![Sekali Abu bekir (tengah) endang deka nguji meli beberapa buah helicopter dikena ngulihka pengawa dagang ti dipelanja ADB?](/wp-content/uploads/imgcache/2014/10/pImg_ca729a099e483d42d39a9b690f318b8f.jpg)
Raban NGO udah belabuh inggar udah bekau sebengkah duit injau dibantaika ari Bank Pemansang Asia (ADB), ti endur Gabenor Sarawak, Taib Mahmud, udah terang bendar merambu deka nepu semua duit jali nya dalam kuchik iya empu.
Bala NGO nya udah komplen madahka skandal ti baru ditemu nya bisi kaul enggau projek SCORE, laban duit jali nya udah ngelanggar atur sebuah agensi ti patut betuju ngapuska penyeranta, lalu ukai dikena nambahka pengawa siku orang ti pemadu kaya di menua Asia.
Duit jali ti bepenyampau RM145 juta (tauka US$45 juta) udah dipinta Sarawak Energy Berhad (SEB) dikena melanja pengawa besambungka arus kuasa karan ari Mambong ngagai Kalimantan.
Pemutus penemu nya udah digaga ADB ke beberapa bengkah program pemansang enggau kuasa karan ti meruan.
Tang ba penyauh semina 45km ti deka dipelanja ngena duit jali ba rega 1 juta dollar ke satu kilometer.
Lalu baka ti ditujukka bala pemeresa duit dagang, enda ngalitka ati sapa ti disadang deka bulih untung ti mayuh ari projek tu kelimpah ari kompeni Sarawak Cable enggi Abu Bekir Taib.
Kompeni Sarawak Cable pan udah mega diagihka syer besai dalam projek masang tali kuasa karan ba SCORE lalu pengawa masang tali kuasa karan sepemanjai 45km nya mega deka diserahka ngagai kompeni nya.
Ba minggu tu tadi bisi 40 buah gerempung NGO, ti betuaika gerempung International Rivers, Bruno Manser Fund enggau raban pemantah tekat di Sarawak empu, Save Rivers udah nunjukka bantah sida madahka duit injau nya ngelanggar pemanah nama ADB lalu patut ditagang.
Semua gerempung NGO nya udah nunjukka empas pengerusak rampa menua dibai SCORE ti balat bendar ngerusak rampa kampung ti besai; muru lalu ngeruga pengidup orang bansa asal, lalu mega ngujungka pengelepas gas metana ti tau nganu nyawa mensia. Jaku penerang pasal pengawa pemansang sereta mega kuasa ti meruan nya pelesu, lalu ari nya sida minta bank nya meresa baru projek ti dipelanja sida ngena duit jali nya.
Taib Mahmud kala didinga madahka sida sebilik “nadai kala bedagang di menua Sarawak” ti iya ditanya pengarang berita suba. Tang ke bendar iya kompeni-kompeni iya endang seruran bulih kontrak ti besai-besai baka ti ditemu orang mayuh.
Sarawak cable nya sebengkah ari pengawa dagang ti udah ditumbuhka ngena atur ‘penswastaan’ reta menua lalu dipasukka ngagai pegai sida Taib sebilik. Tuju ke bendar iya endang dikena nyintak semua penguntung ari wang turu menua kelimpah ari ti dikena melanja tali kuasa karan ke projek SCORE.
Program ‘penswastaan’ tu asil ari runding Taib empu, ti udah salahguna enggau penuduk iya ti nyadi kepala menteri, menteri pekara wang menua enggau menteri pengeraja asal, ngambika tau dikena iya ngemasukka duit dalam wang turu menua ke dalam jari kompeni sida sebilik.
Ari nya, dalam taun 2009, lebuh Taib belabuh ngeregaska langgur projek tekat ai iya, iya udah numbuhka Sarawak Cable, tang maya nya kompeni nya bedau chakah, ti udah nya ngambi enggau pejal pengawa dagang ti bukai, nyengkaum Universal Cable Sarawak enggau Leader Universal, ti endur iya lalu nudukka anak iya empu nyadika orang ti bempu kompeni-kompeni nya tadi.
Diatu Abu Bekir megai 42% syer dalam Sarawak Cable, ti ngujungka atur nya udah nyangkal atur selama Bursa Saham Malaysia, ti enda ngemendarka siku pemegai syer tau megai syer enda lebih ari 33% dalam sebuah kompeni awam.
Udah nya dalam taun 2010 Taib udah ‘menswastaka’ kompenu Sarwaja Timur, iya nya siti ari kompeni ti enggi SEB, ke dalam pegai Sarawak Cable, nyadika penulu beberapa iti kontrak masang tali kuasa karan bekuasa tinggi beungkus beratus juta ringgit ke program SCORE iya.
Taib, ti nyadi menteri bempu tanggungpengawa maya nya, nemu bendar pasal beratus juta ringgit deka diberika ngagai Sarwaja Timur ba program SCORE. Beduduk ari nya, iya patut ditanya nama kebuah iya nyual kompeni nya, ngarika menua Sarawak, ngagai anak iya empu ba rega ti mimit bendar, RM16 juta?
![Laluh syer 25% dalam Sarwaja Timur mega lalu kena rampas Sarawak Cable, ti betuaika Abu Bekir!](/wp-content/uploads/imgcache/2014/10/pImg_397dc9a004ae82b9b69ddf7a2b93e74b.png)
Asil ari pengawa dagang nya, ti endur Taib udah dikarapka ngarika dagang menua nya, beratus juta ringgit untung nya udah dikeluarka ari wang turu menua lalu terus dipasukka dalam kompeni enggi anak iya empu.
![Sekeda ari raban kompeni pampang ti bulih kontral ti meruan dalam Sarawak Cable](/wp-content/uploads/imgcache/2014/10/pImg_a8e20c50f49cf3d6c044e97f6a6a45fb.png)
Berebak enggau nya Sarawak cable enggau kompeni Trenergy ti udah diambi iya nya mega ampit bulih laluh kontrak, taja pan napi jaku bantah ari sekeda raban penyakal ti madahka kompeni nya udah ngerebut kontrak ari kompeni ti jauh baruh agi enggau manah agi ti dikangauka kompeni ti bisi pengelandik
Ke bendar iya Sarawak Cable udah diberi semua projek masang tali arus kuasa karan ti besambungka enggau SCORE, lalu raban pengarang berita pengawa dagang sama besabi penemi ti madahka untung tu bisi bendar bekaul enggau orang politik ba kompeni nya.
Bala raban penyakal mega madahka penganti Taib, iya ipar iya empu, Adenan Satem, udah ngemendarka Taib majak ‘bedagang baka selama’ dalam projek SCORE, ti endur Taib endang mengkang bisi kuasa dia.
Ba taun nyin kemari kompeni AMResearch udah direkod bisi ngansak bala orang dagang beranakka puku sida dalam Sarawak Cable ketegal kompeni nya bisi kaul politik, ti udah nya tau disebakaka enggau penyalah makai suap.
![Taib ba pengerami bejadi palan pengeluar silicon ke SCORE](/wp-content/uploads/imgcache/2014/10/pImg_af749245add0c21ca2198aa8532410aa.jpg)
Diatu Sarawak Report udah ulih nentuka beberapa iti pengawa ti bukai ti dipejalaika Taib enggau sida sebilik, ti tau bendar nyungkit jaku tanya bekaul enggau pengawa meli bilun helicopter, sebengkah projek ti deka dipelanja ADB ti udah diambi Sarawak Cable ba sebengkah pengawa dagang ti dipeda bisi kaul enggau Pengerusi Abu Bekir nyadika orang tengah.
Kami udah mujur nemu pasal pekara Sarawak Cable ti diregaska baru ari sebuah kompeni ti ‘enda regas’ kenyau ari 2009, lalu sebuah agi kompeni ti enda regas udah ditumbuhka Abu Bekir, ti benama Sakti Aviation Sdn Bhd.
![‘Kompeni ti enda regas’](/wp-content/uploads/imgcache/2014/10/pImg_7ee426929896cd518960cc99fdde9fbd.png)
Kompeni tu diempu Kris Sakti Holdings, ti mega ngemataka beberapa buah kompeni bukai nyengkaum Kris Sakti Petrolium enggau Kris Sakti Technology Sdn Bhd, semua kompeni nya enggi Abu Bekir magang.
![Raban kompeni ti enggi Abu Bekir](/wp-content/uploads/imgcache/2014/10/pImg_60155adf90974f1279aab119f0e3ba01.png)
Tang, taja pan udah ditemu nyadika kompeni ‘ti enda regas’ kompeni Kris Sakti Aviation (nama lama, Helikopter Design Malaysia Sdn Bhd) udah dipeda betemegahka mayuh macham pengawa dagang sida munyi ti ditusui sida dalam laman web sida.
![Kompeni Kris Sakti Aviation – kala ditetapka nyadi kompeni ti enda agi regas?](/wp-content/uploads/imgcache/2014/10/pImg_89deeda7bdfab38481425f371fd168fc.png)
Ba bulan Enam taun nyin kemari, kompeni ti enda regas enggi Abu Bekir nya udah bejuraika penemu enggau sebuah kompeni pengeluar bilun Peranchis lalu nempah 3 buah bilun helicopter ba rega ti enda dipadahka.
Pengawa meli bilun nya ditusui enggau lenak, nyengkaum suratberita enggi sida Taib sebilik, New Sarawak Tribune ti udah nyebut enggau silik bansa 3 iti belun nya “AS350 B3e Ecureuil, sebuah bebansa EC135 T3 enggau sebuah agi ari raban bilun Super Puma, EC225 ti bulih 11 tan pemerat”.
New Sarawak Tribune mega nerangka guna ti bendar bilun nya ba “pengawa masang tali arus kuasa karan, miki enggau meresa”.
![Lalu, laman web enggi Kris Sakti Aviation udah kala ngeluarka sebuah artikel sida ti nerangka pasal juluk ati Abu Bekir dalam pengawa masang tali arus kuasa karan.](/wp-content/uploads/imgcache/2014/10/pImg_1ec71a33d085b83a21d2b5b6c644da8b.png)
![Kompeni ti enda agi regas ulih meli 3 buah helikopter](/wp-content/uploads/imgcache/2014/10/pImg_d1a0bd9e7868d5eae4034effa404267f.png)
Tang, setaun udah nya, ukai kompeni Abu Bekir ti enda agi regas nya, tang Sarawak Cable udah nerima bilun ti sebaka, enggau bilun bebansa Puma ti ketiga ti disadang deka datai dalam taun 2015 tu ila.
Bayar pala, nitihka Repot Taun 2013 Sarawak Cable bisi nyebut penyampau RM23 juta.
![Sarawak Cable udah nerima penatai bilun nya – Abu Bekir mengkang nyadika orang ti besai guna dalam pengawa dagang nya](/wp-content/uploads/imgcache/2014/10/pImg_8ac15328fa770486762714cbd1acb503.png)
Pengawa meli bilun nya dipejalaika Sarawak Cable nengah kompeni pampang iya, Aerial Power Lines Sdn Bhd, munyi ti direpotka, Kompeni nya udah diambi dalam bulan Semilan 2013, udah bekauKris Sakti mujur meli 3 buah bilun nya.
![Pengawa ngambi alih ulih Sarawak Cable ba sebuah kompeni ti dilisinka masang tauka miki tali arus kuasa karan ari atas](/wp-content/uploads/imgcache/2014/10/pImg_394750ce11a163b161093463ccb77754.png)
Penerang media ti dikeluarka raban pengawa dagang dalam opis kompeni Airbus ari Peranchis udah ngelala Aerial Power Lines nya aja nyadika kompeni ti dikemendarka Opis Penerebai Bilun Malaysia ngambi tau bejalaika pengawa di menua Malaysia, reti nya enti bilun dikena masang tali arus kuasa karan ke Mambong-Kalimantan, semina Sarawak Cable aja tau ngereja iya.
Bisi ditemu beberapa iti pengawa dagang ti enda ditemu tuku entara kompeni awam enggau kompeni ngatika diri ti enggi anak Taib, diatu begunaka penerang ti silik ti deka begunaka ‘duit jali pengawa pemansang’ entarabansa ari Bank Pemansang Asia (ADB).
Nama kebuah, ambi ke banding, Abu Bekir meli 3 buah bilun taja pan kompeni iya enda agi regas nya nadai lisin bejalaika pengawa masang tali arus kuasa karan ari atas, taja pan cerita nya udah ditusui suratberita ti dikuasa sida sebilik empu?
![Baka ti ditusui Utusan Malaysia – pengawa meli dikereja Kris Sakti](/wp-content/uploads/imgcache/2014/10/pImg_5a4687373839c855984ac1c099a43eba.jpg)
Tambah mega, enggau bayar ti dikereja Abu Bekir bekaul enggau kompeni tengali iya empu enggau kompeni awam nya, nama kebuah pekara bayar ti silik enda dipadahka ngagai orang mayuh baka ti dikedekaka undang-undang?
Enggau chara ti enda besabi, laman web enggi Kris Sakti madahka rega 3 buah bilun nya lalu enda ditemu sida.
Lalu, ba pengawa ti nguji bula kali ke penudi, ni bagi kompeni ti bendar nguasa pengawa meli bilun nya?
Penerang media ari kompeni Airbus ari menua Peranchis madahka ukai Sarawak Cable ti ngarika orang ti deka meli bilun nya, tang siku pemesai dalam Kris Sakti ti benama Suzannah baka ti ditemu ari emel iya.
![Penerang pasal Kris Sakti ditemu dalam penerang media!](/wp-content/uploads/imgcache/2014/10/pImg_f1c02083420f6430937795776c515b39.png)
Enggau penerang kompeni ti salah dalam jaku gerah nya, enda salah enti disebutka 3 buah bilun ti dibeli Kris Sakti ba taun nyin kemari nya endang bilun ti sebaka dibeli Sarawak Cable taun tu.
Taja pan Sarawak Cable tauka Perintah Menua Sarawak lalu bedau ngaku tuju asal meli bilun nya, tang orang mayuh ulih belabaka kompeni nya bisi kaul politik ti tau ngarapka diri seruran bulih kontrak ti enda ibuh betender ti deka dipelanja ADB ngagai SEB.
Enggau kaul dalam penyalah makai suap enggau Taib Mahmud ari Sarawak, bank nya diatu dipeda kena balut pengawa dagang ti kamah, nadai penampak lalu beratus juta ringgit dilesapka ari wang turu menua.
Bank Pemansang Asia patut ningaka jaku ansak raban NGO ba minggu tu lalu ngabas sereta meresa baru projek ti penuh laban jaku tanya sereta dipelanja enggau lebih.