![Khadem al-Quubaisi beperindang di San Tropez](/wp-content/uploads/imgcache/2015/04/pImg_5fcbd32e6295fdf0669eebe965cd6d4f.png)
Bisi dua iti watak ti bebida ba pemesai perintah Abu Dhabi ti tebilang, Khadem al-Quubaisi, ti mega nyadi perngerusi wang turu Aabar Investments, nitih ke penerang ti silik baka ti kala ditusui Sarawak Report.
Ambi ke banding, lebuh iya nemuai ke Kuala Lumpur kena 12hb Mach 2013 nyin kemari, enggau nanggam sempekat bebilion-bilion dollar ti nyadika buah kenang orang mayuh enggau 1MDB, iya dipeda begari ngena gari tradisyen orang Arab.
Ngena baju panjai burak Araab iya ngayanka diri nya orang Muslim ti tetap ati sereta jelan.
Tang, enggau sekeda gambar iya ti bisi diterima kami, iya mantaika watak ti jauh bebida ari watak siku pemesai perintah ti tinggi pangkat.
Di nengeri Las Vegas enggau di Selatan menua Peranchis iya tebilang enggau nama playboy pemadu kaya ti bisi ngembuan beberapa buah kerita sport berega mar, tiga buah rumah villa enggau sebuah kapal layar entara kapal layar pemadu besai di dunya.
![Khadem lebuh iya bejalaika pengawa iya nyadi pengurus pekara wang](/wp-content/uploads/imgcache/2015/04/pImg_bc71a121876886077392bc43e3520d4e.jpg)
Lebuh maya iya enda gawa Khadem rindu ngena baju-t ti ngayanka chap soldadu penyelawai. Iya bisi mayuh kelab malam lalu rindu ngelawa kelab malam ti ngayanka tubuh mulus orang indu (peratika gambar nangka tu).
Tang Khadem mengkang nyadi siku pemesai ba pekara wang pemadu tinggi pangkat ari menua Abu Dhabi.
Iya nyadi pengerusi dalam Aabar Investment, sebuah anak kompeni dalam IPIC (International Petroluem Investment Company), sebuah gerempung wang turu pengeraja menua Abu Dhabi, ti mega endur iya nyadi Pengarah Urusan.
Tuan iya Sheikh Mansour iya nya menyadi Putera Mahkota Sheikh Mohamed Zayed Al-Nahyan, ti sama bisi enggau Khadem al-Quubaisi ba sebengkah penemuai sida daalam taun 2013 lebuh nanggam sempekat dagaang kunsi entara menua Arab enggau Malaysia.
![Pengurus Aabar Investments, Khadem, nyurungka jari deka betabi (muak ke kanan iya CEO Aabar Investment, Mohamed Ahmed Badawy Al-Husseiny, ti kala madahka diri melanja pengawa ngaga filem Wolf Of Wall Street ti beungkus $100 juta).](/wp-content/uploads/imgcache/2015/04/pImg_02069d710e8178271b6c5777bbe2e5a5.png)
Menteri Besai Malaysia Najib Razak udah nentuka pengerami semanjai hari nya dirami enggau naka ulih, laban dua buah menua nya deka bulih projek beranakka puku dagang bebilion-bilion dollar di Malaysia ti disadang deka diasaika dua iti menua nya sama rata, 50:50, ti mega disadaang ulih meri pengawa begaji besai-besai ke beratus ribu iku rayat Malaysia empu.
Nitihka berita dalam 1MDB empu, suratberita di Malaysia udah dipadahka pasal menua Arab udah keran deka beranakka puku dagang sida enda kurang ari RM39 bilion ke menua Malaysia, RM18 bilion ari penyampau nya nyadika puku dalam dagang kunsi enggau 1MDB.
Tang utai ti nyata, dua taun udah nya nadai sesen pan duit ulih gumpul menua Abu Dhabi ke dagang kunsi tu.
Nitihka pengari bejaku ari parti penyakal DAP, Tony Pua, USD$3 bilion udah dipansutka nyerupa duit injau 1MDB atas nama mayuh bengkah projek, tang penyampau nya enda ditimbal Aabar Investment. Lalu ari nyampau nya semina setengah aja udah dipasukka dalam akaun.
Ke bendar iya Aabar Investment udah nginsap semua isi wang turu 1MDB, ukai bejalaika pengawa beranakka puku dagang baka ti dikarapka.
![Khadem al-Quubaisi udu berami sereta beperindang](/wp-content/uploads/imgcache/2015/04/pImg_5c9b0b36a34686f6fb088da7e176052d.png)
Ambi ke banding, baka ti kala direpotka dalam Sarawak Report dua taun ke udah, siti bond ke berega USD$1.75 bilion udah ditumbuhka dalam bulan Mach 2012 lalu dipasukka dalam wang turu 1MDB dikena meli palan pengeluar kuasa karan, Tanjong Energy, ti ngujungka rega nya kelalu tinggi, laban iya dijamin begulai enggau Aabar Investments.
Ba bulan Julai 2013 Sarawak Report udah mansutka penerang bon ti udah dikeluarka, ti nyentuk ke diatu agi mengkang dipelalaika.
Berita pasal atur dagang ti dikereja 1MDB enggau Aabar nya udu ngemediska ati.
Ba pemun nya, bungai duit ba penyampau 5.99% ditetapka, lalu tu amat nguntungka ari duit ti mudah diulihka enti diperanakka ba endur bukai.
Pekara ti nyelai nya bayar ke kereja 11% ti diberika ngagai bank Goldman Sachs International, taja pan bisi bayar ke kereja ti sebaka ba tikas baruh agi ari 1%.
Lalu bisi siti agi aspek ti nyelai ba atur nyali duit tu ti udah ngujungka 1MDB lenyau mayuh bendar duit, munyi ti disebut bala orang ti mantah wang turu tu.
![Baka tu gaya siku orang dagang ari Abu Dhabi ti patut bependiau lebuh iya enda bekereja?](/wp-content/uploads/imgcache/2015/04/pImg_717eab9a5c259fd15a93c2628df467fc.png)
Tu nyadika siti pemilih ti diberika ngagai Aabar dikena sida meli 49% ari palan pengeluar kuasa karan ti nyadika pampas pengiruh sida meri jamin ke duit jali nya.
Pekara ti ngenyitka ati nya atur dagang ti ngemendarka Aabar Investment nyimpan 45% untung dagang (ti manggai RM9.2 bilion) ari bon ti dikeluarka ti dipelanja menua Malaysia, nyadika pampas kereja sida ti nyadi ‘meri jamin’.
Dikena mansutka Aabar Investments ari penuduk ti tau ngemedis sida tu, 1MDB enda tau enda mayar enda kurang ari USD$250 juta, ku Tony Pua.
Suratberita pekara dagang The Edge bisi udah ngaga kira-kira lalu madahka dagang kunsi ti enda terang nya disadang manggai USD$1 bilion.
Suratberita nya mega belaba ke Aabar Investments nyadika jamin ba pengawa meli palan pengeluar kuasa karan Genteng ti ke-dua ba bulan Ogos 2012.
Jurai pengawa dagang tu udah dikerandauka lalu diputuska raban penyanding penemu 1MDB lalu nyengkaum pengerusi sidaa, iya nya Menteri Pekara Wang ti mega Menteri Besai.
![Baju-T ti ngayanka gambar gaya soldadu penyelawai – nyama dikena di menua Selatan Perachis?](/wp-content/uploads/imgcache/2015/04/pImg_107cf51b4fa7c5b69c4a8cf884d6f6ed.png)
Belalauka cherita tu Sarawak Report udah mujur bulih surat-surat penerang ti nunjukka kompeni Good Star Limited, Male, Syechelles, udah mayar USD$20.75 juta ngagai akaun bank Edmuns de Rothschild Private Bank di nengeri Luxemberg, ti enggi Khadem al-Quubaisi kena 20hb Februari 2013
Ba pun bulan tu tadi Sarawak Report bisi mantaika baka ni kompeni Good Star nyadika sebuah kompeni ti dikuasa siku orang dagang kaya ti biak umur Jho Low, ti dikitka ngagai Menteri Besai ti mega nyadi Menteri Pekara Wang, ti mega nyadi Pengerusi raban penyanding penemu ke 1MDB, Najib Razak.
Kompeni ti beopis di Pulau Cayman ti ngena alamat di Seychelles tu bisi nerima USD$940 juta dari USD$2.2 bilion ti patut diperanakka dalam kompeni PetroSaudi ba taun 2009/2010.
![Semina merati aja tauka nyadi tuai aum? Jho Low nyempulang bini Najib, Rosmah, enggau Putera Mahkota maya sebengkah penemuai raban ari Arab Saudi ba bulan Mach 2012 nanggam sempekat dagang kunsi.](/wp-content/uploads/imgcache/2015/04/pImg_c66117f1834f1d21f0037b1b1ec1fa17.png)
Kami ulih nerangka enggau silik baka ni Jho Low nyadika jeragan ke pengawa dagang PetroSaudi dalam taun 2009/2010.
Kami mega kala nunjukka baka ni Jho Low udah ngumbai diri bejalaika pengawa dagang ngarika Menteri Besai Najib.
Nya alai, agi tauka enda Jho Low nyadika jeragan 1MDB lebuh wang turu nya lebuh sida meli palan pengeluar kuasa karan dalam taun 2012 lalu bedagang enggau Aabar Investements ba bulan Mach 2013, lalu enti agi nama kebuah kompeni iya patut mayar kompeni Vasco Investment Services, sebuah agi kompeni enggi Khadem al-Quubaisi ba penyampau USD$20.75 juta dalam bulan Februari 2013?
![Pengerusi ke raban kompeni Hakkasan, Khadem al-Quubaisi mega nyadika orang ti bempu kelab malam](/wp-content/uploads/imgcache/2015/04/pImg_70bc13441dff4f8a52c727fa208bead7.png)
Beberapa bulan ke udah Sarawak Report udah nemu mayuh kaul entara Aabar Investments enggau Jho Low.
Enda disangka-sangka, mayuh kaul dagang nya ngaitka 1MDB.
Tu ke terubah iya Abu Dhabi ngayanka diri dalam konteks Jho Low kenyau ari 2008, lebuh kompeni ‘penulu’ Jho Low, Majestic Masterpiece, bisi ati ba bank UBG enggi sida Abdul Taib Mahmud sebilik.
Bank UBG udah mujur ngumbuk KWSP meli sereta ngambi alih sher dalam bank RHB pada rega RM1.4 bilion dalam taun 2007. Enggau nya, kompeni iya, CMS bisi duit ti chukup diperanakka.
Suratberita pengawa dagang, The Edge, udah mantaika penerang baka ni Jho Low meri diri mantu meranakka puku nya lalu udah nya nyual baru bank nya dikena ngulihka untung sejuta ari kepala menteri Sarawak nya, enggau chara mujuk iya ngambika meli sher ti mayuh agi dalam projek Iskandar, ti endur iya udah bulih siti sher, taja pan sebedau iya patut mayar sebarang duit chengkeram.
![Siti agi baju-T ti dikerinduka Khadem](/wp-content/uploads/imgcache/2015/04/pImg_5bb09f3e007c8bfa2262b1fbacf66051.png)
Pengempu kompeni Majestic Masterpiece nyadika sebuah kompeni kumang menyarung Abu Dhabi Kuwait Malaysia Investment Corporation (ADKMIC), ti beopis di menua Abu Dhabi empu.
Dagang kunsi ti kelabur nya udah ngempu sher bekuasa dalam sekeda bank ti besai-besai di Malaysia, laban sida enda kala nerangka raban pengarah enggau bala orang ti megai sher ba sida.
Tang udah bekau kena tekan, Jho Low mansutka penerang ti madahka iya enggau bini iya ari wang turu Sultan Terengganu (ti udah nya nyadika pelasar penumbuh 1MDB) lalu masuk wang turu nya ti endur iya megai 10% sher, sama enggau dua iku rayat Kuwait enggau Arab Saudi, Sheikh Sabah enggau Yousef Al-Otaiba enggau ‘sekeda orang bukai’.
Ba sebengkah jaku tanya, enda lama udah nya, dalam taun 2008, madahka Jho Low madahka diri kala betanya ba pengerusi Abu Dhabi Commercial Bank (ADCB) sekali ke deka meli sekeda ari sher ti dipegai KWSP dalam RHB, ti endur ADCB endang lalu deka meli nya, dikena sida ngambi 25% sher ari dalam bank nya.
Ke bendar iya, ADCB udah bekau nya ngelepaska sher iya dalam RHB, nyual sher nya dalam bulan Jun 2011 ngagai Aabar Investments.
Menteri Besai ti mega nyadi Menteri Pekara Wang Najib Razak nyadika siku orang ti berupai bendar dalaam pengawa mindahka atur dagang nya, pia mega Khadem al-Quubaisi, ti sekali agi maya nya, ngena baju panjai burak Arab iya.
Sarawak Report udah bulih penerang ti chukup tegap dikena nyukung simpul penemu ti madahka Jho Low bisi bekaul dalam pengaawa meli RHB, ti bisi kait enggau pengawa nyual siti ari empat bagi sher dalam RHB ulih ADCB, iya nya sebuah ari anak kompeni IPIC, Aabar Investment ti dipejalaika Khadem al-Quubaisi.
![Bekunsi meli hotel pemadu besai di London, nyengkaum hotel Claridge](/wp-content/uploads/imgcache/2015/04/pImg_0cd7b894c938450df84b08e09e77be4e.jpg)
Berebak enggau nya mega, jurai bisi diatur ba bulan April 2011,Low, 1MDB enggau Aabar bisi dipeda bekunsi deka meli segempung hotel di nengeri London, Maybourne.
Selampur atur tu udah dipasukka dalam kot UK munyi ti kala direpotka Sarawak Report dulu ari tu.
Bebida enggau jaku betandu Jhp Low ti adahka diri nadai kala bekaul enggau pejalai 1MDB, akim British udah ngamatka penerang madahka kompeni iya Wynton Capital udah ngangauka rega bebilion pound ba segempung hotel, udah bisi nerima surat sukung pasal penuduk iya dalam 1MDB.
Akim British nya mega mansutka penerang ti madahka Jho Low udah nguji ngaul Aabar Investment dalam dagang nya ba tiga iti kangau rega enggau kompeni Barclay di menua UK, tang udah nya sida matak diri laban enda nyadi bedagang enggau Aabar Investments.
Dagang tu dipejalaika nyau deka sereta ba pun 2011 lebuh Aabar Investment bekaul dalam pengawa meli sher dalam bank RHB.
![Gaya siku lelaki ti tau ‘narit ati’](/wp-content/uploads/imgcache/2015/04/pImg_33c0627baaed4517179b7ff1f3bf03e9.png)
Nyentuk ke ngagai taun 2013 Jho Low agi mengkang bedagang enggau Aabar Investment.
Sarawak Report nemu pasal tu laban kompeni enggi Jho Low, Jynwell Capital nyadi penyukung lebuh Aabar nvestment meli kompeni minyak Coastal Energy ari Kanada, ti endang bisi ati deka beranakka puku dagang di menua Timur Jauh.
Nama kebuah kompeni Jynwell Capital enggau Jho Low nyukung Aabar Investment, taja pan lebuh wang turu 1MDB nya ngembuan pengeraja ti nadai betatak dikena meli kompeni baka Coastal Energy nya enda terang ditemu orang mayuh.
Tang Jho Low udah direpotka nyadi bakih dagang dalam dagang nya, nengah anak kompeni Jynwell Capital, iya nya Strategic Recources (Global) Ltd (SRG).
![Penarit ati temuai baka ti digagaka iklan Khadem, siku orang ti ngempu kelab malam Hakkasan di negeri Las Vegas](/wp-content/uploads/imgcache/2015/04/pImg_87bd9358eeaf00ac766963bc650c4d82.jpg)
SRG nya ngangkatka nama ti nyau deka sebaka enggau naa anak kompeni 1MDB ti kala diambi-alih Opis Menteri Pekara Wang, SRC.
SRC mega bisi bekaul enggau sebuah dagang kunsi enggau Aabar ba bulan Disember 2001 ti benama Aabar-SRC Strategic Recources Limited.
Pengawa kompeni, ti bisi bekaul ba atur nginjau duit ari wang turu Orang Pinchin Malaysia RM4 bilion, udah napi mayuh macham jaku tanya ti enda disaut, udah bekau akaun dipansutka ari akaun 1MDB nengah pemindah ngagai Opis Menteri Pekara Wang.
![Nama kebuah CEPSA begunaka Jho Low dalam pengawa dagang tu?](/wp-content/uploads/imgcache/2015/04/pImg_8917818d40ec879a485ec80fc2877c63.png)
Pengawa bekunsi meli kompeni Coastaal Energy nya udah ditangkup anak kompeni Aabar Investment ti beopis di menua Spanyol, iya nya CEPSA, ti udah mayar USD$2.2 bilion ke rega kompeni nya.
![Dalam taun 2010 Jho Low madahka pengeraja sida sebilik nya semina ‘jelan’ aja. Diatu udah ti nyadi semakin kaya dia ngumbai diri siku kapitalis serak ke-tiga](/wp-content/uploads/imgcache/2015/04/pImg_60bff8b5698a05a7f096a2f497b28705.jpg)
Pengerusi CEPSA, ti udah nyadi anak kompeni IPIC ba bulan Febryari 2011 nya mega seninjik bendar, Khadem al- Quubaisi.
Bedau lama tu udah Aabar Investment udah ngaga kaul enggau Jho Low ngambi ke meli kompeni pengaga kasut Reebok, baka ti udah dituliska dalam mayuh bengkah blog Perintah Malaysia ti dipelanja wang turu ari Abu Dhabi.
Munyi ti direpotka sekeda suratberita pengawa dagang, dagang nya diatur Jho Low ngena chara ti kompleks ti enddur ya semina nyadi iorang dagang ti mit, tang iya nyadi orang dagang ti besai ba wang turu ari Timur Tengah – lalu atur dagang ti baka nya udah ngujungka sida sebilik nyadi sekeda ari orang pemadu kaya di Malaysia.
![Jho Low enggau Riza Aziz enggau bakih iya Joey McFarland ari Red Granite sama mega eenggau pengarah wayang Martin Sorcese ti ngeluarka wayang Wolf Of Wall Street](/wp-content/uploads/imgcache/2015/04/pImg_504c86340ec589cc78229f24b850d969.png)
Enggau nya mar bendar Jho Low enggau bakih iya Riza Aziz ngulihka publisiti laban bala nembiak Aabar udah sama enggau sida ngasaika pengangat ke bantah ba wayang ti dikeluarka sida.
Udah bekau beberapa bulan endur nentuka sapa orang ti melanja pengawa ngeluarka wayang Wolf Of Wall Street Riza Aziz, dia Red Granite madahka wayang nya dipelanja Al-Husseiny, siku CEO pemadu kanan dalam aabar Investment ti enggi Khadem al-Quubaisi.
Tang jaku tanya ti bedau disaut diatu nya bekaul enggau baka ni Al-Husseiny ulih ngena duit gaji iya empu masuk dagang kunsi ngeluarka wayang ti berisiko tinggi nya ti enda ditemu pengelandik?
![Kerita Bugatti di menua Cannes enggi al-Quubaisi](/wp-content/uploads/imgcache/2015/04/pImg_2762c54922b1437d7d66c5fa2d66ea8b.png)
Berebak enggau nya, pemujur enggau pengaaya al-Quubaisi (pengerusi Aabar Investments) udah tesungkak enggau jampat, lebih agi kenyau ari taun 2012, ti endur pemujur nya udah nerima mayuh komen bekaul enggau Cote D’Azure di menua Peranchis – mayuh agi dagang nya ba pengawa beperindang di nengeri Las Vegas.
Al-Quubaisi suah dikumbai siku orang dagang ti mega siku pengereja pengawa perintah ti dipaduka nyadi pengurus wang turu ke perintah.
Tang mayuh agi pengawa perintah iya nya tau dikaitka enggau atur pengawa iya nyadi pengurus wang turu menua ti sebaka enggau pengawa iya dalam IPIC.
Nya alai bisi orang tentu deka nemu nama batang pengawa iya ti ngujung ke iya ulih pengaya, ambi ke banding, meli kapal layar berega mar lumur lima pemadu besai di dunya, The Topaz, enggau rega USD$400 juta?
![Kapal layar, The Topaz, ke-lima pemadu mar di dunya – dibeli dalam taun 2012 enggau rega bepuluh juta dollar](/wp-content/uploads/imgcache/2015/04/pImg_714386e4ed6d2fafe3b28e7c8912e80b.jpg)
Tauka pengawa iya meli rumah apartmen pemadu mar di nengeri New York, ba Walker Tower, ba rega USD$50 juta?
Tauka tiga buah rumah bebansa villa di Cote D’Azure?
Khadem mega rindu ngumpul kerita berega mar lalu iya bisi ngempu seraban kerita mar d=ti manggai bejuta-juta dollar semua nya.
Siti ari kerita pemadu mar iya iya nya sepasang kerita bansa Bugatti, Vyron Super Sports, nitihka penerang sekeda orang ti meratika kerita di Selatan Peranchis.
Sebuah bechura mirah jambu lalu sebuah agi bechura biru, kedua buah nya diiyas ngena lambing KAQ ti nyau deka sebaka enggau lumur plat Switzerland.
Ngatur pejalai sebuah wang turu ti tebilang di dunya tentu ulih muka ruang ti manah ke dagang diri empu, ti dipelabaka tau dikereja orang ti gawa perintah di menua Abu Dhabi.
Enggau pengeraaja sereta mega pengingin ati ti seruran deka beperindang, Khadem nyau ka sebaka enggau Jho Low – agi mega mayuh dagang dalam Aabar senutuk enggau dagang enggi Jho Low.
![Bisi tauka nadai Jho Low dikangauka?](/wp-content/uploads/imgcache/2015/04/pImg_a162e097048e395baa3d7f17d3e8d5a5.png)
Kitai tentu enda alit ati enti mayuh bala penyanyi enggau pelakun rindu beperindang enggau Jho Low.
![Bintang lagu pop Swizz Beatz enggau Alicia Keys nyadika bakih beperindang enggau Jho Low – ditu seduai iya nyuaka buah jari “Anugerah Melikat Gibrel” atas jari ti gerah (engka ketegal Jho Low udah mayuh meri champagne ngagai raban artis ti aus?)](/wp-content/uploads/imgcache/2015/04/pImg_7934fd33d030d7fd722c513c69f82d51.jpg)
Diatu Jho Low madahka iya mih ti betemuka Leonardo Di Caprio ngagai Riza Aziz lalu ari pengawa enggau kaul iya nya ngujungka nama iya diayanka ba pengujung wayang WOWS nyadika tanda terima kasih ngagai iya.
Tang rayat Malaysia mengkang nganti jaku saut baka ni kompeni Good Star tau bulih duit bejuta-juta dollar ti datai ari 1MDB, dikenaa mayar duit ti mayuh ngagai orang baka Jho Low tu?
Tu mih ti nyadika kes, lebih agi ba kaul wang turu enggi Khadem al-Quubaisi enggau 1MDB enggau dagang nengali dalam kompeni enggi Jho Low.
![Ngeluluka diri nyadi super hero](/wp-content/uploads/imgcache/2015/04/pImg_9a22a6faf522565576ef8299a7fde6c4.jpg)