Sarawak Report udah mujur buli siti agi dokumen, ti ngayanka pengawa nipu ti dikereja raban pengurus 1MDB ba dagang kunsi sida enggau PetroSaudi.
Sekeda dokumen nya mega ngayanka pengelemi atur raban Pengarah, ditunjukka semina sebaka enggau chop ofisyel ke Menteri Pekara Wang Malaysia, Najib Razak.
Kami udah mujur bulih mayuh agi minit aum raban Pengarah, ti diatu benung dilalaika, ti nunjukka raban Pengarah udah segala runding ngasuh PetroSaudi nyemakaka pemasuk duit tunai ke dalam dagang kunsi nya, dikena mandingka duit bebillion-billion dollar ti endur Malaysia udah besetuju ngemasukka semina 40% syer nya.
Tang peminta nya udah enda dikibuhka raban pengurus, ti udah semina setuju nerima aset pelesu ari PetroSaudi dua-tiga hari udah nya.
Iya ti balat agi ari nya, raban pengurus 1MDB udah dibantaika nyadi PEMULA ke bala Pengarah sida bekaul enggau identiti bendar kompeni PetroSaudi, semina dalam timpuh sepuluh hari sebedau dagang nya dipejalaika.
Minit aum raban Pengarah direkod kena 18hb September 2009 (iya nya sepuluh hari sempekat dagang kunsi nya ditanggam kena 29hb) ngayanka Kepala Pengarah 1MDB, Casey Tang, udah bula ngagai raban Pengarah sida, madahka orang ti bempu kompeni PetroSaudi, maya nya kemari, Raja Abdullah, ari menua Arab Saudi!
Kami belabaka CEO 1MDB Arul Kanda deka ngaku pengamat minit aum nya, laban iya mega tentu bisi nyimpan minit ti sama sebaka enggau minit ti diayanka, laban iya mega nemu semua penerang dalam minit nya udah disadung, taja pan bos iya, Menteri Besai Najib bebendar ngelalaika penerang nya.
Tu mai reti Casey Tang udah terang bendar ngemulaka raban Pengarah 1MDB nya.
Semua penerang ti bisi pasal PetroSaudi ngamatka pasal kompeni nya semina entiti ti mit ngembuan puku ti enda besai, ti nyadika kompeni kerubung Putera Turki enggau bakih iya Tarek Obaid ti dikarapka ulih dikena ngambi bagi dalam dagang bala orang bepangkat raja.
Sarawak Report lama udah meratika profil kompeni PetroSaudi ti seruran berubah lalu ke bendar iya kompeni nya bepanggai bendar ba alamat enggau lumur telefon enggau faks ti diinjau sida ari bakih sida, Xavier Justo, to bisi opis di nengeri Geneva ba sebuah kompeni ti benama Fininfor.
Tang bala pemacha enda patut ngulihka penerang ari Sarawak Report aja, tang kita tau betanya ba menyadi Tarek empu, Nawaf Obaid, ti ngembuan kaul rat di menua Arab Saudi, ti bekereja nyadi penyanding penemu politik.
Enggau leka jaku bukai, PetroSaudi nya ukai kompeni enggi Raja Abadullah enggau perintah Arab Saudi tauka kompeni beranakka puku entara “menua enggau menua” – lalu menyadi Tarek empu udah nangkan iya enda nyebut penerang nya.
Tarek Obaid tetap nitihka jaku tangkan menyadi iya nya.
Penerang nya empu udah nerangka nama kebuah Bank Negara Malaysia udah ngeluarka sebuah notis ti ngiga Casey Tang ti ditemu kala bula ngagai raban Pengarah.
Sarawak Report udah ngeluarka mayuh randau nengah email ari pengkalan data PetroSaudi, ti endur Casey Tang suah meri salin lalu ngatur konspirasi dikena nipu Bank Negara Malaysia enggau mega raban Pengarah 1MDB ngambika mindahka sepenyampau UD$1.83 billion ngagai menua tasik lalu dipasukka ngagai akaun Jho Low enggau bala bakih konspirasi iya ari kompeni PetroSaudi.
Diatu Arul udah nguji ngumbai semua dokumen tu udah dibali tauka dikachau Sarawak Report, tang Arul patut mega nunjukka penerang ngagai kami lalu ngirit kami ngagai kot (siti pekara ti tentu enda ulih dikereja iya datai ke sehari tu).
Siti ari penerang ti dibantaika ari minit aum nya semina beberapa hari sebedau sempekat dagang nya ditanggam enggau jampat ngichaka ulih ngelempungka tekan ba rayat Malaysia bekaul enggau utang bebillion-billion nya.
Ba renggat tu bala Pengarah 1MDB udah nemu PetroSaudi endang enda ati ngemasukka duit tunai sida, kelimpah ari aset ti semina disebut aja.
Bala Pengarah ti udah dikumbai bisi kuasa penuh ba semua pemutus runding dalam 1MDB, ngasaika diri enda lantang ati laban piak Malaysia ngemasukka semua duit puku tang semina deka ngambi pulai 40% ari dagang kunsi nya.
Raban Pengarah minta PetroSaudi patut ngemasukka puku enda kurang ari satu billion ba mata duit tunai!
Dunya pengawa dagang diatu udah nemu, pekara tu enda nyadi nyengala. Tang taja pan PetroSaudi enda ngemasukka sebarang puku dagang, sempekat dagang nya dipajakka.
Bala Pengarah ti nadai guna-guna dalam 1MDB nya udah ngemendar raban penipu ngeluarka dokumen nginjau duit ti pelesu ba penyampau US$700 juta ba prosiding nya, lalu sida minta duit nya diambi pulai tiga hari udah nya.
Casey Tang enggau Shahrol halmi udah besetujuka peminta nya.
Enggau nya, kompeni PetroSaudi ukai semina nyeliahka diri ari ti ngemasukka duit puku dagang sida ti sebaka penyampau, tang sida udah bulih sher ti jauh besai agi ari puku ti diperanakka di Malaysia ba hari ke terubah nya – enggau chara ngemendarka duit puku dipindahka ngagai akaun pengari enggau penyanding penemu ke Menteri Besai, Jho Low.
Ke bendar iya, Pengerusi ke terubah 1MDB udah nyurutka diri ari pengawa iya sereta iya nemu pengawa salah ti dikereja dua tiga hari udah nya.
Tang nadai siku orang dalam 1MDB serebana, Menteri Pekara Wang, ti nyadika orang ngaga pemutus runding enggau chara belalai, udah bepuas ati enggau pekara nya enggau mega pengelenyau US700 juta ti dipasukka dalam akaun Jho Low.
Tukar email entara tarek Obaid enggau menyadi iya Nawaf Obaid terang bendar madahka Menteri Besai agi mayar aum media ti madahka PetroSaudi tetap deka ngemasukka puku dagang ke dalam dagang kunsi nya.
Sekali ke Menteri Besai nemu iya udah bula lebuh mansutka penerang tu tauka iya udah kena kelakar raban pengurus dalam 1MDB. Enti iya udah ditipu, dunya deka nemu nama kebuah iya enda bebendar begigaka orang ti salah nya kelimpah ari bejalaika atur dikena iya nutup mulut bala orang ti mantah iya enggau madamka semua pengawa mansik ba duit ti enda diterima ari PetroSaudi enggau mega pengelenyau duit syer 1MDB!
Ba renggat tu sekali ke Arul kanda deka badu agi bula ti endur iya madahka semua tu dipejalaika enggau manah sereta meruan dalam 1MDB lalu belabuh ngaku skandal tu nyadika skandal ngenchuri duit menua pemadu besai ba abad tu?