Lebuh bala pemansik entarabansa bejalaika pengawa sida ba atas 1MDB, Sarawak Report ulih mantaika berita ti pengambis baru ti tau bendar ngemediska ati Menteri Besai Malaysia.
Berita nya bekaul enggau sepenyampau duit US$179 juta ti enda ulih diterangka, ti kala ditusui kami dulu ari tu ngagai sebuah kompeni enggi Jho Low ke dalam akaun AmBank Najib Razak ba ujung taun 2011.
Disungkak baru diatu penyampau duit ti sama udah dibayar keluar sereta ari kompeni SR International, sebuah kompeni 1MDB ti nyadi tumpu tuduh dikena ngelaban Najib.
![Nik Faisal, CEO dalam SRC ti mega kala nyadi Kepala Pemesai Dagang dalam 1MDB](/wp-content/uploads/imgcache/2016/03/pImg_b16e7b782d4d467bb8d1c991655dac5a.jpg)
Tu udah nyungkak siti jaku tanya sekali ke dua iti pemindah duit nya bekaul enggau pangan diri.
Sarawak Report bisi bulih penerang ti madahka dalam bulan November 2011 kompeni SRC, ti dikemataka Nik Faisal Ariff Kamil, ti bakih Jho Low, diatu benung belalai di menua tasik, udah dibayar US$170 juta ke dalam sebuah akaun di menua tasik dalam bank Switerland, Julius Baer.
Jaku tanya ti patut disaut diatu nya, nama kebuah duit nya dippindahka lalu kini penunga duit nya?
Enti saut enda ngemuaska, tentu deka tebantai sangka orang ti ngumbai duit nya dipindahka ari kompeni.
Blackstone Asia Real Estate Partners Ltd di BVI enggi Jho Low ke dalam akaun Najib di KL, endang duit orang mayuh ari SRC.
Kompeni SRC ti udah dipadamka ari 1MDB tang udah nya digaga nyadika anak kompeni Opis Menteri pekara Wang dalam taun 2012 ti dikuasa Najib udah nyadi sabjek kenang orang mayuh. Kompeni nya asal iya ditumbuhka nyadi anak kompeni 1MDB lalu mujur bendar bulih duit injau RM4 billion ari wang turu sekim orang penchen KWAP dalam taun 2011.
Bala orang politik penyakal udah bebendar minta deka nemu baka ni duit nya didagangka lalu nama kebuah akaun kompeni nya enda ulih ngayanka penampak sida dalam pengawa tu kelimpah ari ti laun mantaika surat kira-kira sida.
Lebuh, ke pengujung iya, Najib ti Menteri Besai/Menteri Pekara Wang udah mansutka saut iya ba taun nyin kemari bekaul enggau SRC iya suah nandu jaku iya madahka mayuh ari duit nya udah dikena bedagang di menua Mongolia. Tang Sarawak Report udah bejalaika pansik lalu nemu penyampau di didagang iya dalam pengawa ngulihka arang batu nya semina mimit aja ari RM4 billion ti diinjau nya.
SRC, nyerumba nya, udah nyadi fokus pansik raban SPRM bekaul enggau pengelenyau bebillion-billion ringgit ari 1MDB, ti udah ditetapka dalam dua set bayar bepenyampau RM42 juta enggau RM27 juta, dipindahka dalam menua Malaysia ari SRC ke dalam akaun enggi Menteri Besai Najib Razak.
![Peratika sekeda akaun AmBank dalam kertas ti diayanka Lawyer Bansa tu – 880, 898 & 906](/wp-content/uploads/imgcache/2016/03/pImg_ad1c8a368c3d334d2a113d6f1df6c860.jpg)
Bayar tu udah dibantu Nik Faisal, nitihka penerang ti bisi, lalau Sarawak Report udah meri dokumen dikena nunjukka Menteri Besai udah meri kuasa ngagai Nik Faisal ngemataka akaun dalam AmBank iya.
![Nik Faisal diberi kuasa ngemataka pemasuk duit ngagai akaun Najib](/wp-content/uploads/imgcache/2016/03/pImg_aebf30dc34f67d57eeb8373ece5f3491.jpg)
![Gambar dipeda ari semak](/wp-content/uploads/imgcache/2016/03/pImg_f914aa544261ea26e16db906a6f0c841.png)
Pansik dalam Malaysia empu udah diasuh ngetu bulan nyin kemari, ari Lawyer Bansa ti udah masuk champur, ti dipaduka Najib udah bekau iya muai lawyer bansa ti dulu enggau chara ti enda ngena atur undang-undang laban ditemu iya benung nembuka keretas tuduh ba iya bekaul enggau pemindah duit nya.
Lawyer Bansa ti dipilih Najib diatu nya udah dichabar ngena chara undang-undang bekaul enggau pekara nya ulih sekeda lawyer enggau penyampau repot polis ti majak mayuh, laban iya udah ngambi tindak ngelui ari sekat kuasa nya masuk champur ba pengawa SPRM ti nyediaka tuduh ba iya.
![Ngiga penunga duit nya – PM ti mega Menteri Pekara Wang Najib Razak udah bulih kuasa mindahka duit dalam 1MDB enggau SRC](/wp-content/uploads/imgcache/2016/03/pImg_b96cda022b6f27b798eca54ad5990057.jpg)
Raban SPRM udah ngetanka pelasar dawa enggau tuduh sida lalu ngapil pemutus Lawyer Bansa Apandi Ali kelimpah ari iya mansutka jaku gerah madahka Menteri Besai udah ‘beresi” ari sebarang tuduh ketegal “nadai penerang” ti nunjukka duit kala dikelimpangka ari 1MDB.
Ke bendar nya sebuah pemindah duit udah ditemu ba tikas entarabansa, ti mega dikaitka pulai ngagai SRC, ti tau dikena nerangka gaya utai ti nyadi ba Najib.
Najib engka mujur nagang pansik dalam menua, tang pemindah dalam mataduit dollar nengah sistem bank dunya ulih ditemu bala pemansik ari menua tasik.
Bala pemansik US enggau Switzerland udah didinga begempung enggau pangan diri nguji nentuka pejalai duit nya ari sebuah pampang bank Switzerland di Singapura (ti mega endur perintah Singapura meri kerejasama sida ba pansik nya).
Enti penyampau duit ti dipindahka pansut ari SRC nya enda sebaka enggau penyampau ti dipasukka ngagai akaun bank AmBank ti benumbur 694 di KL enggi Menteri Besai dalam taun 2011, tu mih maya endur iya nunjukka penerang nya.
![Seet Li Lin, mantu Jho Low ti mega nyadi pengurus kompeni Blackstone Asia Real Estate Partners Ltd BVI](/wp-content/uploads/imgcache/2016/03/pImg_068a2c93de308cb05d351c623512e76c.png)
Sarawak Report udah nyidi enggau silik pengawa kompeni BVI tu lebuh sida ngatur bayar ukai semina ngagai Najib tang mega ngagai orang bukai dalam 1MDB enggau Aabar ari Abu Dhabi, pengerusi sida Khadem Al Qubaisi.
Dalam taun 2012 Khadem bisi nerima setengah billion dollar ke dalam akaun iya ba sebuah bank di Luxembourg, Edmond de Rothschilde banque privess, dibayar Blackstone Asia Real Estate Partners Ltd (BVI).
Pekara ti narit ati ba kompeni nya laban iya diberi nama sebaka enggau Blackstone BAREPL ari menua US ti ditagaka Jho Low dikena iya ngubah duit.
Kompeni nya udah dikorporatka dalam bulan November 200 lalu udah dichairka dalam bulan Mei 2013, udah tembu pengawa bepilihbesai Malaysia.
![Sebuah kompeni ti pandak umur udah ditemu mindahka duit ti mayuh ngagai akaun Khadem enggau Najib Razak](/wp-content/uploads/imgcache/2016/03/pImg_b00bec1d95128786e1e77c48d5b5b43e.png)
Sarawak Report udah nusui pasal US$17 juta udah dipindahka ari kompeni tu ke dalam akaun AmBank ti sama enggi Najib ti udah nya nerima US$681 juta ba bulan Mach 2013.
Pengurus ti direjista ke kompeni Blackstone nya Seet Li Lin, ti mega nyadi pengurus Good Star Ltd ti udah nerima bayar ke terubah ba penyampau US$700 juta ti dilarika ari dagangkunsi 1MDB PetroSaudi.
Enti duit US$170 juta nya udah dibayar dalam bank Julius Baer ari SRC ba bulan November 2011 suba udah enda dipindahka, terus tauka enda terus, ngagai kompeni Blackstone, ti bisi akaun enggau Standard Chartered di Singapura lalu udah nya ngagai akaun Menteri Besai di KL, tu ih maya Najib ti mega nyadi Menteri Pekara Wang Malaysia nerangka utai ti udah nyadi ba US$17 juta ti lenyau nya?
Skandal tu udah malut dua buah bank entarabansa ba penyalah ngubah duit 1MDB.
Bank Julius Baer nya nyadika bank ari Switerland ti pengabis baru ti ditemu kena balut penyalah tu. Bank bukai ti udah ditemu nya BSI, Coutts Zurich, JP Morgan Suisse enggau Falcon Bank. Ba bulan Disember nyin kemari bank nya ditemu mantu sekeda orang kaya ti nyadi klien sida nguji nyeliahka chukai menua.
Pengawa sekeda pampang bank ari menua tasik di Singapura dipeda makin terang ba skandal nua, ti endur Standard Chartered di Singapura nyadika pengeluar akaun Blackstone yang nyadi ‘kumang menyarung’ nya.
Ditambahka dalam rintai nya ANZ Bank ari menua Australia, ti nyadika pemegai saham enggau payung ke AmBank enggau Goldman Sachs.
Bala pelobi Najib di menua tasik menua bebendar amat bekereja lalu melanja mayuh bendar duit ari Malaysia nguji nutup pansik entarabansa tu, tang diatu udah bisi tanda dingayanka bala penerit undang-undang enggau raban media dunya udah nemu pasal semua utai ti nyadi tu.