![Mayuh agi tekat ke penguntung raban kroni BN enggau Taib Mahmud sebilik](/wp-content/uploads/imgcache/2014/07/pImg_a79d69ce4e6e04796fffe41a4c278ca4.png)
Kepala Menteri Sarawak ti baru Adenan satem endang udah disadang ngena penuduk iya nyadika pengurus pengawa dagang ke Gabenor Taib Mahmud.
Sehari tu tadin iya bisi ngeluarka sebengkah penerang ti madahka menua Sarawak “enda tau enda” ngaga mayuh agi tekat ai dikena napi peminta pemansang pengawa industri enggau mega ke guna “rayat”.
Iya udah didinga kering bendar madahka iya enda ibuh ke pengerembai jaku bantah orang ari tikas entarabansa.
Satem endang bisi kuasa madahka raban NGO nya ukai orang ti bempu batang sungai, tang iya empu ukai mega bempu batang sungai nya. Orang ti bekuasa sereta bempu batang sungai nya rayat Sarawak lalu siti pekara ti dikelaungka dalam penerang iya nya pasal rabang orang ti mantah enggau rayat Sarawak ti ringat bendar ke langgur pengerangka BN.
Nama kebuah? Laban, orang ti keran bendar deka begagaka tekat ai nya semina sida Taib Mahmud sebilik ti deka bulih untung bebilion-bilion ringgit ari kontrak nya ila.
Kelimpah ari nya, rayat Sarawak enggau raban bansa asal ti deka dituntung penanggul ketegal pengawa ngaga tekat ai nya udah terang bendar ngayanka bantah sida rambau pengerami Gawai Dayak tu tadi.
Rayat Sarawak udah nemu sereta ngelala, orang ti deka bulih penguntung ari pengawa nya ila – beduduk ari rekod perintah ti meri pemerinsa ngagai orang bansa asal; enda ibuhka bayar pampas enggau nadai pemansang dikereja di menua pesisir.
![Komisyener Kuasa Pengelantang Mensia, James Nayagam ningaka serebana raban bansa Penan di Murum](/wp-content/uploads/imgcache/2014/07/pImg_cbbdb4021e0141089a057d4c8f7ca66d.png)
Ba minggu nyin kemari, komiti kuasa pengelantang mensia Malaysia empu (SUHAKAM) bisi ngenataika repot ti madahka raban bansa asal Penan benung dituntung “mayuh penanggul” dalam pengidup sida, lalu sida niti pengidup ti balat ngenyinuka ati ba genturung pengentap pendiau di Tekat Murum.
Ba tikas entarabansa, raban The Ecologist ari menua UK madahka baka ni tekat besai-besai di Sarawak tau nanggul raban bansa asal lalu nuju penusah ngemunaska raban bansa.
Rabn orang di bakun, Batang Ai, Bengoh enggau mega di Murum udah meda pemerinsa idup sida ketegal pemansang tekat ai di endur sida, lalu beduduk ari nya orang di Baram enggai nerima nasit ti sebaka enggau nya.
Sida iya deka agi ke projek tekat ai ti mit-mit ti ulih meri mayuh penguntung ke sida, ukai ti tau nguntungka palan pengelebur besi ti besai-besai enggi kompeni ari menua tasik enggau enggi sida Taib Mahmud ti didudukka beratus-ratus batu ari genturung pendiau sida.
Raban NGO, Save Rivers ari menua Sarawak empu, bisi ngeluarka penerang bekaul enggau bantah sida rambau pengerami Gawai tu tadi – sebengkah gempuru besai dikena ngayanka bantah sida ti ngempuruka mayuh pupu raban bansa asal di Sarawak. Batang pengawa Adenan Satem nya patut ngemataka pengelantang raban bansa asal tu, lalu ukai ngeruga pengidup sida.
![Nadai bantah di Baram? Lebih 500 iku orang bansa asal ngayanka bantah sida ngagai perintah](/wp-content/uploads/imgcache/2014/07/pImg_826b22715c76354bea05d66ae28c3337.png)
Long Lama Baram: Ba ujung minggu tu tadi iya ba pengujung bulan Enam 2014, sebengkah empang jalai didirika dikena nagang pemansang projek tekat bisi diatur di Long Lama, Baram. Mayuh pengerami bisi diatur maya nya. Orang ari jauh enggau semak bisi datai ke Long Lama laban deka sama enggau berami Ngiling Tikai.
![Beratus iku orang bansa asal ngayanka sukung sida laban deka ngetanka tanah enggau kampung pesaka asal sida ti ditinggalka aki ini sida kelia](/wp-content/uploads/imgcache/2014/07/pImg_032bc4d512b7af8a9082c7376bc3e427.png)
Pengerami nya dikena ngelai pengujung pengerami Gawai Dayak belabuh ari 1hb Enam ninting taun nyentuk ke ujung bulan nya.
Ba endur empang jalai ba ujung minggu nya, pengerami Ngiling Tikai mega diatur dikena ngayanka serakup pupu raban bansa ti angkan mantah projek tekat Baram.
Sama bisi bisi ngulu pengerami nya mega bala orang ari endur bukai ti sama bisi ngayanka bantah di menua sida ngagai pengawa ngulihka kayu batang enggau chara enda beradat sereta enggau pengawa ngeruga tanah NCR dikereja orang ba tanah enggau menua sida.
Atur pengawa orang maya nya rami bendar. Saup ari semua orang ti datai terang bendar dipeda. Ba tapak empang jalai nya, berengkah ari tumu pagi nya, sida ngambi bagi nyumai pemakai, tauka belatih ngayanka ajat enggau main asal sida empu, lalu sida ti bukai bisi dipeda ngias tapat enggau palan ti deka endur berami.
![“Bala aki ini kami udah bebendar ngulihka lalu mati ketegal tanahtu. Menua Baram tu endang enggi kami belama-lama” – sebengkah jaku tangkan ari tapak empang jalai](/wp-content/uploads/imgcache/2014/07/pImg_59377b2687446a0f856e249272473e7d.png)
Raban orang ti datai kia sehari nya udah ngayanka penegap kaul pupu raban bansa Baram lalu sida ulih begulai enggau diri sama diri.
Raban bansa ti datai ngagai endur nya bansa Iban ari baram enggau Tinjar, Kenyah, Kayan, Berawan, Tering, Melayu, Penan enggau China ari baram, Tinjar, Tutoh enggau Apoh. Rekod penatai bala orang ngayanka lima ratus iku pemayuh bala orang ti datai.
Batang pengerami ke sehari nya iya nya ngajat bebala mayuh ngelingi kayu ranyai ti dibantaika betangkan-tangkan enggau pangan diri. Ba pun kayu ranyai nya bisi diengkahka pemakai enggau ai irup.
Dikena ngujungka ajat diri empu, iya ti ngajat deka ngengkahka pemeri diri empu ke dalam siti baka ti endang diengkahka ba pun ranyai ti diberika ngagai tuai gawai, ba kes tu, tuai gawai sida nya Komiti Pengintu Pemanah Rampa Menua Baram (BPAC) ti ngatur pengawa ngempang jalai di pelilih Long Lama. Udah tembu ngajat ngelingi kayu ranyai nya, mayuh agi ajat enggau main asal ti bukai dibantaika bala orang, nyentuk ke tumu pagi siti.
![Raban bansa asal ari serata menua Sarawak begempuru nunjukka sukung sida mantah projek tekat ai Baram. Bisi sekeda ari sida nya dituntung penanggul kena keruga orang tanah NCR.](/wp-content/uploads/imgcache/2014/07/pImg_47bf5299da98a0bd7204bbbaa2bc49a2.png)
Ba jaku pengelalu iya ba pengerami nya kemari, Pengerusi BPAC, Philip Ngau, madahka pengaga ati diri meda sukung ti diayanka orang mayuh ngagai pengawa ngempang jalai di Baram kenyau ari 23hb Sepuluh 2013 nyin kemari.
Kimpin nuliska chap jari ba kain rentang ti dipunka raban nembiak dalam komiti Save Rivers mega nerima sukung ti manah bendar ari orang mayuh ti datai maya nya, ti nyadika kelai mantah penerang ti madahka semina tiga iku aja orang mantah projek tekat ai Baram, munyi ti disebut Sapit Kepala Menteri Sarawak, Tan Sri Jabu Numpang, dalam penemuai iya ke Long Silat tu tadi.. Diatu kain rentang chap jari nya udah ngundan lebih seribu iti chap jari bala orang ti mantah tekat Baram nya, lalu penyampau chap jari nya majak betambah.
Penerang ti silik pasal empang jalai di Baram tau dipeda ba Laman Sukung Bantah Tekat Baram. Bala orang tin emu ninga enggau bejaku Iban tau ningaka program ari Radio Free Sarawak, ti endur raban pengarang berita kami bisi ngerekod jaku randau kami enggau Pengarah Mark Bujang ari Borneo Resources Institute (BRIMAS) bekaul enggau jaku penerang ari Adenan Satem.