![CEO ke wang turu 1MDB, Arul kanda, udah dinamaka dalam pansik atas sekeda surat penerang ti dianjung iya nyadika surat penrang ti pelesu ngarika 1MDB. Tang iya datai ba bulan Januari semina tetemuka komputer enggau rekod dia udah diperesi magang-magang – sapa ti meri ngagai iya semua utai ti udah dipelesuka?](/wp-content/uploads/imgcache/2015/04/pImg_d893253e6fc26dc88be16c54ea12ef5a.jpg)
Bala pemansik skandal penanggul 1MDB enggau PetroSaudi International (PSI) udah ngaga simpul madahka dagang kunsi nya udah ngemulaka semua bank ti bisi bekaul, nyengkaum Bank Negara Malaysia ti endur sida ngambu kompeni Good Star Limited nya anak kompeni 100% enggi sida.
Good Star nya kompeni di luar dagang kunsi nya, ti dikuasa Jho Low, ti bakih Menteri Besai Malaysia, Najib Razak.
Penyalah dib aka nya tau ngujungka orang ti salah nya kena tinggang ukum ketegal nipu.
Ba endur ti bukai bala pemansik nyimpulka asil pansik sida madahka pemindah USD$700 juta ti, kenu ku sida, dikena ‘mayar pulai duit injau’ ngagai 1MDB PSI ‘tau ditekanka salah.
Keretas asil pansik ti bisi dipekunsika enggau Sarawak Report nunjukka bala pemansik udah mujur tetemuka enda kurang ari tiga bengkah endur penyalah nya dikereja, lalu tau ditinggang ukum ti setipak.
Simpul pansik nya bisi nemu duit ti mayuh ti udah dipindahka ngagai dagang kunsi nya enda dikena nitihka tuju iya dalam atur FEA enti 1MDB PSI madahka duit nya dipindah ari akaun Good Star ngagai dagang kunsi nya.
Penerang dalam surat ti dikirumka ngagai Sarawak Report nya nunjukka USD$500 juta udah dipindahka ari kompeni Good Star ngagai sebuah akaun bank Switzerland, BSI Singapura, enggi Jho Low.
Sehari tu pansut siti berita madahka Jho Low udah mujur meli dua buah rumah penthouse di pulau Singapura ba rega RM154 juta, ti nyadika entara beberapa iti utai dibeli iya ti tau nyadi peragam orang mayuh bekaul enggau skandal 1MDB tu.
Bala pemansik udah mujur bulih penerang ti madahka USD$260 juta ari duit injau USD$500 juta nya ti patut dipasukka ngagai akaun dagang kunsi nya, udah dikena meli lalu ngambi alih bank UBG ari sida Taib Mahmud sebilik.
![Cawangan bank RBS Coutts di Zurich sedang diperiksa – mengapa mereka tidak melaporkan transaksi Good Star yang meragukan dan memeriksa pemilik akaunnya?](/wp-content/uploads/imgcache/2015/04/pImg_14c6d8b8e45deda51dd6d770c26f1eb5.jpeg)
Lebuh bala pemansik ngelepaska bank ti bisi bekaul dalam pemindah duit nya, sida udah kena tipu raban pengurus 1MDB, sida udah puntan ngeripotka pemindah duit ti nyelai.
Bank-bank nya udah mindahka duit ti mayuh bendar enggau chara ti nyelai, ti patut diripotka ngagai raban penerit undang-undang ti bisi kaul.
Pansik ba pemindah duit 1MDB ti penudi ba penyampau $330 juta dalam empat renggat ngagai akaun Good Star dalam taun 2011, sida nemu dua buah bank ngereja penyalah laban enda ngeripotka pemindah duit nya, ti mega nyengkaum $110 juta enggau $125 juta nyadika pemindah duit ti nyelai.
Raban pengemata pekara wang di Malaysia udah mutuska, lebuh pansik benung dipejalaika, sida deka betemu enggau raban pengamata pekara wang di Switzerland dikena sida nentuka duit nya amat dipasukka dalam akaun Good Star dalam bank RBS Coutts di Zurich.
Sida mega deka nentuka orang ti bempu akaun nya amat-amat Jho Low.
Enti nya amat, reti nya bank RBS Coutts di Britain mega sama-sama tau ditekanka salah laban enda mujur ngeripotka pemindah duit udah sida nyambut $700 juta; $160 juta enggau $330 juta entara taun 2009-2011 ngagai akaun ti nadai bekaul enggau pengawa dagang 1MDB.
![Pampang bank BSI Switzerland ti napi mayuh jaku tanya](/wp-content/uploads/imgcache/2015/04/pImg_e54eee904afbe1ff368af9a2c7113a27.jpeg)
Surat-surat penerang nya bisi ditemu pelesu dikeluarka ari opis 1MDB.
Ba minggu nyin kemari Sarawak Report bisi mantaika pasal raban penerit undang-undang Singapura ti udah ngeripotka surat bank ti dianjung 1MDB dikena sida nyukung penerang pasal wang turu nya dalam BSI, pelesu, nitihka penerang ari bank nya.
Raban ari bank nya udah nulak surat penerang nya, ti dikirumka CEO 1MDB Arul Kanda ti endur iya madahka pasal isi akaun Brazen Sky Limites, iya nya ngundan USD$1.103 juta munyi ti diambu Menteri Besai Malaysia / Menteri Pekara Wang Malaysia Najib, nya duit ti dikumbai udah lenyau.
Diatu raban pemansik Malaysia udah nuduh 1MDB melesuka surat penerang sereta ngemulaka Bank Negara Malaysia ti madahka sekeda ari duit injau udah dipasukka dalam dagang kunsi nya.
Duit ti disebut nya, USD$330 juta ti dibayar ngagai Good Star, dikeluluka dikena nyali duit ngagai PSI lalu terang bendar 1MDB udah ngenataika surat ti pelesu baka ti patut dikirumka ngagai BNM ngagai bank ti nyali duit.
Ke bendar, BNM nadai udah ngeluarka surat ti baka nya bekaul enggau pekara nya, lalu nya ngujungka bank udah kena kemulaka.
![Semina “tuduh petenah” ku PM. Tang nama kebuah 1MDB mengkang enggai mansutka komen bekaul enggau penerang ti dikirumka sida datai ke diatu?](/wp-content/uploads/imgcache/2015/04/pImg_e49c93c38c2b2c711b50a4b275135208.jpg)
Surat-surat ti dikirumka bala pemansik nya ngansak Menteri Pekara Wang Malaysia betemu enggau raban pemesai pekara wang di Switzerland dikena nentuka Good Star nya bisi nerima sepenyampau duit ari wang turu lalu ngamatka Jho Low nya endang amat waris ke kompeni nya.
Bala pemansik ngarapka bank-bank ti bisi bekaul enggau pekara tu patut dipansik silik-silik ke pemuntan sida mantaika repot pemindah duit ti nyelai nya.
Tang, enggau asil pansik sereta jaku ansak raban penerit undang-undang di Malaysia enggau di Singpaura nya, Menteri Pekara Wang ti mega Menteri Besai mengkang bebulaka penerang bekaul enggau penyelai pengawa dalam 1MDB.
Sekali ke iya deka ngeluarka surat-surat penerang tu lalu ngemendarka tuduh ditinggangka atas orang ti ditemu salah ulih raban pemansik ari menua Malaysia nya empu?
[Penerang: Bala pengarang berita bisi kuasa ngelindung orang ti meri penerang ngagai sida, pia mega ke orang ti nuliska repot tu enggau sapa-sapa orang ti udah mantiska repot ngagai Sarawak Report. 1MDB enggau raban bukai ti bisi bekaul ti udah nerima penerang tu, bisi kuasa ngeluarka penerang sida tauka bebulaka penerang tu – tauka enchabar kami dalam kot. Bala pemacha bisi kuasa macha lalu sepeneka ati sida ngaga simpul penemu ba sebarang penerang ti dibacha sida ditu.]