![SAVE Rivers ari Sarawak ngayanka bantah sida ba atas Tekat Alta Kraftverk ba Sungai Alta di Finmark, Utara menua Norway](/wp-content/uploads/imgcache/2014/05/pImg_e8248eb22687f86692b309e997ae79f7.png)
Bos kompeni Sarawak Energy, udah ngiruh diri numpuka jaku penerang iya ngagai bala orang di Sarawak nya iya mai pemanah reti pemansang Norway ngagai sida.
Baca artikel berita ari menua Norway lalu peratika Torstein Dale Sjotveit nya semina nyadika mulut pengerangka Taib lalu udah meri malu ke pengawa pemansang enggau pemereti ati ti udah mujur dikereja di menua iya empu ngagai orang bansa asal di menua sida nya.
(PENERANG MEDIA ARI ALTA & KARASJOK / NORWAY) gerempung NGO SAVE Rivers ari Sarawak, bisi ngatur penemuai ba ujung minggu tu tadi ngagai Tekat Alta yang dibalut penyaru runding di Utara menua Norway.
Projek Tekat Alta nya udah kala napi bantah ti balat ba ujung taun 1970 enggau 1980 ari raban bansa asal Sami di menua Norway.
Tore Bongo, siku ari tuai raban bansa ti nguluka bantah, udah nangkan raban NGO SAVE Rivers pasal sukung sida ngagai orang bansa asal Sarawak ti mantah projek dua belas buah tekat ti dilanggurka deka digaga di Sarawak:
“Kita enda patut takut mantah. Kita patut besedia bejuraika penemu, tang iya ti beguna agi nya, kita patut angkat ngelanggar.”
Raban SAVE Rivers ari Malaysia nya bulih perati ari raban pengarang berita lalu direpotka radio menua Norway, stesyen televisyen Sami, Oddasat. Tau peda repot penemuai nya ba pemaut ti disediaka ditu:
Stesyen Televisyen Sami enggau radio menua Norway, NRK, nusui pasal penemuai raban NGO SAVE Rivers ari Malaysia ngagai palan pengeluar kuasa karan hidro Tekat Alta di Utara menua Norway nya.
http://radio.nrk.no/serie/her-og-naa-hovedsending/dmnh01010214/22-05-2014#t=48m47s
Nitihka penerang ari pengari raban bansa asal Sami, Tore Bongo, bantah ngagai projek Tekat Alta nya suba udah ngukir cherita lama menua nya bepun ari polisi perintah ngagai raban bansa asal Sami di Norway.
Ke terubah iya, pemesai tekat nya diubah nyadi mit agi lalu nadai genturung enggau tumpuk pendiau orang bansa asal diampuhka ai tekat ti niki. Kedua, udah bekau dibantah nya, perintah Norway lalu belabuh bebasaka kuasa pengelantang orang bansa asal Sami nguan kandang menua nya.
Mayuh undang-undang baru udah digaga udah bekau Tekat Alta napi bantah, enggau ngemendarka raban bansa asal Sami ngerembaika daya idup enggai main asal sida. Dalam taun 1989, raban bansa asal tu udah mujur numbuhka Parlimen sida empu di pelilih Karasjok.
Siku pengari Parlimen Sami, Silje Karine Muotka, udah nyediaka sebengkah pengerami dikena nyambut penemuai NGO SAVE Rivers nya lalu udah nya nguluka sida nemuai di sebelah rumah parlimen nya. Maria Ajang ari Sarawak nerangka pengalit ati iya ba bantah raban bansa Sami: “Aku berasai temegah meda pengeliat ati raban bansa Sami ngetanka daya idup sida, jaku sida enggau tanah sida. Sida enda surut ngapa, tang terus mantah ke pemanah rebak sida ti dudi.”
Penemuai raban bansa asal ari menua Sarawak ke Norway nya mai asil ngagai dua bengkah menua nya. Dua bengkah raban bansa asal nya sama belah udah napi keruga ba tanah, daya idup sida. Taja pan di Norway, ubah udah nyerupa ke pemanah raban bansa Sami, tang pengidup orang asal di Sarawak agi enda meruan sereta dichiping.
Peter Kallang, Pengerusi SAVE Rivers, meri jaku iya ti positif ba gaya pendiau enggau pengidup orang asal Sami di Norway nya:
“Perintah menua Norway endang bebendar ati nulung ngetanka daya idup enggau kuasa pengelantang orang bansa asal Norway ti betubuh mimit nya. Perintah sida udah ngemendarka raban bansa Sami nentuka jalai pengidup sida empu.”
Siku agi pengari ari Malaysia, Lah Jok, nentuka peminta iya didinga:
“Perintah Malaysia patut masa kuasa pengelantang orang bansa asal baka ti dipejalaika perintah Norway.”
Penemuai ngagai Tekat Alta enggau jurai enggau raban bansa asal Sami nya ngelai pengujung penemuai dua minggu raban NGO SAVE Rivers ke menua Eropa ti udah mujur nekanka serebana orang bansa asal Sarawak ti mantah pengawa ngaga dua buah tekat ti dilanggurka di Sarawak Borneo.