![Chia Nyet Min – apai Michael Chia ti baru napi ukum jel laban dituduh nguji minta duit suap ti dikumbai iya dikereja ngarika Musa Aman enggau BN](/wp-content/uploads/imgcache/2014/05/pImg_4f9b10f02ad6c38dd425ad5d0f30a2c5.jpg)
Kepala Menteri Sabah Musa Aman udah enggau enda engkeretik mutarka kes pechara enggau apai siku orang dagang ti dipalit skandal makai suap, Michael Chia, enggau chara meri iya lisin kayu batang pemadu besai enggau mega atur pengangkut nengali, semua nya beungkus RM67,300,407.
Michael Chia ti kali udah ditusui kami ketegal bisi megai mayuh bup akaun bank resia ti ngenataika penguntung ngagai sida Musa Aman sebilik, udah ditinggang ukum jel beberapa hari udah bekau pengawa dagang iya ditekanka salah kena 6hb Februari nyin kemari ba beberapa iti tuduh ti enda sebaka.
Semua duit agih nya datai ari wang turu menua ti ngarika sebengkah peminta ti dikenataika apai Michael, iya nya Chia Nyet Min, dikena ngelaban Musa Aman ba penuduk iya ti nyadi Pengerusi enggau Kepala Eksekutif dalam Yayasan Sabah dulu suba.
Musa Aman udah meri iya dagang nengali ngangkut kayu batang, ti endur kompeni enggi menua Sabah, Berjaya Sdn Bhd udah nya nguji magi-magi pengawa nya ngambika enda nyiping sapa-sapa enggau mega awakka sistem pengangkut nya tau dipejalaika manah agi.
Terang bendar putar penanggul nya, baka ti dipansutka akim sebedau kes nya didinga, ngarika pengawa nyerahka diri enggau anak kompeni Yayasan Sabah nya, ti udah dipejuraika entara Musa Aman enggau kroni dagang iya beberapa taun dulu ari tu.
Dalam taun 2012 Musa udah bebulaka kaul iya enggau Michael Chia, ti ngarika iya ti diberika tanggungpengawa ngeluarka lisin nebang kayu batang lalu kala mega ngumbai diri ‘anak ambu’ Musa dikena ngemanahka agi kaul entara Musa Aman enggau apai iya, Chia Nyet Min.
Tang, Sarawak Report udah mantaika Chia nya nyadika pengari Musa megai mayuh bup akaun bank, ti dikena sida proses bejuta-juta dollar duit suap ari pengawa ngulihka kayu batang, ti dipasukka ngagai akaun bank enggi Musa di menua Switzerland lalu mega dikena melanja sekula bala anak iya di menua Australia.
![Nadai sebarang kaul dagang enggau sapa-sapa – Musa Aman enggau ‘anak ambu’ iya Michael Chia ba sebengkah pengerami di Sabah](/wp-content/uploads/imgcache/2014/05/pImg_a69a30227c6f34003c18e67442eb7a29.jpeg)
Lebuh pekara nya enda ulih dilalaika agi, ditambahka enggau penerang ti majak nambah, bala bos Musa enggau BN ba tikas perintah besai udah nguji nipak tuduh nya enggau chara madahka bayar ti diterima iya ngelama tu dikena melanja pejalai parti UMNO enggau BN lalu ukai ke guna iya empu!
Baka ni duit suap kamah nya tau dikumbai beresi nya patut disaut parti ti benung merintah, laban tiap repik duit suap ti diterima sebuah parti politik nya endang salah sama sebaka enggau duit ti diterima orangt siku-siku.
![Duit ti dibayar tauke kayu batang ngagai kompeni enggi Chia, Zenique Investments, udah dikelai ngena leka jaku nyadika duit deposit ke lisin kayu batang! Nama kebuah duit nya enda dipasukka ke dalam wang turu menua?](/wp-content/uploads/imgcache/2014/05/pImg_f3f5791ac1442eab0c62c8e045b72fbd.png)
Tambah mega Michael empu udah ditinggang ukum sipat enggau jel semina udah bekau beberapa hari bayar nya dikeluarka ba bulan Februari nyin kemari.
Penyalah ti dikereja iya nya nipu kaban tauke kayu batang iya empu ngambika sida pechayaka iya nyadika tukang langgur pengawa ti ulih ngatur lisin ari Yayasan Sabah, laban kenu ku iya, iya bisi bulih kuasa nyadi orang tengah ngari ke Kepala Menteri Musa Aman.
Chia udah madahka ngagai Argus Hassan iya patut mayar sebengkah duit bantu politik enggau duit komisyen ti besai.
Kot udah nemu semua tu enda bendar magang lalu Chia udah ngereja nya ke guna iya empu.
Tau bendar ngasuh orang tekenyit ati, lebuh bala orang dagang ngelala Chia nya nyadika orang kanan ke Musa Aman lalu udah bekau raban BN ngaku Chia nya nyadika orang ti ngatur duit bantu ke parti sida.
RM64 juta nya sengkeman bendar diberika ngagai siku orang upah dalam kes tu!
[Dikena nemu enggau silik kes Musa Aman enggau ‘orang tengah’ iya, Chia, peda dalam arkib Sarawak Report ba bagi Spotlight]
Rekod-rekod ti diterima Sarawak Report nunjukka Musa Aman udah lama bendar ngelala sereta bekaul enggau Chia Nyet Min sebilik, lalu meri iya agih duit ngagai kompeni iya, Kini Abadi Sdn Bhd, sebengkah atur pengangkut nengali pemadu besai ke kayu batang kenyau ari 1997, lebuh iya mangku pengawa nyadi Kepala Eksekutif dalam yayasan Sabah.
Kelimpah ari Chia, dagang nengali nya udah mai penguntung lalu atur nya udah ngenataika ati ti enda lantang ba raban kompeni kayu batang ti bukai ti sama deka ngena sistem pengangkut asil tebang ti murah agi lalu meruan agi ari ti selama.
![Rintai ungkus pengangkut asil tebang ti ditetapka Chia](/wp-content/uploads/imgcache/2014/05/pImg_803465901b50d526cb94d2e84350f90c.png)
Tu laban jaku serebana orang ba pengawa dagang nengali ti madahka Sabah Berjaya udah belabuh ngemendarka tauke kayu batang bukai ngena stur pengakut ti bukai lalu tu udah ngujungka kes undang-undang difailka Kini Abadi ngelaban Sabah Berjaya.
Ba keterubah iya, apai Michael Chia udah ngenaika saman bepenyampau RM84 juta, ti ngasuh mayuh orang tekenyit laban kaul entara sida Chia sebilik enggau Musa Aman enda lama udah ditanggam.
Mayuh orang ngumbai, enti penyarut tu amat nyadi entara siku orang politik enggau kroni iya, tauka sida semina deka ngulihka duit ke guna Musa Aman, ti nyengkaum pengawa iya meri sabsidi ngagai parti iya empu?
![Lisin enggau dagang nengali Yayasan Sabah nya diberi ngagai Michael Chia enggau apai iya Chia Nyet Min (baka ti udah bisi dalam dokumen opis MACC) – ke terubah iya Musa nyadi kepala Eksekutif lalu diatu Pengerusi (ti mega Kepala Menteri Sabah)](/wp-content/uploads/imgcache/2014/05/pImg_7ca77e84b548c1d7be18c52ba96ecc2b.png)
Peminta Chia ba Sabah Berjaya/Yayasan Sabah nya bekaul enggau pengelenyau kuasa dagang nengali iya, ti udah digaga bari ke 5 taun dalam taun 2006 suba ti manggai ba ungkus RM84 juta.
Ba ke terubah iya nya Sabah Berjaya udah ngetanka tindak nya, enggau chara madahka sida nadai sebarang kaul dikena ngetanka pengawa dagang nengali nya, laban kontrak ti digaga baru nya terang bendar nunjukka selampur pengawa nya endang ba kuasa Yayasan Sabah empu.
Kes ti ditanka nya mega madahka Kini Abadi enda ngemnuhka kontrak nya, laban asil kayu batang ti diangkut nya kelalu lubah lalu atur nya udah ngemendarka kontraktor bukai diberi tanggungpengawa ti sebaka.
![Leka jaku ti berani – tang bala defenden (Yayasan Sabah/Sabah Berjaya) udah ngalahka diri lalu mayar RM64 juta!](/wp-content/uploads/imgcache/2014/05/pImg_5e2ab4b3d6a9e34f789a44e0ffbb9e55.png)
Tang nitihka penerang ti bisi dalam salin eksklusif kami nunjukka bayar ti penudi diatur ba mua Komisyener Undang-undang di Sandakan, Dato Douglas Cristo Primus Sikayum, ba bulan Februari terang bendar nunjukka opis menua nya udah ngalahka diri, ti ngemendarka sida Chia sebilik ngetanka dagang nengali sida lalu mega bulih kuasa nebang nengali rampa kampung pemadu besai di menua nya!
Rampa kampung ti ditebang nya bulih 4,000 hektar pemesai.
![Pampas ngena lisin ngulihka kayu batang ti mayuh agi ari selama](/wp-content/uploads/imgcache/2014/05/pImg_4e1dd3946df6eeafb69fbb6447fa4e9d.png)
Tambah mega, bayar nya udah ngemendarka kompeni enggi Chia minta tikas tebang ditambah ngelui ari tikar ti dikemendarka lalu sida mega mengkang ngetanka dagang nengali ngangkut asil tebang nya.
Bisi mega saum penemu dikena ngarut aum dikena bejuraika atur nikika ungkus ngangkut ba dagang nengali nya ti dipejalaika Chia enggau mega bejalaika ungkus pengangkut ti baru nya enda lama agi!
Penyampau ke semua ba pengawa ti ngalahka diri nya enggau ungkus lisin ti disebut dalam penyampau RM67 juta ngagai apai Michael Chia ti bingking nya.
Siti-siti utai ti manah ke “orang ti nadai sebarang kaul dagang” enggau kepala Menteri ti mega nyadika Pengerusi dalam Yayasan Sabah! Seninjik bendar ke menua Sabah ti endur rampa kampung iya majak ditebang dikena ngisi kuchik orang diri sebilik ti udah dibantaika pengerangka sida dalam kot ketegal kelalu korup.
![Chia begambar enggau lawyer enggi Musa, Christopher barnesm, siku ari bala orang ti nerima duit suap pengawa ngulihka kayu batang ti ngarika Musa](/wp-content/uploads/imgcache/2014/05/pImg_1b11acd71c061dc58fdc82e27279d001.jpg)