taib udah madahka pemutus penemu nya nadai bekaul enggau iya tauka agensi perintah ti endang bempu tanggungpengawa ngeluarka lisin nya, iya nya SEDC.
![Onn Mahmud nya orang ti bempu kompeni Richfold, tang sekretari iya, Shea Kin Kwok ti dinamaka iya nyadi Pengarah enggau pemegai syer ti sama enggau iya dalam kompeni sapit, Regent Star](/wp-content/uploads/imgcache/2014/02/pImg_9fc3228c7e4066568b192dae0abbcfd0.png)
Opis Chukai menua Jepun mega mujur bulih asil pansik ti nunjukka sida semina tetemu mimit aja surat penerang ti madahka Regent Star nya ngatur pengawa orang tengah ti disadang ngenataika bayar manggai bejuta-juta ringgit.
Tang Opis Tribunal Rayuan udah nya mutuska penemu sida ti madahka nadai sebarang penerang ti nunjukka Regent Star nadai kala nyediaka atur pengawa orang tengah entara bala penyual kayu batang enggau Onn, lalu ari nya, opis nya udah ngemendarka bayar diatur enggau enda bechukai.
Beduduk ba Sarawak Report ti udah ngenang Shea Kin Kwok nya nyadika sekretari enggau pengereja pengawa ke Onn di Hong Kong terang bendar Onn minta bayar yuran orang tengah bepenyampau datai ke bebilion-bilion yen ti diperundingka enggau iya empu.
Bala pemansik di Jepun udah ngamatka kaul rat entara Onn enggau Regent Star – nyentuk ke ba sebengkah maya ti endur kompeni-kompeni kapal udah ngirumka bayar sida ngagai Onn lalu mega ngagai Regent Star ngena atur pindah duit pekirum ti sama ngagai Shea Kin Kwok!
Diatu Sarawak Report bisi nyimpan jaku salin pechara bekaul enggau chukai di Jepun nya, ti deka dibantaika nyereta asil pansik ti bukai dalam aum enggau pengarang berita di Tokyo enda lama agi.
Taja pan munyi nya, isu pansik ba pekara chukai Jepun nya semina betumpu ba sekali ke kompeni-kompeni Jepun patut mayar cukai atas bayar nya, tang ba orang Sarawak enggau Malaysia, pekara tu jauh bendar bebida.
Rayat Malaysia bisi kuasa deka nemu sekali ke penguntung ti datai ari pengawa nyual kayu batang nya Taib dipasukka ngagai wang turu orang mayuh ke guna menua, tauka disimpan chara belalai ke dalam akuan sida sebilik di Hong Kong?
Lalu rayat mega bisi kuasa deka nemu enti duit ari regent Star nya dipasukka nengah Richfold ngagai pengawa dagang sida Taib sebilik di menua Kanada enggau di endur bukai.
![Jarin pengawa dagang di Hong Kong – kaul pengawa dagang di menua US enggau bayar ke menua Jepun](/wp-content/uploads/imgcache/2014/02/pImg_907d82325c5fd406655b74132063fb85.png)
Regent Star enggau Richfold nya semina dua ari jarin pemayuh kompeni ti dikemataka Shea Kin Kwok semanjai iya bekereja nyadi sekretari ke Onn Mahmud di menua Hong Kong.
Tu nyengkaum kompeni Grand Shine enggau Herolite Investment, ti bisi bempu syer dalam gerempung kompeni enggi Onn ti bukai baka Achipelago Corporation, Whittaker Company, Grand Will, Icharaku enggau Natalite Investment.
Lalu baka ti kala udah dituliska dalam laman tu, sebengkah penerang mega bisi ditemu bekaul enggau kompeni ti menua Amerika Utara enggi sida Taib Mahmud sebilik sereta mega enggau pengawa dagang sida di Hong Kong tu.
Dalam taun 2006 bala anak Taib, ti nyadi pemegai syer dalam kompeni Sakti ti bempu reta di menua US (nyengkaum opis FBI ba rumah Abraham Lincoln di pelilih Seattle) udah nganjung fail retan chukai lalu ngengkahka nama kompeni Natalite di Hong Kong nyadika alamat sida.
Nyentuk ngagai maya Kepala Menteri nya ulih meri penerang ti silik bekaul enggau pekara tu ti nyadika pelasar penumbuh skandal tu baru iya nya ulih dikeluarka ari sebarang pemutus dikena ngujungka iya tau dipaduka mangku pengawa nyadi Gabenor Sarawak ila.