![Raban bansa asal ti tekeruga ketegal pengawa ngaga tekat udah nirika empang jalai dikena ngayanka bantah sida ba pengawa perintah ti deka ngaga Tekat Baram kenyau ari bulan Oktober 2010. Tekat Baram deka ngampuhka 26 buah genturung pendiau lalu muru 20,000 orang raban bansa asal ninggalka menua asal sida.](/wp-content/uploads/imgcache/2015/05/pImg_ace733c1344bd9f6ee78632a293f5707.png)
Sehari tu bala orang ti deka beranakka puku dagang ditangkan enggau jaku madahka pengawa sida ti deka ngaga tekat besai di Sarawak mai reti sida nya nyukung penyalah makai suap, salah guna kuasa pengelantang mensia lalu mega muru bepuluh ribu iku orang bansa asal, nitihka asil pansik sebuah NGO ari menua US, Borneo Project.
Dikena sida ngelai hari ke-555 nirika empang jalai dikena mantah tekat Baram, Borneo Project ti bepalan di California udah ngeluarka sebuah filem dokumentari ti ngayanka baka ni projek-projek tekat besai tau mai empas ti jai ngagai raban bansa asal di menua Sarawak.
Filem ti ngena nama “Commerce o Corruption: The Economics of Mega-Dams”, mantai jaku randau enggau bala pakar tekat, pemansik, raban NGO enggau bala orang asal ti ngasaika empas projek nya.
Lalu filem nya mega ngayanka penusah bekaul enggau pengawa beranakka puku ba pengawa ngaga tekat besai di menua Sarawak.
Filem nya mega bisi mantaika pemilih ba chara ngeluarka kuasa karan ti manah agi ke rampa menua enggau mega manah agi ngagai raban bansa asal.
Ba penerang media sehari tu, Jettie Word, siku Pengarah dalam Borneo Project betanyaka kebuah orang rindu begagaka tekat ti besai-besai.
![Pakar ari Universiti Oxford Dr Atif Ansar madahka tekat ti besai-besai tau nyadi perusak ekonomi ke sebuah menua](/wp-content/uploads/imgcache/2015/05/pImg_c83a02afbf0f4d44740fc64e2a64f181.png)
Dalam bulan Mac 2014, Universiti Oxford udah mansutka sebengkah repot bekaul enggau cherita mitos ti madahka kuasa karan hidro nya nyadika pun kuasa karan ti moden lalu manah ke ekonomi menua.
Dalam jaku randau enggau Borneo Project nya Dr Atif Ansar bisi mansutka penemu iya ba repot ari Universiti Oxford.
Asil peresa nya bebida enggau jaku ari Kepala Menteri Sarawak Adenan Satem lebuh iya nemuai ke London ba pun minggu tu tadi, madahka kuasa karan hidro nya jauh lebih “murah sereta beresi” – siti label pengawa ngelakuka barang ti seruran disempulangka enggau barang ti disadung industri nya empu.
Dr. Edward Miguel ari Universiti Oxford mega biis mansutka jaku tangkan ngagai bala orang ti beranakka puku, enti sida nyukung projek ngaga tekat nyadika pengawa dagang ti bepenanggul.
![Menua Sarawak diatu duduk ba nanga jalai, milih entara pengawa industri ti meruan, ngena kuasa hidro ti besai tauka milih pengawa pemansang ti meruan ngena sistem kuasa karan ti bepusat ba siti palan sereta mayuh pemilih, ku Borneo Project](/wp-content/uploads/imgcache/2015/05/pImg_792a9e47c3c228ebfb972d107c7dc8b9.png)
Baka ti endang ditemu bala pemacha laman blog tu, penyalah makai suap enggau salah guna kuasa di menua Malaysia endang pekara ti segulai sejalai.
Dalam taun 2013 menua Malaysia udah diengkahka sama enggau menua China nyadika menua ti balat korup di dunya nitihka repot ti dipansutka Timpai Penyalah Makai Suap ba pelilih menua Asia Pasifik.
Pengarah ke gerempung NGO Bruno Manser Fund ari menua Switzerland, Dr Lukas Straumann madahka bala orang dagang ti deka beranakka puku enda ngasaika pemar meda utai ti benung dikereja di Sarawak.
Raban bansa kenyah, Kayan enggau Penan udah nirika empang jalai dikena sida mantah langgur ngaga tekat besai Baram dalam pengelama 555 hari ba sehari tu. Taja pan bantah nya enda ngetu-ngetu, tang perintah Sarawak pan majakka pemingking sida deka neruska projek ngaga Tekat Baram nya.
Dr. Andrew Aeria ari Universiti Malaysia Sarawak (UNIMAS) madahka enti rampa menua dirusak lalu bepuluh ribu iku orang bansa asal dipindahka, nya mih siti chara ngemansangka kandang menua nya.
![Nya alai, nama pemilih ti bisi? Bala pakar tekat madahka projek kuasa karan hidro ti mit-mit udah mujur digaga ba sekeda endur di menua Sarawak nya](/wp-content/uploads/imgcache/2015/05/pImg_70c1a0fc3c991ae72c9f0975293e3fda.png)
Nya alai, nama pemilih kuasa karan ti agi bisi ke rebak dudi di menua Sarawak?
Rebekah Shirley ari makmal Renewable & Appropriate Energy di Universiti Berkeley madahka beberapa pun kuasa karan nyengkaum tekat kuasa karan hidro ti mit-mit, kuasa solar tauka sistem biomass beskala mit, semua nya bisi penanggul ti mimit, lebih begunaka pengereja pengawa, ngurangka pengeluar emisyen lalu ulih meri untung ti tinggi ba puku ti diperanakka.
Jettie Word madahka Sarawak Report nya:
“Filem tu tau nyadika perengka dikena ngiring rayat Malaysia enggau orang di serata dunya meretika pengamat utai bekaul enggau tekat ti besai-besai – semua nya mai pengerusak, enda dipeguna lalu balat dibalut penyalah makai suap.”
Broken Promises, sebuah filem ti benung ditembuka dalam siri tu deka dikeluarka dalam bulan Jun lalu deka ngayanka empas ti jai ti muru raban bansa asal ninggalka menua asal sida. Kita tau meda dokumentari DITU. Penerang ti silik agi pasal pengawa Borneo Project tu tau dipeda ba www.borneoproject.org.