![Sapa ti agi nyadi bos? Pengerami bejadika Aum DUN Sarawak – tang sida semina baum ba pengelama 8 hari ba sekali baum!](/wp-content/uploads/imgcache/2015/01/pImg_b7d4da9db86891588763946a7c490440.jpg)
Menua Sarawak diatu ngasaika pengembai ba sitak bepilihbesai. Pemayuh orang 2.4 juta iku diatu diarika 71 iku pengari rayat, ti ditambahka 31 iti kerusi parlimen, ti dipeda tau bendar nekan belanja wang turu menua.
Bala pengari rayat tu udah ngasaika tambah ba gaji bulan sida belipat tiga kali udah bekau bepilihbesai nyin kemari ba penyampau RM20,000 siku ke sebulan, taja pan sida semina sempat datai lalu duduk baum ba pengelama 16 hari dalam setaun – iya nya dua kali baum 8 hari sekali-sekali baum.
Taja pan bala ‘pengari rayat’ tu jarang bendar nemuai ngabas bala pengundi sida, opis Komisyen Pengawa Bepilih (SPR) udah mansutka jaku gerah madahka penambah ba pemayuh kerusi 11 iti ba langgur sida ti ngupa kar bepilihbesai di menua Sarawak, ti ngujungka sida balat nerima jaku bantah enggau jaku kutuk orang mayuh ba menua ti seruran ngumbai diri ngena atur demokrasi tulin.
Perambu tu udah dipejuraika enggau chara belalai lalu diatu perambu tu udah diayanka ngagai orang mayuh ngena chara pejal, lalu meri awak 30 hari endur sida tau mantaika bantah sida.
Chara netapka garis menua sitak bepilih tu jauh bida ari ti dikereja perintah menua UK, ambi ke banding, ti keterubah iya sida betanyaka penemu orang mayuh enggau silik, lalu sida mega ngena atur ti tampak sebedau perambu sida nya diayanka ngagai orang mayuh.
Opis SPR di Malaysia ukai semina enggai ngena penemu orang mayuh ti udah meri pechaya sida tang sida udah enda ibuhka lalau ti dikenataika gerempung baka Bersih enggau Tingat Malaysia bekaul enggau baka ni kerusi pengari rayat dipedua dikena ngemanahka agi atur demokrasi.
Sida di opis SPR empu nya udah salah atur dikereja bekaul enggau ubah garis menua nya, enggau chara ngelanggar undang-undang lebuh maya sida ngenataika jaku gerah nya. Jaku gerah ti dikena madahka perambu ngubah garis menua nya patut dipadahka ngagai orang mayuh di serata menua nya patut enda kurang ari 30 hari dulu ari nya.
Tang penyelai iya, bala pemesai ari opis SPR udah ngena peluang mansutka jaku gerah sida dalam suratberita ti dikuasa sida Taib sebilik, Sarawak Tribune ti disadung enggau besekat di menua nya. Lebuh pekara tu dibantah sida lalu mansutka jaku gerah kedua kali dalam suratberita kroni-kroni iya, Borneo Post – nya pan dalam edisyen Sabah! Nama kebuah sida mansutka jaku gerah ba ubah garis sitak bepilih menua Sarawak nya dalam Borneo Post edisyen menua Sabah?!
Taja pan baka nya, ubah ba garis menua nya empu ti besai agi guna ke demokrasi, laban opis SPR udah kala mujur ngelanggar konstitusyen bekaul enggau agih penyampau kerusi di Sarawak ti ngujungka atur nya jai agi, ukai ngangkatka pemanah iya.
Ba ubah ti diatu opis SPR udah balat agi ngamahka buah runding demokrasi, ari ti numbuhka mayuh agi kerusi mit-mit, kelimpah ari ti nadai kiruhka kerusi ti ngarika penyampau pengundi ti kelalu mayuh pengundi!
Ba ubah tu 3 iti kerusi ti pemadu mit diatu semina bisi 6-7,000 iku pengundi, lalu 3 itu kerusi ti pemadu besai bisi lebih ari 30,000 pengundi ti ngujungka nya 5 kali lipat besai agi.
Terang bendar kerusi ti mit-mit nya endang dikuasa PBB, lalu semua kerusi ti pemadu besai nya dikuasa parti penyakal DAP!
Bala pemerati udah nunjukka semina 36 iti kerusi ti baru nya disengkaumka dalam bida 33% ari pukul rata iya, baka ti dipinta undang-undang lalu 46 it agi kerusi beduduk ba luar pinta undang-undang.
Nama reti ubah tu dalam runding bala pemesai dalam opis SPR?
Kitai ulih ngaga simpul ti madahka bala pemesai opis SPR ti ngumbai diri bekereja ‘enda dikuasa ‘sapa-sapa’ nya endang diasuh sekeda orang politik pemerintah bejalaika atur ngubah garis menua sitak bepilihbesai dikena nambahka mayuh agi kerusi ke bala penyukung BN ba sitak menua pesisir, lalu nejuka kerusi bala penyakal ti enda mayuh nya enda betambah.
Tambah mega ba bepilihbesai 2011 suba BN semina mujur bulih 55% sukung ari bala pengundi tang sida udah mujur ngetanka 77% ari kerusi nya (ti meri sida lebih ba pemayuh kerusi 2/3 ti diguna sida ngambi sida ulih terus megai perintah lalu ngubah undang-undang sepeneka ati sida, taja pan diatu sukung ngagai sida nyau majak kusut).
Perambu SPR ke diatu nya deka nambahka atur ti balat enda sebaka!
Lebuh dibantah sida deka mansutka 1001 iti jaku silat. Kerusi ti patut ditambah nya kerusi di menua pesisir ti endur pengundi diatu jauh-jauh ari pangan diri lalu menua ti mar digusung ba maya bepilihbesai.
Tang kerusi-kerusi baru ti pemadu mit ti diubah dalam kar ti baru nya ukai beduduk dalam menua pesisir. Kerusi nya di pelilih Gedong, ti bisi 6,340 iku pengundi, ba penyauh seja pejalai ngena kerita ari nengeri Kuching.
![See Chee How – udah datai ba maya endur DUN Sarawak patut nambahka pemanah reti demokrasi, ukai ngerusak demokrasi](/wp-content/uploads/imgcache/2015/01/pImg_74ed1ea7205afd0e1f1939a7e5a73f3c.jpg)
Kerusi ke sitak Gedong nya endang kerusi kukuh enggi PBB.
Nya kebuah opis SPR mar bendar deka mujuk sapa-sapa ti endur sida nerangka ‘reti ngubah garis menua’ nya enda lebih ari nipu ti dikereja parti perintah.
Pengari parti penyakal See Chee How, di nengeri London ba minggu nyin kemari, bisi betemu enggau bala pemesai Opis Menua Luar UK, ngaga simpul penemu, ti endur iya madahka ngagai Sarawak Report:
“Kitai patut ngansak bala pengari rayat nya chakah agi ngereja tanggungpengawa lalu ukai numbuhka pemayuh kerusi dikena ngemuaska sistem perintah baka ti dipejalaika BN. Nambahka mayuh agi kerusi ke BN lalu atur nya endang ngelanggar konstitusyen menua”
Kepala Menteri ‘ti mai ubah’ bempu peluang meresa sereta ngabas pengawa ti kamah tu lalu ngamatka penerang ti madahka menua Sarawak nya sebuah menua ti bebasa atur demokrasi ti tulin baka ti suah dikemesaika.