Diatu Sarawak Report udah bisi nerima sebuah asil peresa bekaul enggai bantai penerang ari 1MDB nengah minit aum raban pengarah sida, ti udah dilalaika Menteri Besai Najib enggau bala pemesai eksekutif 1MDB dalam pengelama bebulan-bulan tu udah.
Minit aum bala pengarah ti diatur kena hari Enam ba bulan Oktober 2009 nya, udah bekau sempekat dagang kunsi ditanggam enggau kumpeni PetroSaudi, ngayanka raban pengarah udah ringat bendar lebuh sida bela serebana pasal baka ni US$700 juta udah disintak pansut ari sepenyampau US$1 billion duit puku kompeni nya ke guna dalam dagang kunsi nya.
Pengeringat raban pengarah nya udah mejal sida minta sebengkah atur endur duit nya patut diberi pulai ngagai 1MDB!
Penerang ari raban pengarah 1MDB nya udah ngamatka jaku ari Bank Negera Malaysia ba minggu nyin kemari ti madahka duit ti diperanakka nya udah enda dikena baka ti disetujuka.
Tang taja pan enggau komen ti ringat ari raban pengarah sida, CEO Arul Kanda, udah dalam pengelama beminggu-minggu mengkang madahka berita kami bekaul enggau pekara nya udah ngerachun runding orang mayuh, lalu kenu ku iya mega, nadai utai nyelai nyadi ba dagang kunsi nya.
Penanggul ti baka tu udah ngujungka Pengerusi raban pengarah sida, Mohd Bakke Salleh, udah ngemaduka diri mangku pengawa iya, ti udah nya dientudika siku ari bala pengarah sida, Azlan Mohd Salleh.
Sekeda ari siri minit aum ti bisi diterima kami diatu nunjukka chura ngelaban arah bala pengarah ti endang disengajaka ti dikereja raban pengurus dalam 1MDB.
Sida nya disadang endang nitihka arah enggau asuh piak ti bukai, dipelabaka ari Menteri Besai ti ditemu kami nyadika siku orang ti enda ditemu tanga diberi kuasa nyain semua pemutus pengawa beranakka puku.
Nitihka penerang ari mint aum nya dia bala pengarah madahka sida enda diterangka lalu saru pasal pemindah duit US$700 juta ke dalam akaun Good Star enggi Jho Low.
Ari minit aum 18hb September dia raban pengarah 1MDB bisi madahka diri enda puas ati lebuh kompeni PetroSaudi madahka sida nadai duit puku ti bendar dipasukka ngagai dagang kunsi nya, kelimpah ari ti besemayaka aset sida aja.
Raban pengarah ngaga pemutus penemu madahka PetroSaudi patut ngemasukka duit puku abis kurang US$1 billion ti deka ngarika syer sida ba pemayuh 60% ba kompeni dagang kunsi nya.
Tang ba 3hb Oktober nya minit aum nunjukka raban pengarah udah nemu peminta sida nya enda diturutka. PetroSaudi udah udah ditejuka nadai bejalaika sebarang pengawa ngemasukka “aset” sida ke dalam dagang kunsi nya.
Ba aum nya bala pengarah udah dikenyitka sekali ke bisi peresa ti silik dipejalaika dikena nentuka pengamat aset ari PetroSaudi nya tauka nadai.
Minit aum nya udah ngerekod jaku tanya ari bala pengarah nama kebuah pejalai dagang nya dipejalaika enggau beguai-guai, lebuh sida nemu peresa ti patut dipejalaika ba PetroSaudi, semina dalam timpuh seminggu aja, lalu ukai enam bulan!
Tu siti isu ti nyengala ti dikupas Sarawak Report enggau mayuh agi media ti bukai dalam kandang beminggu-minggu tu, lalu CEO Arul seruran bebulaka pengirau ati kami lalu suah nguji enda ibuhka penerang ti diayanka kami.
Diatu kami nemu raban pengarah 1MDB udah betalatka isu ti sebaka belabuh ari sempekat dagang kunsi nya di tanggam ukai ari pemendar sida.
Pejalai pengawa dagang ti jampat dalam 1MDB nya udah nyadika norma dalam kompeni sida nya. Dagang kunsi bestrategi 1MDB/Aabar ti udah ditanggam kena 12hb Mach, udah bekau 1MDB ngangkatka US$3 billion dalam timpuh seminggu aja.
Bank Goldman Sachs udah minta bayar servis ti kelalu tinggi datai ke US$300 juta ketegal ti mantu 1MDB ngulihka duit jali enggau lengkas. Mayuh orang betanya nama kebuah sida patut beguai-guai ngulihka duit ngemayuh nya semina ketegal deka belabuh enggau projek Tun Razak Exchange, ti datai ke sehari tu udah lebih dua taun setengah nadai tentu pengawa dipejalaika dia?
Baka ti udah kala dituliska Sarawak Report, dua hari udah bekau duit injau nya diangkatka, dia sepenyampau US$681 juta udah dipindah tama ngagai akaun Menteri Wang/Menteri Besai ti kenu ku iya diberi “siku pemeri ti gerah bendar jari” dikena bejalaika kimpin maya bepilihbesai ti ditesau iya dua hari udah nya.
Sekali agi pengawa nginjau duit nya berubah nya penusah utang besai ngagai 1MDB, ti udah nya ngujungka sida lenyau mayuh agi duit ba atur bebayar ti enda ditemu kini penunga, lalu ngujungka utang sida nyau betuchung baka bukit.
Minit aum kena 3hb Oktober nya mega ngamatka pengirau ati orang mayuh ti kala mega dituliska kami bekaul enggau peresa atas aset PetroSaudi ti dipejalaika siku orang ti landik ba atur bank menua US, Ed Morse.
CEO Shahrol Halmi udah mujur bejalaika pengawa iya. Duit nya udah dikeluarka ari 1MDB lalu dipasukka ngagai akaun Good Star lalu enda agi dipulaika.
Nitih minit aum 3hb Oktober nya raban pengarah nemu US$700 juta udah dirampas ari wang turu menua nengah sebengkah pengawa ngerumpak dipejalaika Jho Low enggau PetroSaudi ti pemadu besai dalam abad tu.
Pekara ti deka disebut sida nya, atur nanggam dagang kunsi nya dikereja enda ditemu sida!
Minit aum 18hb September nya terang bendar nunjukka raban pengarah nya udah dipadahka pasal pengawa nanggam dagang kunsi nya dilanggur kena 28hb ba bulan ti sama.
Tang minit aum 16hb September mega nunjukka bala pengarah udah minta PetroSaudi besemayaka duit tunai kelimpah ari semina nyebut aset awakka dagang kunsi nya tau diteruska.
Baka ti ditemu kami, nadai siti pan peminta raban pengarah nya udah ditunaika.
Pengrusi sida ke terubah udah badu mangku pengawa lalu diganti siku pengerusi baru ti kala nyadi agen ke Menteri Besai lebuh iya agi nyadi Menteri Pengelikun Menua, Lodin Wok Kamaruddin ti udah enda ibuhka semua pengawa dagang dalam 1MDB, enggau nadai mayuh macham kelikuh.
Menteri Besai ti baru udah bulih kebal ari bala orang ti ngaga pemutus penemu dalam 1MDB – agi mega sida nya ukai orang ti endang ngaga pemutus penemu ti bendar, baka ti ditemu kitai.