Sarawak Report diatu ulih mantaika penerang beguna bekaul enggau empas ari penanggul pekara wang menua ti majak tekeruga.
Sebengkah atur udah dikeluarka Jaabatan Sumber manusia Perjawatan Awam madahka sida patut ngetu ngambi pengereja pengawa perintah ti baru.
Empas ari atur nya deka balat agi ngenasalka pengarap beribu iku orang ti benung ngiga pengawa ba opis-opis perintah di serata menua tu.
Atur ti besak tu bedau digaga ke jaku gerah ari perintah ti benung ditating utang bekaul enggau 1MDB, ti diatu benung ba tikas ti kelalu balat, iya nya ba penyampau RM42,000,000,000.
Tang, diatu Sarawak Report bisi udah nerima sepuchuk surat perintah ti nerang dalam Bahasa Malaysia ti dikeluarka Pengarah JPA Mohamad Zabidi Zainal.
Surat perintah nya udah dipejalai nyadika tesau ba semua tuai0tuai opis perintah ba tengah-tengah asai ati ti irau lalu pia mega ke empas ba pengeregas pengawa perintah.
Enggau atur ti mungkur semua macham opis perintah, Sarawak Report minta perintah Malaysia bependiau tampak agi sereta tebuka pasal atur tu lalu nerangka ni pemalat penanggul dalam pengawa perintah nya?
Sekali ke atur tu nyengkaum nukar pengereja pengawa dalam opis tauka atur tu nyadika atur dikena bekelimat?
Atur tu udah ditesau besenutuk enggau pengerugi besai ti udah diasaika perintah ketegal napi empas ari penanggul dalam wang turu 1MDB, lalu beduduk ba pemayuh duit dalam wang turu nya ti udah dipasukka ngagai akaun orang siku-siku baka Jho Low dikena iya meli bank UBG ari sida Taib Mahmud sebilik.
Atur tu mega dipejalaika udah bekau pengerami melah pinang anak indu Menteri Besai ti direpotka enggau silik nengah mayuh bengkah media di serata Malaysia.
Bala orang ti bejalai bebala mayuh kena 1hb Mei, dikena ngayanka bantah sida pasal pekara tu enggau atur chukai GST ti baru, ti disadang deka ngenusahka pengidup bala rayat Malaysia ti kurang bepenatai pemisi enggau sida ti seranta.
Pengerembai berita-berita ti baka tu ukai semina nekan raban pengereja pengawa perintah, munyi ti ditusui pemeri penerang ari dalam.
Sarawak Report mega bisi dipadahka bala pengereja pengawa ti tinggi agi pangkat enggau penuduk nyaga penerang ti patut dipelalaika sida diasuh nyain semaya “Aku Jani” (Akta Rahsia Rasmi), ukai sekali aja, tang ninting taun lalu mega penambah leka jaku dalam klausa ti baru, ti ngelanjarka timpuh nyimpan resia nya nyentuk ke udah sida pinchin ila.
Nama bansa pekara ti kelalu resia dipelalaika lalu sekali ke resia nya nyengkaum penerang baru ti madahka perintah diatu nyau ngetu ngambi pengereja pengawa ti baru?
Enti ya, sekali ke tu nyadika siti kelai ti endur perintah deka ngelalaika penanggul ba pekara belanja menua sekumbang rayat udah angkat ringat ke sistem chukai GST ti baru nya, lalu mega enggau cherita pasal pengelemi pendiau bala tuai-tuai perintah menua?