![Sebengkah buah jari ti manah sereta besai bendar rega ke diberi ngagai pemesai bank ti ngemataka akaun bank nuan ba Edmond de Rothschilde](/wp-content/uploads/imgcache/2016/03/pImg_a3abfbc775622df23ded127992feadb0.jpg)
Rintai nama bank ti besai-besai entarabansa ti udah besedia nutup pending diri ke penyalah ngubah duit ngarika klien sida ti tebilang dalam politik, ti bisi kaul enggau 1MDB enggau Aabar, diatu makin ngerembai.
Empas ari pengawa salah nya, sekeda ari bala pemesai bank nya udah dibuai ari kereja sida.
Sida tu nyengkaum tuai dalam Goldman Sachs ke pelilih Asia Tenggara, ‘Dr’ (pelesu) Tim Leissner; tuai bank BSI Singapura, HansPeter Brunner; tuai dalam Banque Privee Edmond de Rothschilde, Marc Ambroisien (uji peda gambar buah jari ti diterima iya ari siku klien iya) enggau tuai bank ANZ ke dulu suba ti udah dijali bekereja ngagai AmBank di KL, tang udah nya dibai pulai ba pun taun nyin kemari, Ashok Ramamurthy.
Tang agi mayuh jaku tas nya ti besai reti ti bedau disautsekeda bank nya empu lalu pasal sekeda pemesai ban ti agi mengkang bekereja. Siku ari bala pemesai nya Mandy Simpson siku Tuai Pemesai Pekara Wang ti mega diinjau ari bank ANZ Australia.
![Ashok Ramamurthy enggau CFO iya Mandy Simpson, sama-sama diinjau gawa ari ANZ Bank Australia ngagai AmBank](/wp-content/uploads/imgcache/2016/03/pImg_bcc8a9e89fec1212a76a34df4418d2c6.jpg)
Tambah mega Mandy Simpson dipaduka ngemataka atur nerima lebih satu billion dollar ari sekeda kompeni baka Blackstone Asia Real Estate Partners [BVI] (BAREP) di ditemu direjista ba nama Jho Low, enggau Tanore Finance Corporation (BVI) ke dalam akaun enggi Menteri Besai.
![Sekeda surat ari BAREP disain siku ‘shiekh’, tang pemegai sher dalam kompeni nya Jho Low](/wp-content/uploads/imgcache/2016/03/pImg_eddbce5a358b336bc6b21e646626c9e2.jpg)
Baka ti kala ditusui Sarawak Report, AmBank udah nerima sekeda surat dikena nyukung bayar ti nyelai tu – semua surat nya dikirumka siku orang ti sama ti dikelala enggau nama ‘Saud Abdulaziz Majid al-Saud’.
Naka ke diatu bedau bisi sapa-sapa deka ngamatka pun penatai duit pemeri ti nyampau nya enggau kebuah ti deka meri Najib ngemayuh nya.Tang pun penatai duit ti ulih dikamatka nya endang ari sebuah kompeni ti nyarung diri, iya nya BAREP (BVI) ti enggi proksi Najib, Jho Low.
Mudah bendar Mandy Simpson ngemendarka pemindah duit ngagai Bank Indu di Malaysia ba mua bala bos iya?
Sekeda bank bukai ti udah direkodka nyadika pemantu pemindah duit ti mayuh dalam kaul 1MDB/Aabar nya baka Coutts, JP Morgan, BSI Singapura, Standard Chartered, Deutsche enggau Falcon.
Bank ke diatu ti ditemu bisi kaul dalam skandal nya iya nya bank New York Mellon. Sama bisi ditemu bisi akaun dalam bank nya tiga iti akaun enggi anak kompeni 1MDB, iya nya 1MDB GIL, 1MDB Energy enggau 1MDB Energy Langat.
![Bos dalam Aabar ti udah badu gawa, Khadem Al Qubaisi, udah kala ngetur pengelenyau bebillion-billion dollar lalu ditemu bekaul rapat enggau Jho Low.](/wp-content/uploads/imgcache/2016/03/pImg_640983d778f7d3af5a7ccc876560983f.jpg)
Enggau pengelenyau beratus-juta dollar ari akaun tiga buah anak kompeni, lalu nya alai Mellon Bank dipelaba ke kakang tau mantu bala penerit undang-undang nyidi pengelenyau duit nya.
Sarawak Report mega udah bulih sekeda surat penerang ti nunjukka Mellon Bank udah ditemu nyadika institusyen endur nukar duit ti udah dikena pemesai, Marc Ambroisien (ti udah dibuai ari penuduk iya dalam bank Edmond de Rothschilde Luxembourgh) dikena ngatur pemindah duit setengah billion dollar ngagai Khadem Al Qubaisi.
Setengah billion dollar ti dikirumka Jho Low ngagai Khadem ba taun 2012 ti nyereta pengawa meli palan kuasa karan ti enda tentu dikelala entara 1MDB Energy enggau Aabar.
Bank Standard Chartered di Singapura udah nganjung peminta sida ti deka mindahka duit nya, Mellon lalu ngatur pemindah nya lalu bos dalam BPERE, Marc Ambroisien udah nerima masuk duit nya ke dalam akaun Khadem di BPERE Luxembourgh.
Nama kebuah tiga buah bank nya nadai ngena tanggungpengawa sida ngeripotka pengawasalah klien sida ngagai raban penerit undang-undang?
Ba dini-dini kes, baka ni tau mudah pemindah duit ari siku orang ti udah ditemu bisi kaul politik ngagai siku agi orang ti sebaka penuduk nya, ti udah disadang bisi kaul enggau dagang 1MDB/Aabar, ti kena balut penyampau duit ti mayuh?
![Siti ari pemindah duit setengah billion dollar diatur dalam timpuh empat lima bulan aja](/wp-content/uploads/imgcache/2016/03/pImg_5356f6e8ccf532fad69fd4d432846960.jpg)
Baka ti udah kala diterangka bala pakar ti mansik penyalah ngubah duit ngagai Sarawak Report, tanggungpengawa semua bank nya ba pemindah duit tu terang bendar.
![Marc Ambroisien ti bekereja enggau bank Edmond de Rothschilde](/wp-content/uploads/imgcache/2016/03/pImg_24a3c6a2448a927aef8f6df2c72715ed.jpg)
Nya alai, enggau enda kakang agi penyalah ti udah dikereja siku pemesai dalam Edmond de Rothschilde, terang nunjukka nama kebuah Marc Ambroisien diatu udah dibuai ari pengawa iya dalam bank nya.
Tang taja baka nya diatu Marc udah diambi bekereja penuh timpuh dalam sekeda kompeni nyadi pengurus reta enggi Khadem Al Qubaisi di menua Peranchis.
Nya alai, nama tindak ti udah diambi raban penerit undang-undang ba sekeda bank nya, ti mengkang ngumbai diri beresi lalu mega nadai nyebut nama-nama pasal Marc Ambroisien?
Sekali ke nya pekara selama dikereja orang dalam bank Edmond de Rothschilde, ambi ke banding, ti endur siku ari pemesai sida bisi nerima tanda puji sebuah kerita Aston Martin DBS ti berega Euro 250,000 (kurang lebih RM1.1 juta) ari siku klien iya ti kaya raja? Tu mih utai ti udah diatur Khadem lebuh Marc nya agi bekereja enggau BPERE suba.
![Pemeri berupa sebuah kerita ti berega semak setengah juta euro ke siku pemesai bank – November 2013](/wp-content/uploads/imgcache/2016/03/pImg_0c749871a9c2d987cee3978a7abe661c.jpg)
Tambah mega, rekod jaku randau, ti diatu udah ba jari bala pengarang berita, entara Marc enggau Khadem, ti benung bejuraika sekeda akaun Khadem. Rekod randau nya terang bendar nunjukka pemesai bank nya nemu diri ngelanggar semua undang-undang bekaul enggau pemindah duit ti mayuh bendar nya.
Ba pengawa dagang dalam taun 2014 entara Khadem enggau Jho Low bekaul enggau atur meli kompeni Coastal Energy ti ngena duit ari Aabar enggau ‘SRC Global’ (ti udah dituduh Sarawak Report ketegal dagang ti nyelai sereta ngasuh irau ati dua taun ke udah) Marc madah untunh ti nyelai ke Khadem nya enda ulih diatur, ambi ke banding, nengah bank HSBC.
Semua pekara di atas nya ulih dikena nerangka pasal buah jari nyerupa sebuah kerita Aston Martin DBS ke Ambroisien, tang nya enda ulih nerangka ambu bank nya ngagai bala pengarang berita ti madahka atur dagang nya nadai penimpang.
Malaysia enggau orang di serata dunya diatu benung nganti bala penerit undang-undang entarabansa ngambi tindak atas semua macham penerang ti bekaul enggau skandal 1MDB/Aabar. Enti sida nadai ngereja sebarang utai ti patut dikereja sida, cherita nya deka nyadi balat agi serius.