Siti ari pekara ti udah tebantai ari skandal 1MDB kenyau ari beberapa minggu ke udah iya nya ambu Menteri Besai ti madahka iya udah ngena duit ti diterima iya ari siku orang ti gerah jari dikena iya bebelika sukung bala pengundi ba bepilihbesai nyin kemari.
Pekara ti udah tebantai nya udah nyungkak sebuah kes undang-undang ari tuai penyakal, Anwar Ibrahim, ti udah dijil Najib udah bekau iya bulih pemenang ti udu bekontroversi suba.
Dalam kes sivil nya, ti udah dianjung ngagai kot kena 12hb Ogos tu kemari, raban lawyer Anwar diatu udah ngenataika peminta ekstensif, ti bekaul enggau kuasa sida ti ngulihka penerang.
Penerang ti digiga sida nya nyengkaum mayuh macham pekara pengawa pansik ba pengelenyau duit menua ti mayuh bendar ti udah kala dipejalaika tang diatu pansik nya udah diketuka Menteri Besai empu.
![Anak indu tuai penyakal Anwar Ibrahim ti udah diukum jil, madahka pasal peminta sida maya aum media ba pun minggu tu](/wp-content/uploads/imgcache/2015/09/pImg_71984fdfbbfe6e00b2d0309ca48b79ea.png)
Tu nyengkaum orang siku ti udah ngemasukka duit RM2.6 billion ke dalam akaun duit simpan Najib ari menua tasik lalu nama tuju duit RM42 juta ti dibayar pansut ari KWAP lalu dipasukka ngagai akaun Najib.
Naka ke diatu raban akim udah nulak peminta raban lawyer ti ngarika Najib, Sekretari UMNO, 1MDB enggau Komiti Bepilihbesai madamka kes sebedau sida mantaika jaku bantah dikena sida ngetanka diri.
Reti raban defenden patut nyaut semua chabar Anwar lalu Najib diatu deka napi kot endur iya dipinta nyaut semua jaku tanya ti udah diseliahka iya ngelama tu, bekaul enggau duit ti dipasukka ba penyampau ti mayuh bendar, ti udah dikumbai iya udah dikena melanja UMNO/BN dalam pengawa bepilihbesai.
Bala lawyer Anwar, nyengkaum anak indu iya empu, Nurul Izzah Anwar, udah ngeluarka pasal peminta sida nya ba aum media sehari tu tadi, enggau ngayanka semua asil aum IACC ti udah diatur di KL, ti endur orang mayuh ti datai ngulu aum nya udah enchabar pemingking Najib ti enggai nyaut jaku tuduh ti ditujuka ngagai iya.
Pekara nya udah ditusui lalu dikerembaika ba tikas entarabansa.
Berita media mega bisi dipadahka pasal bala pemesai opis perintah ti beserekang penemu laban mantah atur Najib ngemuntanka pengawa pemansik ba iya empu.
Sarawak Report udah mujur bulih mayuh macham surat penerang ti dianjung sida ngagai kot, ti nyengkaum empat iti peminta ti kediri-kediri dikena ngelaban defenden ba kes nya enggau tiga buah bank ti bejalaika pengawa ba duit ti udah dipasukka ngagai akaun Najib.
Surat-surat penerang nya tau dibaca DITU, DITU, DITU enggau DITU.
![4 iti surat peminta ke penerang ngagai kot](/wp-content/uploads/imgcache/2015/09/pImg_e84356da93a1d235b93c9f00eac97452.png)
Peminta ke terubah dikena ngelaban Najib enggau defenden ke bukai ari BN, 1MDB enggau Komiti Bepilihbesai. Peminta nya dikena meresa semua akaun ti dikena sida nerima pemasuk duit ari KWAP enggau ari bank Falcon.
Tiga iti peminta meresa nya meri tekan ba AmBank enggau bank Affin ti udah ngatur pemindah duit ngagai akaun enggi Najib – enggau mega bank ari menua US, Goldman Sachs.
Bala defenden udah dipinta nunjukka isi akaun ti bisi kaul enggau pemindah masuk duit RM2.6 billion ari menua tasik enggau duit RM42 juta ari wang turu KWAP.
Ba senentang Goldman Sachs, sida minta ditunjukka surat penerang pasal pemindah masuk duit US6.5 billion ba gaya bon ke 1MDB, ti endur sekeda ari duit nya (munyi ti dituduh Dr Mahathir, Menteri Besai ti dulu suba) udah dipasukka ngagai akaun Najib dalam bank AmBank.
Goldman Sachs nya nyadika indu palan jaku tuduh ba penyalah ngubah duit dalam skandal 1MDB lalu penyalah nya udah majak matak sida dalam sengkaum skandal nya, ti diatu benung diperatika sereta dipansik raban penerit undang-undang pekara wang entarabansa.
Diatu kot benung diperatika sekali ke iya ulih ngansak Najib tauka bank ti bekaul dalam skandal nya nyaut semua jaku tanya ti suah udah diseliahka sida ba endur bukai. Kot di menua Malaysia diatu dipeda majak lenyau pengarap ba orang mayuh laban kelalu ditambat sebuah perintah rejim ti udah bekuasa dalam pengelama lebih kurang 50taun tu ke udah.
![Siku tuai menua di menua tasik udah dipejal badu bekereja ketegal dituduh lalu didawa ketegal penyalah makai suap sebaka enggau penyalah to dikereja Najib Razak di Malaysia.](/wp-content/uploads/imgcache/2015/09/pImg_400a19b08790f63a159a1e73f94ec748.jpg)
Taja pan baka nya raban akim nemu pasal kuasa bala ti deka bechara bekaul enggau sebuah kes bekaul enggau kuasa enggau mega isu bepilihbesai ti beresi lalu ngeripot kes penyalah makai suap ti kelalu besai.
Aum Transparency International di KL udah datai ba hari ti ke-tiga enggau penudi lalu nyerumba nya dipadahka pasal Presiden Guatemala badu agi mangku pengawa ari pilih iya empu sebaka enggau ansak ti diasaika Najib, bekaul enggau penyalah makai suap.
Presiden Otto Perez Molina udah tepejal besetuju badu nyadi presiden menua iya udah bekau pengawa orang bejalai bebala mayuh dijalai alun menua nya ketegal mantah penyalah iya makai suap, lalu enda agi bepagut ba kuasa enggau opis iya.
Bida tu deka seruran dikingatka bala orang ti mantah penyalah Najib Razak.