![Sekali ke Khadem ari kompeni Aabar nyadika pemeri resia nuan, Najib?](/wp-content/uploads/imgcache/2015/08/pImg_1c793efd1b8a97bd82b7f7e7908f7ef6.png)
Bisi tiga elemen ti besai bendar reti ti bisi kaul enggau pansik ke diatu ba 1MDB.
Tu pasal pengelenyau US$1.3 billion ti disintak pansut ari dagangkunsi PetroSaudi lalu dipasukka ngagai akaun kompeni-kompeni proksi Menteri Besai enggi Jho Low; pasal pengelenyau RM4 billion ti diinjau ari wang turu orang pinchin Malaysia ulih anak kompeni 1MDB, iya nya SRC International enggau pengelenyau duit ti udah dikena ba mayuh bengkah pengawa pemansang enggau atur meli stesen kuasa karan ngena wang turu Abu Dhaabi – suba nya betuaika Khadem Al-Qubaisi, ti diatu udah dibuai ari pengawa iya dalam kompeni nya.
Sepenyampau RM27 juta (ari semua penyampau RM42 juta) ti udah ditemu datai ari SRC International lalu dipasukka ngagai akaun enggi Menteri Besai Najib Razak dalam bulan Disember, ti udah nyadika kebuah keretas dawa ti udah dideraf Kepala Lawyer Bansa ti udah diketuka ari pengawa, Abdul Gani Patail, sebedau iya dibuai ari pengawa iya enggau enda mukai-mukai ba minggu nyin kemari.
Komiti Tindak Parlimen (PAC) udah nguji betanya ba semua orang ti bisi bekaul dalam dagangkunsi PetroSaudi, nyengkaum Jho Low enggau Kepala Eksekutif 1MDB ke dulu suba, Shahrol Halmi, sebedau peresa enggau pansik sida diketuka enggau enda mukai-mukai ari asuh Speaker.
Nyerumba nya, tindak udah diambi kena hari Tiga nyin kemari dikena nguji meri penerang pasal US$680 juta ti udah dipasukka ngagai akaun AmBank enggi Menteri Besai kejang deka Bepilihbesai 2013 – sebengkah pekara ti mega udah dibantaika ulih inkuiri ba atas 1MDB ti kala dipansutka dalam portal Wall Street Journal enggau Sarawak Report.
Sebuah penerang ari pengari opis SPRM ti enda disebut nama, ti madahka bala pemansik udah mujur ‘meresi’ nama Menteri Besai bekaul enggau pekara tu, laban agensi nyaulih ngamatka duit nya “pemeri” ari ‘sebuah penatai ti enda diayanka’ ari menua Timur Tengah lalu nadai kaul terus enggau 1MDB.
Penerang tu ngenyitka aati orang mayuh, laban penerang nya dipansutka semina beberapa jam udah raban SPRM madahka isu RM680 juta nya ukai datai ari bidangkuasa inkuiri sida empu.
Bisi empat raban pemansik enggau penerit undang-undang ti benung meresa sereta mansik pengelenyau bebillion-billion dollar ari 1MDB lalu raban SPRM nerangka bala pemesai sida semina mansik pasal pemindah duit ti bekaul enggau SRC International aja.
![Sekeda ari pemesai SPRM ti udah ditangkap lalu ditanya bekaul enggau “penyalah niriska” penerang ti udah dipansutka dalam Sarawak Report – dokumen ti dikumbai “pelesu”, nyengkaum keretas dawa dikena ngelaban Menteri Besai](/wp-content/uploads/imgcache/2015/08/pImg_de5d82cebdec6ca50911bfe50a197a13.jpg)
Nadai penerang ti silik diberika pasal pun penatai “pemeri” tauka sapa orang ti meri nya – nyungkak mayuh agi jaku tanya dalam runding rayat Malaysia. Kebuah pia laban Najib udah nerangka duit nya “ukai ke guna iya empu” lalu madahka iya melanja duit nya ke guna parti enggau pengawa bepilihbesai.
Siku penulis artikel pasal pekara wang ti tebilang di Malaysia, Ganesh Sahathevan, sehari tu udah ngenataika teori iya pasal ‘pemeri’ ti nyelai tu. Iya madahka ‘pemeri’ ti nyelai pun penatai nya sebengkah “bayar”.
Kebuah munyi nya, ku iya, leka jaku enggau ayat ti engkeman patut dikena dalam tetiap iti pemindah duit meraka garis menua ti nyadika atur bejaga-jaga ari pengawa orang ti melanja pengawa soldadu penyelawai ba siti-siti menua.
![Pemindah ke terubah ari bank Falcon (enggi Aabar ti masuk ke dalam akaun Najib kena 21hb Mach 2013) munyi ti diterangka nyadika “BAYAR ke sebagi”.](/wp-content/uploads/imgcache/2015/08/pImg_d4f41c80f923dec6d01b4984366cf4f4.jpg)
Baka ti udah diterangka Sahathevan dalam artikel bepansik iya:
![Enti penatai duit nya nyadika “bayar”, nama barang tauka pengawa ti udah disediaka Najib?](/wp-content/uploads/imgcache/2015/08/pImg_aca588e8e4e3eda5d1f4c48bcbc665cb.jpg)
Dalih Menteri Besai nya mar bendar dikarapka nama kebuah iya mengkang enda ngayanka sapa pemeri resia iya nya.
![Sarawak Report kala mantaika pasal ulah playboy Khadem](/wp-content/uploads/imgcache/2015/08/pImg_b04f585066b7e6b8c8cdb1e8206049ab.png)
Rayat Malaysia deka nemu pasal pemeri ti mayuh bendar rega nya ti kenu ku Najib datai ari Timur Tengah lalu Najib patut madahka orang ti meri nya nadai bekaul enggau wang turu Abu Dhabi tauka Khadem ti udah dibuai ari pengawa iya ti nyadi pengerusi.
Kebuah pia laban Khadem kala dikaitka enggau Aabar bekaul enggau bon berega US$6.5 billion ti diangkatka 1MDB dalam beberapa siri pengawa meli palan pengeluar kuasa enggau dagangkunsi ti udah nya ngujungka Abu Dhabi nadai ngeluarka sesen ke dagangkunsi nya.
Duit ba penyampau ti mayuh bendar nya udah pansut ari 1MDB dikena nebus sekeda aset ti diberika ngagai Aabar enggau nadai ketegal enggau kebuah ti meruan.
![Jho Low digambar benung beperindang enggau bala bakih iya nyengkaum Paris Hilton](/wp-content/uploads/imgcache/2015/08/pImg_8fb4363de2114af67329ff70c069f877.jpg)
Nyerumba nya Aabar mega bisi bekaul dalam pengawa dagang puku enggau bakih Najib dalam 1MDB, ti benama Jho Low.
Tu nyengkaum pengawa nguji nebus raban hotel Claridge di London dalam taun 2011 enggau pengawa meli Coastal Energy ba regaa US$2.3 billion dalam taun 2014.
![Rita Ora mai lagu Selamat Harijadi ti diubah iya di Las Vegas dikena ngerami hari pengada orang ti ngempu kelab malam Haakasan, Khadem Al-Qubaisi](/wp-content/uploads/imgcache/2015/08/pImg_2bc8d4c0775d3465ed82cffd86d2c826.png)
Sarawak Report kala mantaika pasal kompeni Good Star enggi Jho Low ti udah nyintak pansut sher sida (US$1.3 billion) ti diterima ari 1MDB ngagai sebengkah atur dagang ke terubah enggau PetroSaudi, ti udah nyimpan US$20 juta ke dalam akaun di Luxembourg enggi Khadem dalam taun 2012.
Kami deka nemu sekali ke bayar US$20 juta tu bisi kaul enggau dagang enggau Jho Low tauka 1MDB?
![Bakih Khadem ti mega orang ti rindu beperindang nyadika orang ti melanja ai irup ba pengerami nya](/wp-content/uploads/imgcache/2015/08/pImg_bd3cc4d9bf1e3512ae9b44e992be24c1.png)
Lalu ari atur pengawa ti enda manah ba wang turu tu, tauka pengerusi iya mantaika sebarang pekara ti enda patut bebalut enggau pengawa ari ti mayar Najib US$680 juta, ulih enda kini Menteri Besai ngenyelapka pengirau ati orang mayuh lalu bebulaka penerang madahka Aabar enggau Khadem nya bisi kaul enggau duit pemeri ti nyelai penatai nya?
![Bala orang ti datai beperindang ba kelab malam Haakasan bekelingi ba Khadem enggau Jho Low](/wp-content/uploads/imgcache/2015/08/pImg_8481d21e5fad56d38bd598d029285e1a.png)
Baka ti udah diterangka Sarawak Report enggau silik, duit nya datai dua hari udah bank Goldman Sachs nembuka pengawa ngeluarka bon US$3 juta ngarika 1MDB kena 19hb Mach 2013 nyin kemari.
Atur ngeluarka bon tu dikereja 1MDB udah bekau sempekat dagang kunsi ditanggam enggau beguai-guai enggau Aabar kena 12hb Mach, ti endur raban pengarang berita nuliska repot sida ti endur sempekat beranakka puku 50:50 dikena ngemansangka ‘zon pekara wang’ Tun Razak Exchange (TRX) di nengeri KL.
Zon kandang menua agi mengkang tawas lalu taja pan udah dibuka enggau chara ngayanka Khadem enggau sapit iya, Mohammed Badawy Al-Husseiny, tang kompeni Aabar mengkang nadai ngeluarka bagi enggi sida.
![Begambar dikena ngelakuka pengawa dagang RM18 billion tiga minggu sebedai parlimen dipadamka, PM Malaysia Najib Razak, CEO 1MDB (Shahrol Halmi), Pengerusi 1MDB (Lodin Wok Kamarrudin), Pengerusi bank Falcon enggau CEO kompeni Aabar (Mohamed badawy Al-Husseiny) enggau mega Pengerusi kompeni Aabar (Khadem) ti dikaitka enggau pengawa dagang enggau 1MDB sereta mega enggau bakih dagang Najib, iya nya Taek Jho Low.](/wp-content/uploads/imgcache/2015/08/pImg_9baa14ab1e72b863b6d975f7ea6a5929.jpg)
Goldman Sachs nya nyadika sebuah bank pengeluar bon enggau atur ti besak, ti udah ngambi bayar pengawa ti kelalu besai.
![Bos GSI Malaysia ti chukup begaya lawa, Tim Leissner enggau bini iya ti mega siku model ti tebilang Kimora Lee Simmonds begambar enggau Menteri Besai Najib, enggau bini iya Rosmah Mansor, ti bekelala nengah Facebook](/wp-content/uploads/imgcache/2015/08/pImg_bf953e1634b37490ebbcc3304ab9d8e7.png)
Lebuh ditanya nama kebuah bayar pengawa nya kelalu besai ke dagangkunsi nya dia GSI madahka klien sida deka ke pengawa dagang nya ditembuka enggau naka penyampat lalu bank pan deka napi risiko tinggi ngambi duit jali ti berat nya sebedau sida ngiga bala orang ti beranakka puku sida.
Nama kebuah Najib kelalu besak ti endur iya enda ibuhka simpul penemu ti madahka dagangkunsi nya udah beguai-guai ditanggam kena 12hb Mach; 1MDB udah beguai-guai ngangkatka US$3 billion ke dagangkunsi nya kena 19hb Mach lalu udah nya ngemasukka US$680 juta ngagai akaun Menteri Besai ke ‘guna bepilihbesai’ kena 19hb enggau 21hb Mach enda bekai entara siti enggau siti?
Enggau dalih Menteri Besai ti madahka duit nya “ukai ke guna iya empu” lalu iya madahka duit nya udah dikena melanja BN maya bepilihbesai (taja pan udah ngelui ari penyampau ti dikemendarka undang-undang) mayuh orang mantaika jaku tanya madahka iya madamka parlimen lalu udah nya mansutka jaku gerah madahka pengawa ngundi diatur enam hari udah nya kena 3hb April.
![Mayuh jaku serebaana orang diterima pasal projek ti laun belabuh taja pan berega bejuta-juta ringgit. Tang kompeni Aabar lalu bedau mansutka puku sida sesen dalam projek tu.](/wp-content/uploads/imgcache/2015/08/pImg_0d5232f0a2977b68f452024ae213f2bc.jpg)
Baka ti udah ditunjukka Sarawak Report enggau Wall Street Journal lebuh sida mantaika pasal penatai duit ‘pemeri’ resia kejang pengawa bepilihbesai, duit ti datai nya datai ari akaun kompeni BVI ba bank Falcon di Singapura.
Duit ti udah dipindahka dalam dua kali bayar nya ngena mata duit dollar nengah bank Wells Fargo di menua Amerika Syarikat ke dalam akaun Najib ba AmPrivate di KL.
Kompeni Aabar nya bempu bank Falcon.
Pengerusi asal bank Falcon, lebuh sida baru dibai Aabar ba taun 2009 suba nya Khadem Al-Qubaisi sempu. Lalu lebuh pemindah duit jali dikereja dalam taun 2013, penuduk pengerusi iya diganti sapit iya ti mega nyadika pengintu reta kompeni, Mohamed Badawy Al-Husseiny.
![Sapit ke Khadem nya Mohamed Badawy Al-Husseiny](/wp-content/uploads/imgcache/2015/08/pImg_380e72677aeb2230944a85b569ac6a4b.jpg)
Enggau nya kitai sekali agi diterangka kaul enggau Aabar enggau siti dalih dikena ngansak Menteri Besai bebulaka penerang ti madahka bakih dagang ari menua Abu Dhabi, ti udah masuk dagang kunsi 1MDB nya kaul ti terus ba “pemeri” resia ti diterima iya ke dalam akaun iya nya.
![Riza Aziz ti anak dulu Rosmah lalu nyadika bakih dagang dalam Red Granite ba pengujung iya ngaku madahka CEO Aabar udah melanja wayan ti digaga iya](/wp-content/uploads/imgcache/2015/08/pImg_4674ad01c319765a986ae433490cd280.jpg)
Bala pemacha blog kami tu diingatka enggau penerang ti madahka Khadem enggau sapit iya udah ditemu nyadika penebus Najib ngena duit puku dagang ti mayuh bendar.
Kali ke terubah nya lebuh Menteri Besai enggau anak tiri iya Riza Aziz nguji nutup penerang ti ngelingi pengawa melanja ngaga wayang di Hollywood dikeluarka Riza enggau bala bakih iya di kompeni Red Granite ba penyampau US$100 juta ke wayang Wolf Of Wall Street.
Udah ba pengalama bebulan-bulan ti enggai mansutka sapa orang ti melanja projek sida (kelimpah ari bakih iya, Jho Low), ke pengujung iya Red Granite lalu madahka duit belanja ngaga wayang nya datai ari Mohamed Badawy Al-Husseiny, iya nya sapit Khadem Al-Qubaisy dalam Aabar, ti udah mansutka duit US$100 juta ari kandi baju iya empu.
Berebak enggau nya, beberapa bula ke udah kitai meratika Aabar ti udah masuk-champur enggau berupai dikena sida nyelamatka Najib ti nyadi Menteri Pekara Wang ti mega pemegai sher enggau siku orang ti ngaga pemutus penemu dalam 1MDB.
Ba bulan Enam tu kemari, wang turu nya udah puntan mayar pulai US$1 billion ti udah diinjau sida lalu bank-bank entarabansa udah madahka diri deka ngetuka operasyen sida, lalu menua Malaysia disadang napi pengusut nyawa mata duit enti sema 1MDB nya puntan sereta rusak terus.
Kabinet mega enggai mendingka serebana Najib ti mega nyadi Menteri Pekara Wang ti minta bantu mayar utang wang turu nya.
![Khadem udah dibuai ari pengawa Pengerusi iya di Aabar Investments, tang sapit iya agi mengkang enggau kompeni nya](/wp-content/uploads/imgcache/2015/08/pImg_c45769dfb5b58ec43fa76afe79282639.png)
Sekali agi Aabar, ba jam ti ke penudi, tepejal mayar utang nya.
Nitihka siti sempekat ti udah nya dipansutka ba Bursa Tukar London, madahka Aabar besetuju mayar utang 1MDB ba pengelama 12 bulan ke “aset-aset” ti nadai ditemu nama ba utang nya.
![Engka nuan patut nyaut sekeda jaku tanya, Menteri Besai?](/wp-content/uploads/imgcache/2015/08/pImg_0db5236845d368701b14622720f7c24b.png)
Taja enda tau enda napi jaku tanya ari pengari orang mayuh, Najib mengkanng enggai nyebut nama bansa aset-aset ti udah disemayaka ngagai wang turu Abu Dhabi nya.
Nya kebuah Najib patut besemaya enggau rayat Malaysia madahka duit nya udah dipasukka ngagai akaun iya nya nadai bekaul enggau 1MDB enggau Aabar, taja pan duit nya datai ari bank Falcon ti enggi Aabar dua hari udah sempekat dagang ditanggam enggau Aabar ti udah ngangkatka bon ba rega US$3 billion, ti disukung ngena surat ari Parintah Malaysia.