![Pupu sereta belubang dalam daun kipas ke injin kuasa karan hidro Murum tau ngujung ke iya “enda engkeman dikena” lalu meri kelai “pemuntan nya tau mai penusah besai”](/wp-content/uploads/imgcache/2014/07/pImg_57939e1194bbde8723e04f13ee68cd39.jpg)
Sebengkah pejalai ingin pengeluar kuasa karan hidro ti nyelai ti tau mai penusah besai bisi ditemu ba palan pengeluar kuasa karan hidro di Murum, munyi ti bisi ayan dalam dokumen resia ti bisi datai ba Sarawak Report, dalam sebengkah atur ti nguji miki daun kipas ti enda manah digaga dalam injin nya, ti udah dipasang.
Langkar atur pengawa ti udah ditiriska nunjukka langkar pengawa nya meri arah ngagai bala enjinir bekereja ba endur ti tinggi sereta tau nganu nyawa ketegal gas ti tiris enggau letup ti tau nyadi dalam ruang betutup, ba sebengkah atur dikena sida miki daun kipas injin nya, ti udah “diseteri enggau chara ti enda manah” lalu mega “enda diempelas enggau manah”.
Atur pengawa ti patut dikereja nya ngerumbak baru 4 buah injin besai turbin kuasa karan hidro nya, ti udah dipasang dalam dinding tekat ti baru tembu digaga – sebengkah chara kereja ti begunaka pengawa ngerubuhka dinding lalu muai mayuh bendar simim ti endur injin nya dipasang.
![Kereja miki beteknologi tinggi ti deka dipejalaika ba injin turbin ba tapak tekat tu!](/wp-content/uploads/imgcache/2014/07/pImg_efb03e1f092b68fffa892dcf54e243dd.jpg)
Kebuah ti deka ngerumbak baru injin enggau kipas turbin nya udah bekau repot meresa semua injin nya “enda betul dipasang”.
![Besi ti bepetik enggau begelembung – lunsur deka ngujungka kipas tau rusak](/wp-content/uploads/imgcache/2014/07/pImg_8d06d02cfeff860231c084bae8c8b2f5.png)
Pengerugi ari ungkus enggau timpuh maya ti lubah nya ngemediska ati. Tang, datai ke sehari tu nadai sebarang penerang ari opis kompeni Sarawak Energy tauka Perintah Menua Sarawak bekaul enggau penanggul dalam projek nya.
Repot ti enda besenutuk ti dikeluarka kompeni SEB madahka pengawa ngaga tekat nya dikereja enggau mujur lalu nitihka langkar kereja, ti endur kuasa karan ari tekat nya deka dikeluarka ba pun bulan Semilan taun tu ila.
Lalu ba pun minggu tu kepala menteri Sarawak ti baru, Adenan Satem udah bisi ngeluarka siti penerang ti madahka perintah menua iya deka majak ngaga mayuh agi tekat ti baka nya baka ti udah dilanggurka dalam polisi Taib Mahmud.
![Pengawa besambungka besi kipas ti enda betul lalu enda diempelas. Daun kipas turbin ditemu bisi begelembung sereta belubang – repot ari kompeni penyanding penemu, Norconsult](/wp-content/uploads/imgcache/2014/07/pImg_dfe65844219d8ebb64f4f8503428f869.png)
Sekeda ari dokumen ti bisi datai a kami nya repot ti penuh ti mantaika baka ni kipas turbin diberi ari kompeni menua China, Three Gorges Dam Development (Malaysia) Sdn Bhd, sebuah anak kompeni telesak ari indu kompeni Three Gorges ti udah mujur ngaga Tekat Three Gorges di menua China, udah ditemu “enda manah” lalu “enda ngemenuhka spesikasyen kontrak” nya.
Repot nya udah dikeluarka ari kompeni Norconsult ari menua Norway, ti udah diberi tanggung pengawa meresa tekat ai nya ba ujung taun nyin kemari, lalu repot nya udah diserahka ngagai Sarawak Energy ba bulan Tiga taun tu tadi, besereta enggau langgur langkar pengawa dikeluar ngulihka turbin ti stindit, taja pan diatu semua turbin ti deka diguna nya udah tembu pasang magang.
Penanggul ti besai nya bepanggai ba kualiti pengawa besi ba daun kipas turbin nya, berindik ba penerang enggau gambar ti bisi diberika ngagai Sarawak Report.
![Injin turbin gerasi ti patut dipasang enggau naka penyimat.](/wp-content/uploads/imgcache/2014/07/pImg_8a47488f1e803da283210d034fbaf486.jpeg)
Perengka ti dikumbai ‘runner’ musin ke daun kipas turbin lebuh maya kipas nya ke duju ai ari tekat.
Daun kipas nya patut tegap lalu dipasang enggau naka penyimat, awakka iya tan dalam pengelama bepuluh-puluh taun enggau nadai dituntung sebarang penanggul, nitihka penemu bala orang ti landik dalam pengawa ngaga tekat kuasa hidro – enti palan pengeluar kuasa karan nya nitihka atur baka ti dikarapka.
Tang, pengawa nguji sereta mereka ti dipejalaika kompeni Norconsult nya nunjukka kualiti ti enda manah dikena ba semua runner ti udah dipasang nya.
Dalam repot nya suah bendar leka jaku “bekau pengawa ti enda manah” enggau leka jaku “nadai diempelas enggau menyana” dikena nerangka daun kipas ba injin turbin nya. Repot nya mega bisi nyebut pasal ‘rekah’ enggau ‘gelembung angin’, ti ba timpuh ti enda lama agi deka nyadi ‘besi ti deka rusak’.
Mayuh gambar foto ngena enselup bechura mirah udah dikirumka ngagai Sarawak Report, ti ngayanka penanggul nya, ti bisi nyadi ba semua daun kipas turbin ti udah diperesa ba 3 ari 4 buah runner di Murum. Daun kipas nya ditemu kasar lalu enda licin, ti disadang tau mai penanggul lalu ngujungka daun kipas deka patah.
Siku tuai enjinir ti pandai dalam pengawa ngeluarka kuasa karan ari California, ti udah teleba enggau gaya di menua Sarawak, Professor Daniel Kammen ari Universiti Berkley, udah meresa penerang ti bisi ba kami nya lalu madahka Sarawak Report gambar foto nya nunjukka kualiti daun kipas nya endang amat enda manah.
![Bekau rekah enggau penimpang ba daun kipas dalam runner lumur 1, 2 & 3](/wp-content/uploads/imgcache/2014/07/pImg_a194d84e0b15af0810374d6feb3616d9.png)
Peresa ti dipejalaika Professor Kammen ba penerang nya endang dikamatka komen ti dipansutka Norconsult ti dipejalaika sida kena 20hb Mac, nunjukka rekah enggau jembul ba daun kipas turbin nya ngujungka kipas nya patah lalu tingkil.
Jembul ba besi tau ngujungka pengerusak ngagai selampur injin turbin nya.
Kompeni Norconsult udah nyediaka siti rintai atur pengawa ti patut dipejalaika enti sema pengerusak nya nyadi bepun ari penimpang nya udah ngenakutka ati raban pengurusan pemadu tinggi dalam SEB enggau bala tuai perintah dalam kabinet Menua Sarawak dalam bulan Mac tu tadi.
Penanggul tu disadang deka mai pengerusak ngagai injin nya enggau mega bah enggau pengangus dalam palan kuasa nya. Tang nadai siti pan penanggul ti disadang nya, baka ti udah direpotka kenyau ari bulan Tiga tu tadi, bedau diterangka ngagai orang mayuh.
![Enda manah, penimpang ba injin ti tau nganu nyawa orang mayuh](/wp-content/uploads/imgcache/2014/07/pImg_0bdb3733bc2069e6b92201e9024af24e.png)
SEB enggau Perintah Menua Sarawak udah ngepunka projek tu ngena atur belalai, ngisi duit agih belanja bebilion-bilion ringgit taja pan kena bantah raban penyakal lalu diatu penanggul ba injin turbin nya mega dipelalaika, enda setipak enggau jaku pengandal ati sida ke projek nya dulu ari tu!
Ngena chara ti enda ngaku bisi penanggul ba tekat nya, ti diseretaka enggau penerang baka ti diberi ngagai Sarawak Report nya udah nunjukka SEB enggau bala kontraktor sida udah milih bejalaika atur pengawa ti nyelai sereta berisiko tinggi chara belalai dikena sida miki turbin ba tekat nya.
Sarawak Report bisi bulih penerang ti nunjukka sebengkah aum entara SEB enggau kompeni ngaga tekat ari menua China udah mutuska runding sida nguji miki kipas turbin ba tekat nya empang, lalu enda nyeliahka sadang bekaul enggau pengawa ngerumpang sereta muai turbin ti udah dipasang nya.
![Kompeni ti nyual perengka turbin di Murum?](/wp-content/uploads/imgcache/2014/07/pImg_1e39a33fc6905d1cf8b90fc773f34a44.png)
Siti rintai atur pengawa udah digaga ke atur pengawa ti nyelai dikena miki turbin ba tekat Murum.
Pekara pengelikun nya nyengkaum nyediaka pengawa masang perancha ke pengawa ba endur ti kelalu tinggi; nyediaka diri napi sebarang pekara jai tau nyadi, penusah angus, gas tiris, asap berachun, etb; atur pengawa besambungka besi enggau tubuh pengereja pengawa ti chukup dikena napi pengawa ba endur ti mar, tinggi sereta enda likun.
![Atur pengawa ti udah puntan? SEB ringat minta atur pengawa miki ba palan tekat Murum dipejalaika](/wp-content/uploads/imgcache/2014/07/pImg_3a7b23f29de7de3648323bf44d12627e.png)
Sarawak Report mengkang bedau nerima sebarang berita ari Murum ke pengawa tu sekali ke udah tauka bedau dipejalaika enggau mujur. Tang bala orang ti pandai ba pengawa nya meri tangkan ti endur SEB enggau kontraktor sida ngambika bejalaika atur miki ti nyelai chara lalu bedau kala dikereja sapa-sapa sebedau tu, ba sebarang tekat kuasa karan.
![Kualiti turbin ti enda manah ari menua China? Kompeni Harbin mega patut meri penerang ngagai orang mayuh ke perengka turbin ti dijual sida](/wp-content/uploads/imgcache/2014/07/pImg_7a811297d1c12a23b47546df3c01f2de.png)
Tang, chara nya disadang mejal semua orang ti bisi tanggung pengawa bekaul enggau tekat Murum nya patut ngaku penimpang ti udah nyadi nya ngagai rayat menua Sarawak – ke sebengkah pengawa ti dikereja enggau enda manah atur datai ngagai tikas bala orang ti bepangkat.
Enti tuju ke bendar ngaga tekat Murum nya ukai dikena ngeluarka kuasa karan tang dikena mai penguntung bebilion-bilion ringgit ngagai sekeda orang politik, engka kuasa perintah ti diatu nya enggau mega SEB enda peduli.
Tang, rayat Sarawak ngambi berat lalu Torstein ari SEB diatu patut nerangka enggau silik ngagai rayat Sarawak baka ni, enggau ngena semua pengelandik ba iya empu, ulih masang turbin ti bisi penimpang ti berega beratus juta ringgit engga enda ibuh meresa enggau silik sebedau belabuh masang nya suba.
REPOT TI SILIK BEKAUL ENGGAU TURBIN DI MURUM TAU DIPEDA DITU