Sebuah agi gerempung suratberita entarabansa udah ngamatka sereta besenutuk penemu enggau penerang ari Sarawak Report ti mantaika pun penatai pengaya ti nyelai Taib Mahmud.

Agensi berita Bloomberg/Business Week baru udah mantaika repot sida ba peresa enggau pansik selampur kes minta sarak ari anak lelaki Taib, Mahmud Abu Bekir enggau pekara ti dikumbai sida pengaya ti ditugungka apai sida lalu diengkahka sida di serata dunya.

Nyerumba nya, Taib enggau bini biak iya benung ngulu sebengkah pengerami nyambut penemuai seduai ba ujung minggu tu tadi, seraya ke iya ti agi ngambi bagi dalam pejalai pengawa perintah di menua Sarawak nya.

Abdul Taib Mahmud ti udah merintah menua Sarawak dalam pengelama tiga puluh taun, udah badu ari pengawa nyadi Kepala Menteri dalam bulan Dua tu tadi lalu ngetatka pengaya sida sebilik ti manggai bebilion-bilion dollar.

Sebagi ari pengeraja Taib nya udah pansut lebuh pechara minta sarak entara anak lelaki tuai iya, Mahmud Abu Bekir, enggau bini iya, Shahnaz Abdul majid, ti minta pampas sarak manggai $120 juta ba sebengkah chara kes sarak pemadu besai dalam cherita menua Malaysia. Orang diri sebilik nya bisi ngembuan pegai syer pemadu besai dalam kompeni pengawa berumah enggau reta ti bukai di menua Sarawak, nitihka penerang dalam fail korporat.

Taib Mahmud nyadika siku kaban politik ti pemadu lama bekuasa penuh ba atas wang turu menua iya, merambu pengawa enggau nguasa asil dalam tanah ba sebuah menua pemadu besai di Malaysia, ti mega nyadika pengeluar setengah ari asil minyak enggau gas Malaysia. Iya udah diberi pemendar merintah ‘peneka ati’ iya atas menua Sarawak laban ungkup pengawa iya ti mujur ngetanka Najib Razak ba penuduk Menteri Besai dalam Barisan Nasional ti merintah, ba ti direpotka Andrew Aeria, siku professor dalam fakulti politik enggau kaul entarabansa University Malaysia Sarawak.

Taib Mahmud enggau bala bakih politik iya dalam BN udah menang 25 iti kerusi ba bepilihbesai bulan Lima taun nyin kemari, nadai dikeruga pengalah parti ti merintah ti alah majoriti ba tikas parlimen Malaysia. Iya badu mangku pengawa Kepala Menteri kena 28 Dua taun tu tadi lalu minta chiri nyadi Gabenor Sarawak, sebengkah pengawa ti penuh basa, sehari udah bekau nya.

Tuai menua ti beumur 77 taun nya, ti enda kala ditusui orang pasal pengeraja iya dini-dini endur tauka ba tikas entarabansa, ngembuan reta pengeraja sida sebilik ti manggai lebih $1 bilion, baka ti ditusui Indeks Jutawan Bloomberg.

Iya enggai meri sebarang komen pasal semua reta pengeraja iya lalu peminta orang ti deka berandau enggau iya nengah sekretari media iya, Jameson Ahip Nawie. Peminta mendingka komen iya nengah emel ngambika iya ngerintaika semua reta pengeraja iya enggau enggi sida sebilik. Emel nya mega bisi betanya pasal pansik opis MACC ba tuduh penyalah makai suap ba iya.

Dulu ari nya, opis MACC dalam saut betulis sida ngagai kaban parlimen ba bulan Tiga nyin kemari madahka pansik ba Taib benung chakah dipejalaika. Sebedau nya, Taib ditemu nadai salah ba pengawa ngaga pemutus penemu meri projek tauka tanah ngagai sida sebilik, munyi ti direpotka opis MACC nya. Taib udah bebula jaku tuduh nya lalu bedau kala didawa dalam kot.

MACC madahka dalam taun 2013 suba sida udah numbuhka raban pemansik dikena mansik jaku tuduh ti ngelaban Taib. NGO Global Witness ti bepalan di London kala ngeluarka sebuah wayang pandak ti ngayanka baka ni penyalah makai suap dikereja sida sebilik ngelama tu.

Sekumbang diperintah Taib Mahmud, Sarawak udah kurang bepanggai ba pengawa ngulihka asil pengeraja tanah, betanam-betupi enggau atur kampung enggau pengawa kilang sereta kuasa ulih digaga baru. Menua nya ngarika 10 peratus asil ari menua, nitihka data ofisyel perintah.

Penyarut ba undang-undang entara anak lelaki enggau bini anak iya nya, Shahnas, udah suah didinga dalam kot di Malaysia udah bekau sarak seduai nyadi ba taun 2011.

Shahnaz, siku pemegai degree MBA ba pekara wang, madahka ngagai kot syariah di Kuala Lumpur ba bulan Semilan, iya nadai agi bulih pengerindu ari laki iya dalam pengelama lebih kurang 10 taun lalu madahka laki iya nya, Abu Bekir udah bebini enggau indu Australia, lalu udah nya enggau indu Russia ti enda ditemu iya sekumbang 19 taun seduai ti udah jadi melaki bini. Ba undang-undang Malaysia, lelaki Muslim tau bebini sampai ke ngagai empat iku.

Abu Bekir nyadi pengerusi dalam kompeni Cahya Mata Sarawak ti udah dirintaika dalam bursa syer Kuala Lumpur. Iya megai mayuh aset enggi iya empu ti manggai $300 juta, nitihka pansik kompeni pemansik akaun Ferrier Hodgson, sebuah kompeni dagang kunsi di Malaysia ti diupah Shahnaz. Abu Bekir bisi pegai syer dalam 49 kompeni, nitihka dokumen ti diengkahka ba kot.

Penyampau syer ti dipegai Abu Bekir dipelabaka besai agi ari nya laban 18 buah ari kompeni nya udah diseliahka ari ngeluarka kira-kira wang kompeni sida ti enda ulih diperesa, nitihka Andrew heng, siku ari raban pemeresa kira-kira dalam opis Ferrier Hodgson di Malaysia ti madahka ngagai kot kena 22 Januari nyin kemari.

Heng udah ditanya-balas lawyer Abu Bekir kena 14 April lalu madahka repot iya nya disediaka enggau enda berat sepiak tauka dipengaruh ari luar, nitihka penerang suratberita Malaysia, The Star.

Apai Abu Bekir nguasa 42 peratus ari syer dalam kompeni Cahya Mata Sarawak nengah kompeni sida sebilik, Majaharta Sdn Bhd, lalu di baruh nama bala anak enggau niang bini iya, Lejla, munyi ti disebut dalam dokumen dalam bursa syer nya.

Sida taib sebilik nyadi pemegai syer pemadu besai dalam kompeni nya, ti ditumbuhka nyadi pengeluar simen enggi menua Sarawak.

Nitihka Shahnaz mega, Abu Bekir dipelabaka bisi syer dalam 85 buah kompeni bukai di menua tasik ti bedau diperesa, munyi ti disebut lawyer iya, Rafie Mohd Shafie ti madahka ngagai kot.

Abu Bekir nadai nyaut emel ti betanyaka pasal pengeraja sida apai iya enggau peresa bar eta pengeraja iya baka ti dirintaika ba peminta sarak ti didinga dalam kot. Apai iya udah masuk dalam pengawa politik lebuh umur iya baru 27 taun, udah bekau iya tembu belajar ari University Adelaide di menua Australia enggau degree dalam undang-undang dalam taun 1960 dipelanja ngena scholarship.

Taib datai ari bansa Melanau, siti ari 27 raban bansa di Sarawak. Iya kala mangku mayuh bengkah pengawa menteri di Sarawak enggau di parlimen Malaysia sebedau iya mangku pengawa nyadi kepala menteri ti diberi aya iya empu, Abdul Rahman Ya’kub dalam taun 1981. Iya ditemu kena empa penyakit kanser perut anak tikas tumu lalu diputung dalam taun 2006, nitihka repot ari Bernama. Niang bini iya bebansa Poland mati ketegal kena empa kanser dalam taun 2009. Kira setaun udah pemati bini iya nya iya jadi enggau indu bebansa Syria, Ragad Kurdi, 46 taun jauh biak ari iya, nitihka penerang berita di menua Sarawak empu.

Anak iya, Abu Bekir mangku pengawa nyadi pengerusi dalam Sarawak Cable Berhad, sebuah kompeni tin gaga sereta ngeluarka kabel kuasa tinggi enggau ngaga wayar, ti udah mujur bulih projek masang kabel bekuasa tinggi ari kompeni Sarawak Energy Berhad enggi perintah Sarawak taun nyin kemari.

Sarawak nyadika pengeluar setengah ari asil minyak mata Malaysia enggau pengeluar tunggal gas chair, nitihka repot ari Standard & Poor dalam bulan Duabelas nyin kemari. Pengelama iya betan dalam perintah udah nyadi penentu pemansang pengawa dagang ke menua iya, nitihka Song Seng Wun, siku pakar pengawa dagang di CIMB Group Holdings dalam randau nengah telefon ari menua Singapura. Chara merintah menua nya udah mai penguntung ke wang turu menua, bagi swasta enggau ngagai dagang sida sebilik empu. Sida bulih untung ti regas ari peluang nya.