Deka tauka enda Riza Aziz majak enggau saman petenah iya ba New York Times (NYT) sehari tu, udah bekau sebuah artikel ti mansik ulah bebelika barang bakih iya dim menua US, siku tukang belanja ari Malaysia, Jho Low lalu betanyaka pun penatai pengaya iya ti nyelai.
Agi mega NYT udah suah bendar sereta besetuju enggau penerang ti udah direpotka dalam laman blog tu pasal pengawa ti melanja anak tiri Menteri Besai Malaysia, Najib Razak beberapa taun tu udah lalu ngamatka pemanah kaul iya enggau Red Granite enggi iya di Hollywood enggau Jho Low.
Suratberita NYT nya udah mantaika sekeda berita ti ngalitka ati, ti endur sebuah rumah besai di Hollywood ti udah dipelabaka Sarawak Report diempu Riza Aziz udah kala dibeli Jho Low lalu rumah nya nadai rekod kala dibeli ti meruan.
Tu udah nyungkak jaku tanya pasal penyalah makai suap di Malaysia enggau pasal penyalah lari ari chukai di menua Amerika Syarikat, ti endur dua iti penyalah nya sama-sama berat.
Lebuh Sarawak Report mangkit kaul Jho Low enggau Riza setaun ke udah bala peguam Riza lalu ngemba kami ngena sama petenah, enti kami enda madamka artikel kami nya enggau jampat. Tang kami enda ngasika jaku emba sida nya.
Surat ari peguam Loeb & Loeb nya mega bebulaka pansik Sarawak Report ba pengelama pengawa ngaga wayang Riza engga bakih iya Joey McFarland, enggau ngaku, ambi ke banding madahka McFarland nya enda kala bekereja nyadi pengari ngudar bakat, ti nyewa pelayan Paris Hilton ngambika sama ngulu pengerami-pengerami ti diatur Jho Low.
Tambah mega, NYT nandu dawa sida nya. Nya alai kami deka betanya ngagai Riza enggau bala bakih iya sekali ke sida deka majak nyaman petenah atas NYT?
Ba taun nyin kemari Sarawak Report udah ngamatka pasal rumah besai di Hollywood ba lumur 912 North Hillcrest Road di pelilih Beverly Hills nya endang enggi Riza, tang bala peguam iya bebulaka penerang nya.
Tang ba surat ti sama bala peguam iya balat bendar mantah Sarawak Report laban udah tama ngagai laman rumah anak guam sida lalu beambika gambar dia, lalu diatu NYT udah ngamatka Riza enggau Jho Low udah mansutka jaku gerah dalam suratberita madahka Riza ti endang bempu rumah besai nya.
Tambah mega NYT ngamatka orang ti keterubah ngulihka rumah nya endang Jho Low empu.
Diatu NYT lalu ngamatka penerang madahka Jho Low nya ke terubah orang ti meli rumah nya lalu udah nya nyual ngagai Riza.
Di Malaysia dua iku lelaki ti rindu ke pengawa berami enggau begawai nya bisi isu rasuah ti patut diperundingka seduai, ari apai tiri Riza empu ti nyadi Menteri Besai Malaysia enggau pengeran Jho Low ngaga kaul dalam atur pengawa ngemataka tabung 1MDB, ti endur apai tiri Riza nya nyadi pengerusi lalu tabung nya diatu benung nuju pemuntan ti besai.
Kelimpah ari di Malaysia empu, seduai mega bisi isu ti patut diputarka di menua US, laban taja pan nuan meri rumah besai nuan nyadika buah jari di menua US nya, nuan endang agi dipinta undang-undang mayar sesebengkah chukai ti udah ditetapka atas pemeri nuan nya lalu mega ke pengawa pindah pengempu nya.
Enti enda baka nya, tentu bisi atur jual beli munyi ti diterangka, ti endur penerang ba atur pindah pengempu reta lalu atur mayar chukai, laban naka ke diatu nadai rekod nyual rumah nya.
Nitihka NYT, dua iku orang dagang nya madahka rumah flet Riza Aziz di New York ti dibeli ba rega $33.5 juta nya udah dijual ngagai Jho Low, ba sebengkah sempekat ti dikumbai “kelabur”.
Baka tu mih atur pindah pengempu reta ti kala direpotka Sarawak Report baka ti dikereja raban sida Yaw sebilik ari kompeni Samling ti bepalan di menua Sarawak, enggau sida Taib Mahmud sebilik lebuh iya agi nyadi Kepala Menteri suba.
Raban Taib sebilik bisi sebuah dagang kunsi enggau Jho Low dalam taun 2008-2010 ti sama-sama bempu bank UBG, sebedau bank nya dibeli enggau ngenyit ulih sebuah kompeni ti benama PetroSaudi.
Sekali agi bala peguam Taib inggar bendar ngutuk Sarawak Report enggau gerempung NGO rampa menua, BMF, ti madahka atur jual beli rumah besai nya dikereja nitihka atur entara dua raban orang diri sebilik, nitihka “rega jual beli” ti patut.
Tang naka ke diatu nadai sebarang rekod jual beli munyi ti disebut nya ari Samling ngagai sida Taib sebilik ba rekod tanah di Seattle tauka sekali ke chukai eksais kala dibayar bekaul enggau jual beli reta nya.
Tu mih isu ti patut ditunjukka lalu dipejalaika bala peguam Los Angeles ti ngarika Riza, kelimpah ari semuti nerima upah ngarang surat guaman ti ngasug saru runding nya.
Artikel NYT nya mega ngamatka kaul Jho Low, 1MDB enggau Riza, baka ti direpotka Sarawak Report suba. Surat berita nya mega mangkit chara ti nyelai ba pengawa melanja ti beresia nya lalu sida enggai meri sebarang penerang.
Siku CEO dalam Aabar Investments ti bisi kaul dagang enggau Jho Low enggau 1MDB ke pengujung iya lalu nyadi tukang belanja Red Granite lalu NYT mega ngamatka ketiga piak nya bisi kaul terus ba pengawa meli gempung hotel Claridge di London, munyi ti ditusui Sarawak Report taun nyin kemari.
Lalu baka ti seninjikkaul Jho Low dalam kompeni Majestic Materpiece ti meli sebagi ari bank UBG Taib Mahmud dalam taun 2008, sebedau PetroSaudi nya meli lalu syer ti agi tinggal nya dala 2010, mega direpotka NYT.
Pengawa meli syer UBG ulih PetroSaudi nya diatur udah bekau kompeni nya nerima duit puku lebih sati billion ari 1MDB.
Enggau resia ti kelalu besai ba atur ngemataka akuan ngena duit orang mayuh, nadai siku ulih madahka enti tabung ari 1MDB nya dipejalaika nengah PetroSaudi dikena bebeyara awakka tau nguntungka sida Taib sebilik enggau Jho Low.
Diatu dunya dipadahka duit wang turu nya mengkang dalam bank di Pulau Cayman, tang duit nya enda ulih dibai pulai ke Malaysia dikena bebayarka utang. Kenu ku cherita penanggul tu betegalka nyawa duit dollar makin lemi.
Dunya mega udah suah dipadahka pasal Jho Low ti nadai sebarang kaul enggau 1MDB lalu iya dipadahka enda kala ngambi sebarang untung ari tabung 1MDB nya, kenu.
Tang suratberita NYT udah ngamatka sebuah artikel Sarawak Report dalam bulan Semilan taun nyin kemari ti nunjukka pasal pemayuh email 1MDB ti dipeda blog tu nunjukka Jho Low endang bisi tanggungpengawa sereta udah ngasaika penyamai ba 1MDB. NYT mega ngamatka penerang ti madahka Jho Low udah betemu enggau tiga raban orang ti bisi kaul terus enggau 1MDB nya.
