Menua Malaysia udah ngenggaika siti tuduh penemu ba Gerempung Bansa (UN) ti madahka Pelapor Khas UN bekaul enggau Kuasa Pengelantang Orang Bansa Asal patut dikemendarka nemuai ngagai menua nya lalu meresa atur perintah ti diberi ngagai orang bansa asal.

Tu mih siti ari mayuh tuduh penemu ti enda diterima Malaysia udah bekau Repot Pansik (UPR) dipejalaika UN dalam bulan Sepuluh. UPR nya nyadika siti atur pengawa ti bekaul enggau peresa ba rekod kuasa pengelantang mensia ba semua 193 buah menua ti nyadi kaban dalam UN. Nya meri peluang ngagai semua menua dikena ngelala nama bansa tindak dikena ngangkatka pemanah atur nyaga kuasa pengelantang mensia ba menua sida empu.

Tang enda mukai-mukai, saut ti ngenyitka ati bekaul enggau kuasa pengelantang mensia sida, Perintah Malaysia udah enggai nerima tuduh penemu ti dikenataika Denmark, Finland, New Zealand, Norway, Sweden enggau Switzerland.

• Ngemendarka penemuai Pelapor Khas UN meresa kuasa pengelantang mensia (Denmark);
• Nentuka undang-undang ba orang bansa asal enggau atur bejalaika undang-undang nya senutuk enggau Penetap Kuasa Pengelantang Orang Bansa Asal (Switzerland);
• Nentuka kuasa-kuasa orang bansa asal enggau raban orang ti bepanggai idup ba kampung nya dijaga undang-undang, lebih agi ba tanah pesaka, rampa menua enggau pengeraja dalam tanah sida (Norway);
• Numbuhka siti Komisyen Menua ti bejalaika atur ngatika diri ke Orang Bansa Asal lalu nentuka undang-undang enggau polisi-polisi nya besenutuk enggau Penetap UN bekaul enggau Kuasa-kuasa Pengelantang Orang Bansa Asal (Sweden);
• Numbuhka sebuah gerempung ti ngatika diri dikena mansik penyarut tanah, rampa menua enggau pengeraja asil dalam tanah (New Zealand);
• Ngambi langkah, enggau penuh sereta sengkeman ba orang bansa asal, dikena mutarka isu-isu baka ti ditekanka Enkuiri Menua bekaul enggau Kuasa Ba Tanah Orang Bansa Asal (Finland)

Ba danjang ke retorik selama sida, Perintah Malaysia madahka sida enggai nitihka penetap UN nya tauka madahka kuasa NCR sida endang diintu enggau manah.

Repot nya ti endur Perintah ti disebutnya udah ditiriska Sarawak Report lalu ngambi beberapa bulan sebedau dibantaika. Dalam repot nya gerempung kuasa pengelantang mensia Malaysia, SUHAKAM, udah balat bendar ngutuk perintah bekaul enggau penemu ba kuasa tanah orang asal. SUHAKAM udah nyimpuka penemu ti madahka orang bansa asal “udah dipejal nyadi anak kuli ba tanah diri empu” ketegal atur ti dipejalaika opis LCDA di Sarawak.
Enggau chara ngemaruhka tuduh penemu tu, Perintah Malaysia udah ngayanka penemu diri empu bekaul enggau kuasa pengelantang orang bansa asal nya terang bendar.

Bala pemacha ti deka nemu enggau silik agi bekaul enggau penetap UN ba Kuasa Pengelantang Orang Bansa Asal, tau ngena pemaut tu – http://www.un.org/esa/socdev/unpfii/documents/DRIPS_en.pdf