Sehari tu, hari Dua, Menteri Besai Britain, David Cameron bisi ngulu sebengkah aum di Singapura, ti balat bendar ngutuk penyalah makai suap.

Cameron udah ngeluarka isu nya dikena munaskan penyalah makai suap serata dunya nyadika pelasar iya ti nyadi tuai perintah dunya. Iya bisi kuasa ngereja nya, nya alai iya patut nginsil perambu penemuai iya ke menua Malaysia.

Kami di Sarawak Report besetuju enggau Cameron ti madahka penyalah makai suap nya deka ngeruga penegraja asal dalam tanah ba dunya rebak ke diatu lalu penyalah nya jampat bendar ngerembai lalu enda ulih tagang.

Penyalah makai suap berengkah ari tikas atas dalam perintah lalu ngelekai ngagai tikas ti barus agi dalam raban bansa, ti ngujungka penyalah nya enda ulih tagang sebedau iya mai pengerusak ba undang-undang enggau pengelantang ke raban bansa.

Udah nya penyalah nya deka ngelekai ngagai endur bukai.

Menua Malaysia, ambi ke banding, udah nyadika tumpu perati dunya ba penyalah makai suap industri kayu batang, enggau kompeni kayu batang ari Sarawak ti nanggam sempekat ngerusak kampung nengah ulah sida ti begigaka sebarang perintah menua ti ulih sapi sida ngambika kampung sida ulih ditebang.

Ba jaku iya di Singapura sehari tu, Cameron deka nunjukka baka ni penanggul ari penyalah makai suap udah ngemuntanka pengidup orang di London empu, ti endur penyalah ngubah duit ari serata dunya udah tama ngagai menua London nya, ti ngujungka rega reta baka rumah niki enggau jampat lalu enggau enda disadang udah ngujungka pemar dalam pengidup orang di menua nya empu.

Sarawak Report udah suah bendar madahka pasal penanggul tu lalu mega pasal sebuah kompeni pengawa pemansang reta pemadu besai di London nya datai ari menua Malaysia.

Kami deka betanya, baka ni menua ti mit baka Malaysia ti ngembuan pengeraja ti jelan pemesai tau ulih bedagang di menua London, ti udah nya dientudika menua Singapura?

Dalam 2013, Malaysia enggau Singapura nyadi dua bengkah menua ti pemadu besai beranakka puku dagang ba reta di London, bebelanja lebih ari orang UK empu. Kami deka nemu sekali ke pendiau nya bisi kaul enggau pemansut duit suap ti berebak enggau bepilihbesai ke-13.

Lalu, David Cameron udah dipeda gaga bendar ati ti endur, ba taun tu, Palan Pengeluar Kuasa Battersea, ti udah dibeli lalu dikemansangka kompeni Sime-Darby enggi perintah Malaysia, ti nyadika kompeni bekereja chara apek bayat berusakka rampa menua di Sarawak ketegal ngulihka kayu batang, lalu udah nya muka kebun dandang besai sawit.

Sime-Darby diatu udah ngerembaika pengawa sida ngagai rampa kampung di Afrika lalu udah kena kutuk ari mayuh bengkah menua dia ketegal keruga ti sama.

Cameron empu lebih ari bekuasa netapka diri ngelaban penyalah makai suap, tang iya patut bejimat awakka enda kena panjuk ngembuah penemu ti bechiping.

Maya penemuai Cameron ngagai menua-menua di pelilih Asia Tenggara ti nyengkaum Malaysia ti diperambu iya ba pun bulan tu, Sarawak Report udah nulis surat ngagai Opis Menteri Luar UK enggau Opis Duta UK di Kuala Lumpur ngambika tau nangkan Cameron pasal penanggul nya.

Kami udah nunjukka ngagai iya madahka Malaysia diatu benung bebalut dala krisis politik ti endur pengarap orang ba siku tuai ti bekuasa, Menteri Besai Malaysia, benung dituntung jaku tanya.

Kami nunjukka Cameron nya Najib nyau enda ulih nyaut semua jaku tanya ti mudah-mudah pasal pengelenyau bebillion-billion dollar ari wang turu pemansang menua, 1MDB, ti endur iya empu nyadi pengerusi dia lalu iya empu mega enda ulih nyaut tanya nama kebuah USD$700 juta ari duit 1MDB udah mujur ditemu dipasukka ngagai akaun iya empu.

Sarawak Report nerangka dalam surat nya, penemuai iya ngagai menua Najib, sekumbang penanggul nya bedau jenuh deka ngujungka penemu orang madahka menteri besai ti benung dibalut penyalah nya mengkang bulih sukung entarabansa ari sebuah menua barat ti mentas, ti mega ngembuan kaul ba sejarah enggauu gaya idup.

Iya enda patut ngereja nya lebuh maya agi benung genting tu, lebuh maya sida ti enda bepenyalah dalam perintah Malaysia enggau institusyen ti nguji mutarka penanggul ti kelalu besai tu ba tikas ti tinggi.

Najib, udah ti enda mujur nyaut tanya dalam beberapa bulan tu pasal atur iya ba 1MDB udah nunjukka duit ti dipasukka ngagai akaun iya empu kejang pengawa bepilihbesai ke-13 nya ukai “ke guna iya empu”.

Jaku gerah nya udah ditemu orang mayuh ti madahka duit nya diambi iya ari wang turu pemansang menua dikena iya melanja pengawa bepilihbesai dikena nentuka BN menang enggau chara ti ngelakar.

Baka nya mega lebuh Sarawak Report mantaika skandal ngubah duit ti dikereja Kepala Menteri Sabah, Musa Aman, suba, perintah besai udah nejuka iya lepas baka nya aja, laban munyi ku saut iya duit nya dikena meli undi maya bepilihbesai suba.

Kami udah nunjukka baka ni Musa Aman udah ngena duit ti diterima iya nya ke guna iya empu, baka melanja anak iya besekula di Australia. Tang Najib enda engkeretik lalu nadai ngambi sebarang tindak ba Musa, laban iya tentu ngarapka iya mega dilepaska enti iya ngereja penyalah baka Musa.

Tang Najib udah kena kutuk orang mayuh ari mayuh tikas jalai pendiau di Malaysia, ari raban orang ti bepenemu politik ti enda sebaka, bansa, chura kulit enggau mega mayuh bengkah jalai pengarap.

Nynetuk ke Tun Mahathir ti udah badu nyadi Menteri Besai pan sama mansutka jaku bantah iya ba ulah Najib bekaul enggau 1MDB enggau atur melanja pengawa bepilihbesai taun 2013 – nyentukka iya madahka pemutus bepilihbesai ke-13 nya kemari enda lurus ti ngujungka tikas perintah BN nya pan enda lurus mega.

Nya alai Cameron tetap deka napi penanggul ti ngelui semua penanggul lalu madahka semua utai ti dikereja Najib nya betul sereta lurus memagang, laban iya bisi beberapa buah jet perang ti deka dijual iya ngagai menua Malaysia (kami deka nuliska repot pasal jet perang nya ila).

Sarawak Report udah dituduh laban masuk champur dalam atur perintah dalam Malaysia ulih bala bakih Najib, semina ketegal kami deka ngena kuasa kami nusui berita ti lalu diasaika Najib nekan iya.

Dikena nimbal pengawa kami ti betusuika berita kami, Najib udah nyekat pemasuk blog kami tu, lalu pia mega ngantung pengerembai berita ari suratberita Malaysia empu, The Edge.

Najib udah ngemaduka beberapa iku orang dalam kabinet iya empu. Sida nya nyengkaum Sapit Menteri Besai, ti udah ngayanka pengirau ati diri ke pengawa Najib.

Ingat, Tuan Cameron, Najib nya benung bepagut ba penuduk iya taja pan iya dibantah kabinet iya empu, kelimpah ari ti ngambi kemisi beberapa minggu, ketegal ti bebasaka penemuai ofisyel nuan nya!

Nuan deka disambut sebuah perintah lalu empat iku kaban senior sida dalam perintah nya udah dikemaduka ketegal sida ti kelalu ragak madahka pengirau ati sida ba penyalah makai suap enggau penanggul ti nuntung 1MDB.

Nuan mega deka disambut siku Sapit PM ti baru dipaduka iya mangku pengawa, ti mega mengkang mangku pengawa nyadi Menteri Dalam Menua, ti kali bessemaya deka ngiga siku peranak menua UK ti nulis ke blog politik, Sarawak Report lalu minta diekstradisyen ari “bakih polis iya di Scotland Yard”.

Semua rayat Malaysia diatu nemu pasal entelah ti bebalut dalam pengawa munuh siku indu Mongolia, Altantuya Shaariibuu, ngena bom bebansa C4 dikereja dua iku pemesai polis lalu udah nya sida ditinggang ukum bunuh, taja pan kot enda ulih mutuska nama tuju bunuh nya dikereja.

Sekali ke Britain deka nanggam siti agi sempekat pengawa dagang ti sama enggau pengawa nyual jet perang bebansa Typhoon, tauka, patut enda kini Cameron ngelala pasal pengawa ti nyadi di menua diri pagila lalu terus mulaika diri?